KANA nkwelani mosi me sala bizumba, yo ke pesaka mpasi kibeni. Ya kieleka, bankwelani ya nkaka me lolulaka nkwelani yina me balula ntima mpi bo me salaka bikesa sambu na kukumisa diaka kinduku na bo ngolo. * Yo vanda makwela ta fwa to ve, banzikisa ke monisa nde nkwelani yina me zaba nde nkwelani na yandi me sala bizumba, ke niokwamaka mingi kibeni. Inki mutindu bankwelani yai lenda nunga bampasi yai?

Ata yo ke pesaka mpasi mingi, bankwelani mingi yina me sala ve ata kima me bakaka kikesa na Biblia. Bo me zabaka nde Nzambi ke monaka kudila na bo mpi ke kuditulaka na kisika na bo.—Malaki 2:13-16.

“Ntangu basusi lutilaka mono, nge pesaka mono kikesa mpi nge lembikaka mono.”—Nkunga 94:19.

Bill ke tuba nde: “Ntangu mono tangaka verse yai, mono bakisaka nde Yehowa ke lembikaka mono na zola yonso mutindu tata ya mawa ke salaka yo na mwana na yandi.”

“Na muntu ya kwikama, nge ke salaka mambu na kwikama.”—Nkunga 18:25.

Carmen, yina bakala na yandi salaka bizumba bangonda mingi, ke tuba nde: “Bakala na mono vandaka ve ya kwikama. Kansi mono tulaka ntima nde Yehowa ta vanda ya kwikama na mono. Yandi ta yambula mono ve ata fioti.”

“Beno kudiyangisa ve sambu na konso kima yina, kansi na mambu yonso na nzila ya kisambu mpi ntangu beno ke bondila . . . beno zabisa Nzambi mambu ya beno ke lomba; ebuna ngemba ya Nzambi yina me luta mayele yonso ya kubakisa mambu ta tanina bantima na beno.”—Bafilipi 4:6, 7.

Sasha ke tuba nde: “Mono tangaka baverse yai mbala na mbala. Mpi sambu mono sambaka mingi, Nzambi sadisaka mono na kuvanda na ngemba.”

Bantu yai yonso ya beto me tubila zolaka kuyambula bantangu ya nkaka. Kansi bo tulaka ntima na Yehowa Nzambi mpi bo vandaka kutanga Biblia sambu na kubaka kikesa. Bill ke tuba nde: “Lukwikilu na mono sadisaka mono na kuvanda na kiese ntangu mambu yonso ya nkaka vandaka kutambula mbote ve. Ata mono tambulaka ‘na muwanda ya mpimpa ya ngolo,’ Nzambi vandaka ti mono.”—Nkunga 23:4.