DIBANZA YA BIBLIA
Kubasisa divumu
Konso mvula bamilio ya babebe yina me butuka ve ke fwaka sambu bamama na bo ke basisaka mavumu na luzolo yonso —Ntalu yai me luta ntalu ya bantu ya bansi mingi.
Keti yo kele desizio ya muntu yandi mosi to diambu ya me tala bikalulu ya mbote?
MAMBU YINA BANTU KE TUBAKA
Bankento yina ke basisaka mavumu, ke salaka yo sambu na bikuma mingi, mu mbandu mpasi ya mbongo, kukonda kuwakana ti bantu, mpusa ya kuvanda ti kimpwanza ya kusala banzo-nkanda ya nda to ya kusala kisalu, to yandi ke zola ve kuvanda mama yina ke sansa mwana yandi mosi. Kansi, bankaka ke monaka nde kubasisa divumu kele diambu ya mbi; yo kele kubebisa ntima yina bo me tudila nkento yina kele ti divumu.
MAMBU YINA BIBLIA KE TUBAKA
Na meso ya Nzambi, luzingu—mingi-mingi ya muntu—kele santu. (Kuyantika 9:6; Nkunga 36:9) Munsiku yai ke tadila mpi bebe yina ke na divumu, kisika ya lutaninu yina Nzambi me yidikaka sambu mwana kuyela. Nsoniki mosi ya Biblia tubaka nde: “Nge fikaka mono na divumu ya mama na mono. Meso na nge monaka mono nkutu ntangu mono vandaka na kati ya divumu; bitini na yo yonso vandaka ya kusonika na mukanda na nge na yina me tala bilumbu yina yo salamaka.”—Nkunga 139:13, 16.
Mutindu Nzambi ke tadilaka luzingu ya mwana yina me butuka ntete ve ke monana na Nsiku yina yandi pesaka dikanda ya Izraele mpi na kansansa yina yandi me pesaka beto. Nsiku yina Nzambi vandaka kutuba nde muntu yina me bula nkento ya kele ti divumu mpi me fwa mwana na yandi yina me butuka ntete ve, bo fwete zengila yandi nkanu ya lufwa—bo fwete fwa yandi sambu yandi me fwa muntu. (Kubasika 21:22, 23) Ya kieleka, yo vandaka kulomba nde bazuzi kutadila bikuma yina pusaka yandi na kusala yo mpi kisika to ntangu yina yandi salaka yo.—Kutanga 35:22-24, 31.
Bantu yonso ke vandaka mpi ti kansansa. Kana nkento ke wila kansansa na yandi mpi ke zitisa luzingu ya mwana na yandi yina me butuka ntete ve, kansansa na yandi ta natila yandi mambote. * Kana yandi wila ve kansansa na yandi, yo lenda yangisa yandi to nkutu kubedisa yandi. (Baroma 2:14, 15) Ya kieleka, bansosa ke monisa nde mbala mingi bankento yina me basisaka mavumu ke vandaka na basusi mpi ke niokwamaka na mabanza.
Ebuna, kana ngindu ya kusansa mwana ke pesa boma, mingi-mingi kana beno kanaka yo ve? Nzambi ke pesa bantu yina ke zitisaka bansiku na yandi na kwikama yonso lusilu mosi ya ke bwisa ntima. Yandi ke tuba nde: “Na muntu ya kwikama, nge ke salaka mambu na kwikama; na muntu ya kukonda kifu, nge ke salaka mambu kukonda kifu.” (Nkunga 18:25) Beto ke tanga diaka nde: “Yehowa ke zolaka lunungu, mpi yandi ta yambula ve bantu na yandi ya kwikama.”—Nkunga 37:28.
“Kansansa na bo ke taka kimbangi kumosi ti bo, mpi nde mabanza na bo mosi ke fundaka bo to nkutu ke nungisaka bo.”—Baroma 2:15.
Ebuna kana nge me basisaka dezia divumu?
MAMBU YINA BANTU KE TUBAKA
Ruti, mama yina ke sansaka bana yandi mosi, tubaka nde: “Mono vandaka dezia ti bana tatu ya fioti mpi mono vandaka kuyindula nde mu ta kuka ve kusansa bana iya. Ata mpidina, na nima ya kubasisa divumu, mu kudiwaka nde mu me sala diambu mosi ya mbi kibeni.” * Kansi, keti yandi salaka diambu yina Nzambi lenda lolula yandi ve?
MAMBU YINA BIBLIA KE TUBAKA
Yezu Kristu monisaka dibanza ya Nzambi na diambu yina ntangu yandi tubaka nde: “Mono kwisaka ve sambu na kubinga bantu ya lunungu, kansi bansumuki sambu bo balula ntima.” (Luka 5:32) Ee, kana beto ke wa mawa ya masonga sambu na diambu ya mbi ya beto me salaka mpi beto balula ntima, mpi kulomba Nzambi na kulolula beto, yandi ke salaka yo, ata beto salaka masumu ya nene. (Yezaya 1:18) Nkunga 51:17 ke tuba nde: “Ntima ya kele na mawa mpi ya ke niokwama, O Nzambi, nge ta buya yo ve.”
Nzambi ke pesaka muntu yina me wa mawa kansansa ya bunkete mpi ngemba ya mabanza kana yandi me samba Nzambi na kudikulumusa yonso. Bafilipi 4:6, 7 ke tuba nde: “Na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno mpi mabanza na beno.” * Na nima ya kulonguka Biblia mpi ya kukangudila Nzambi ntima na yandi, Ruti kumaka ti ngemba ya kati. Yandi longukaka nde Nzambi “ke lolulaka na masonga yonso.”—Nkunga 130:4.
“[Nzambi] me sadila beto ve mambu na kutadila masumu na beto, yandi me vutudila beto mpi ve mambu yina me fwana na bifu na beto.”—Nkunga 103:10.
^ par. 8 Kana luzingu ya mama to ya mwana kele na kigonsa, yo ke pesa ve bantu nswa ya kubasisa divumu. Kana na ntangu ya kubuta yo ke lomba nde bo gulusa muntu mosi mama to mwana, bankwelani bo mosi fwete baka desizio. Kansi beto fwete zaba nde, na bansi mingi ya kimvwama, kuyela ya mambu ya kimunganga me salaka nde mambu yai kumonana ve mingi.
^ par. 12 Beto me soba zina.
^ par. 14 Kivuvu ya lufutumuku lenda sadisa muntu na kuvanda na ngemba ya kati. Tala “Bangiufula ya Batangi” na Nzozulu ya Nkengi ya Aprili 1, 2009, yina ke tubila minsiku ya Biblia ya ke monisa kana bana yina me fwaka na mavumu ya bamama na bo ta futumuka to ve.
Nge Lenda Sepela Mpi Ti
BAMVUTU NA BANGIUFULA YA BIBLIA
Inki Biblia Ke Tubaka na Yina Me Tala Kubasisa Divumu?
Luzingu ya muntu ke yantikaka nki ntangu? Keti Nzambi ta lolula muntu yina me basisa divumu?
