Luzitu Sambu na Bantu ya Dibuta Me Kwendaka na Wapi?
SAMBU NA NKI KUZITISA BANTU YA DIBUTA KELE MFUNU?
Ngemba ke vandaka na dibuta kana bakala, nkento mpi bana ke pesana luzitu.
-
Mukanda mosi (The Seven Principles for Making Marriage Work) ke tuba nde kana bantu ya me kwelanaka ke pesana luzitu, bo ke monisilanaka zola “na mambu ya nene kaka ve kansi mpi na mambu ya fioti-fioti konso kilumbu.”
-
Bansosa ke monisa nde bana yina ke zitisaka bantu ya nkaka ke kudiwaka mbote, bo ke vandaka ti kinduku ya mbote ti bibuti na bo, bo ke vandaka ve ti basusi mingi mpi bo ke niokwamaka ve mingi na mabanza.
MAMBU YA NGE LENDA SALA
Beno solula na dibuta. Kima ya ntete, beno zikisa nde konso muntu na kati ya dibuta ke bakisa kana “luzitu” ke tendula nki. Kima ya zole, beno sonika bikalulu yina konso muntu na dibuta fwete vanda ti yo mpi bikalulu ya mbi yina yandi fwete vanda ve ti yo. Kima ya tatu, beno tubila na dibuta lukanu ya beno me baka sambu beno yonso, yo vanda bana mpi bibuti, konso muntu kuzaba mambu yina yandi lenda sala sambu na kuzitisa bantu ya dibuta.
Vanda mbandu. Keti nge ke tubaka mambu ya mbi sambu na bantu ya dibuta na beno sambu na bifu ya bo ke salaka? Keti nge ke sekaka bo sambu na bangindu na bo? Ntangu nge ke solulaka ti bo, keti nge ke kipaka ve mambu ya bo ke tubaka to nge ke zengaka bo ndinga?
Mambu ya nge lenda sala: Sala yonso sambu nge kuma kumona nde luzitu kele kima yina nge fwete monisila nkwelani na nge mpi bana na nge kansi ve kima yina nge ke mona nde nge lenda monisila bo to ve.
Vanda luzitu ata ntangu nge ke ndima ve bangindu ya bantu ya nkaka. Ntangu nge ke tuba, buya kutuba mambu bonso “nge ke vandaka ntangu yonso mpidina” to “nge ke salaka yo ve ata fioti.” Kutuba mambu ya mutindu yai ta pesa mpangi na nge ya dibuta mpasi ti makasi, mpi yo lenda sala nde mavwanga ya fioti kukuma ngolo kibeni.
MAMBU YA BETO KE SALAKA
Bambangi ya Yehowa ke sadisaka bantu ya mabuta na kupesana luzitu. Mbala mingi bo ke tubilaka yo na bazulunalu, na mikanda, na tumikanda mpi na bavideo yina bo ke basisaka. Nge lenda baka yo ya ofele.
SAMBU NA BANTU YA ME KWELANAKA: Masolo ya kulandana ya kele na kitini Lusadisu Sambu na Mabuta lenda sadisa babakala mpi bankento na . . .
-
kuwidikila mbote ntangu nkwelani ya nkaka ke tuba
-
kubuya kikalulu ya kukonda kutubisana
-
kuyambula kuswana
(Sosa masolo ya kele na kitini “Lusadisu Sambu na Mabuta” na jw.org)
SAMBU NA BIBUTI: Masolo ya kulandana ya kele na kitini Lusadisu Sambu na Mabuta lenda sadisa bibuti na kulonga bana na bo na . . .
-
kuvanda bulemfu
-
kupesa maboko na bisalu ya nzo
-
kutuba “kana nge me zola” mpi “mersi”
(Sosa masolo ya kele na kitini “Kusansa Bana” mpi na kitini “Kusansa Batoko” na jw.org)
Tala mpi masolo “Malongi Sambanu Yina Bana Fwete Longuka” na Telama! No. 2, 2019 mpi “Mambu 12 Yina Ke Salaka nde Mabuta Kuvanda na Kiese” na Telama! No. 2, 2018, balutiti 8-11. (Sosa bazulunalu yina na jw.org)
SAMBU NA BALEKE: Kitini Baleke ti Bambuta na jw.org kele ti masolo, bavideo mpi balutiti yina lenda sadisa baleke na . . .
-
kuwakana mbote ti bibuti mpi bampangi na bo ya dibuta
-
kusolula na luzitu ti bibuti na bo sambu na bansiku yina bibuti ke tudila bo
-
kusala mambu yina ta sala nde bibuti na bo kukuma kutudila bo ntima
(Sosa kitini “Baleke ti Bambuta” na jw.org)
Bantu yonso lenda sadila site Internet jw.org ya ofele. Beto ke lombaka ve bantu mbongo sambu na kusadila yo, beto ke lombaka bo mpi ve na kukuma ba abonnés na yo mpi beto ke lombaka ve ata muntu mosi na kupesa bansangu ya me tala yandi.
