Na nzila ya profete Ezekiele, Yehowa zabisaka na ntwala nde bansadi na yandi ta vutuka na Ntoto ya Lusilu, bo ta vukana mpi ta kuma diaka dikanda mosi. Mbikudulu yango monisaka mpi nde, na bilumbu ya nsuka, bantu ta sambila Nzambi na bumosi.

Yehowa zabisaka profete Ezekiele na kusonika na zulu ya banti zole. Yandi lombaka Ezekiele na kusonika na zulu ya nti mosi nde, “Sambu na Yuda mpi sambu na bantu ya Izraele bayina kele ti yandi,” mpi na zulu ya nti ya nkaka nde, “Sambu na Yozefi, kitini ya nti ya Efrayimi, mpi nzo ya mvimba ya Izraele bayina kele ti yandi.” Banti yina zole kumaka “kaka nti mosi” na maboko ya Ezekiele.—Ezekiele 37:15-17.

 “Efrayimi” ke tendula nki? Na makanda kumi ya kimfumu ya nordi ya Izraele, dikanda ya Efrayimi vandaka ti lukumu mingi. Ntotila ya ntete ya kimfumu yina vandaka Yeroboami, muntu ya dikanda ya Efrayimi. (Kulonga 33:13, 17; 1 Bantotila 11:26) Bantu ya dikanda yai vandaka bantekolo ya Efrayimi, mwana ya Yozefi. (Kutanga 1:32, 33) Yakobi sakumunaka Yozefi mingi kuluta bana na yandi ya nkaka. Yo yina “nti ya Efrayimi” vandaka kumonisa makanda kumi ya kimfumu ya nordi. Na mvu 740 na ntwala ya Kristu, bamvula mingi na ntwala nde Ezekiele kubikula, bantu ya Asiria botulaka kimfumu ya nordi ya Izraele mpi nataka Bayuda na kimpika. (2 Bantotila 17:6) Bamvula mingi na nima, bantu ya Babilone nungaka bantu ya Asiria. Ntangu Ezekiele sonikaka mbikudulu yai ya ke tubila banti zole, bantu mingi ya Izraele vandaka kuzinga na babwala ya Babilone.

Na mvu 607 na ntwala ya Kristu, bantu ya Babilone nungaka makanda zole ya kimfumu ya sudi ya Yuda mpi nataka Bayuda na Babilone. Ziku bo nataka mpi bantu yonso yina bikalaka na kimfumu ya nordi ya Izraele. Bantotila ya kimfumu ya sudi vandaka bantu ya dikanda ya Yuda. Banganga-nzambi mpi vandaka kuzinga na Yuda sambu bo vandaka kusala na tempelo na Yeruzalemi. (2 Bansangu 11:13, 14; 34:30) Yo yina, nti ya “Yuda” vandaka kumonisa makanda zole ya kimfumu ya sudi.

Inki ntangu banti yina zole vukanaka? Na mvu 537 na ntwala ya Kristu, ntangu bantu ya nkaka ya kimfumu ya sudi ti ya nordi katukaka na kimpika mpi vutukaka na Yeruzalemi sambu na kutunga diaka tempelo. Bantu ya Izraele vandaka diaka ve ya kukabwana. Bo yonso kumaka diaka kusambila Yehowa kumosi. (Ezekiele 37:21, 22) Profete Yezaya ti Yeremia tubilaka bumosi yai bamvula mingi na ntwala.—Yezaya 11:12, 13; Yeremia 31:1, 6, 31.

Ezekiele bikulaka nde Yehowa ta vukisa bansadi na yandi yonso na lusambu ya kieleka mpi bo ta kuma kimvuka mosi kaka. (Ezekiele 37:18, 19) Keti lusilu yai me lunganaka bubu yai? Ee. Yo yantikaka kulungana na 1919. Na ntwala ya mvula yai, Satana sosaka kukabula bansadi ya Nzambi kimakulu. Kansi na 1919, Nzambi yantikaka kuyidika diaka mambu na bo mpi kumisa bo diaka kimvuka mosi.

Na ntangu yina, bansadi ya Nzambi mingi bakaka dibaku ya kukuma bantotila mpi banganga-nzambi yina ta yala na zulu ti Yezu. (Kusonga 20:6) Bo vandaka bonso nti ya Yuda. Kansi bampangi yina vandaka ti kivuvu ya kuzinga mvula na mvula na ntoto vandaka fioti. Na nima ya bamvula, bampangi yai kumaka mingi kibeni. (Zekaria 8:23) Bo vandaka bonso nti ya Yozefi.

Bubu yai, bimvuka yai zole ke sadila Yehowa kumosi. Bo kele mpi ti Ntotila mosi kaka, Yezu Kristu. Yehowa ke binga bo na mbikudulu ya Ezekiele nde, “nsadi na mono Davidi.” (Ezekiele 37:24, 25) Yezu sambaka Tata na yandi sambu na balongoki nde: “Bo yonso kuvanda muntu mosi, mutindu nge, Tata, nge kele na bumosi ti mono mpi mono kele na bumosi ti nge.” * (Tala noti na nsi ya lutiti.) (Yoane 17:20, 21) Yezu tubaka mpi nde kimvuka ya fioti ya balongoki na yandi yina bo me tulaka mafuta ti ‘mameme na yandi ya nkaka’ ta kuma “kimvuka mosi.” Bo yonso ta landa kaka “ngungudi mosi.” (Yoane 10:16) Mutindu Yezu tubaka, bansadi ya Nzambi yonso bubu yai kele na kimvuka mosi, yo vanda bayina kele ti kivuvu ya kuzinga na zulu to na ntoto!