NA NTANGU ya ntama, bakala yina ke kwela to dibuta na yandi vandaka kupesa bima na dibuta ya bankento kana mabuta yonso zole me ndima makwela yina. Mu mbandu bo vandaka kupesa bima ya ntalu, bambisi to mbongo. Bantangu ya nkaka, bakala yina ke kwela vandaka kusadila dibuta ya bankento kisalu. Mu mbandu, Yakobi ndimaka kusadila papa ya Rashele kisalu bamvula nsambwadi sambu na kukwela Rashele. (Kuy. 29:17, 18, 20) Sambu na nki bo vandaka kusala mpidina?

Carol Meyers muntu mosi ya mayele ke tuba nde: “Bo vandaka kupesa bima na dibuta ya nkento yina bo ke kwela sambu nkento yina ta salaka diaka ve kisalu na dibuta na bo sambu kisalu yina vandaka mfunu mingi na kisalu [ya bilanga] ya mabuta.” Bima yina bo vandaka kupesa sambu na kukwela nkento lendaka kukumisa mpi ngolo kinduku ya mabuta yina makwela ya bana na bo me vukisa bo. Bantu ya mabuta yina lendaka kusadisana na bantangu ya mpasi. Diaka, bima yina bo vandaka kupesa vandaka kumonisa kibeni nde nkento yina me kwela mpi nde bakala na yandi muntu ta kuma kulungisa bampusa na yandi mpi kutanina yandi. Kansi papa na yandi diaka ve.

Bima yina bo vandaka kupesa sambu na kukwela nkento vandaka kutendula ve nde nkento kumaka kima yina bo lenda sumba to yina bo lenda teka. Mukanda mosi (Ancient Israel—Its Life and Institutions) ke tuba nde: “Nsiku yina ya kupesa ntalu ya mbongo to bima yina kele valere mosi ti mbongo yina, na dibuta ya mwana-nkento yina bo ke kwela, vandaka kupesa makwela ya bantu ya Izraele ngindu ya kusumba. Kansi yo ke monana nde [mbongo yina] bo vandaka kupesa na dibuta ya mwana-nkento vandaka kumonisa nde bo me pesa kima mosi sambu na kuyingisa mwana-nkento yina na dibuta na bo kansi ve sambu na kusumba yandi.”

Bubu yai mpi na bansi ya nkaka, bantu ke pesaka bima na dibuta ya mwana-nkento yina bo ke kwela. Bibuti yina kele Bakristu ke zolaka nde ‘bantu yonso kuzaba kikalulu na bo ya kuvanda ve makambu ngolo.’ Yo yina bo ke vandaka bukati-kati ntangu bo ke lombaka bima ya makwela. (Bafil. 4:5; 1 Bak. 10:32, 33) Bo ke lutisaka ve ndilu, bo ke monisaka nde bo ‘ke zolaka ve mbongo’ mpi bo ke vandaka ve lukasi. (2 Tim. 3:2) Diaka, kana bibuti yina kele Bakristu ke lutisa ve ndilu na mbongo to na bima ya makwela yina bo ke lomba, yo ta pusa ve bakala yina ke kwela mwana na bo na kupusa dati ya makwela tii ntangu yandi ta zwa mbongo ya bo ke lomba. To kana yandi kele mupasudi-nzila, yo ta lomba ve nde yandi bika kisalu ya kimupasudi-nzila sambu na kusosa kisalu mpi kuzwa mbongo mingi ya makwela ya bo ke lomba yandi.

Na bansi ya nkaka, leta muntu ke tulaka ntalu ya mbongo ya makwela. Kana yo kele mutindu yina na nsi na beno, bibuti yina kele Bakristu fwete zitisa nsiku yina. Sambu na nki? Sambu Ndinga ya Nzambi ke lomba Bakristu na “kulemfuka na bamfumu ya nene” mpi na kulemfuka na bansiku ya ke fwa ve bansiku ya Nzambi.—Bar. 13:1; Bis. 5:29.