Biblia kele ti masolo mingi ya babakala ti bankento yina kutanaka mpi ti mambu ya mpasi. Kana beto tanga masolo ya luzingu na bo, beto lenda mona muntu mosi yina Biblia ke tubila yina vandaka mpi kudiwa bonso beto.

Beto yonso ke zolaka nde bantu kubakisa mutindu beto ke kudiwaka. Yo kele kibeni masonga mingimingi ntangu ya beto ke nwana ti maladi ya kuniokwama na mabanza. Ntangu beto ke tanga masolo ya bantu yina Biblia ke tubilaka, beto ke monaka nde bo mpi vandaka kuyindula mpi kudiwa bonso beto. Beto ke bakisaka nde beto kele ve beto mosi ya ke bela maladi yai mpi beto ke bakisaka nde bantu ya nkaka mpi niokwamaka na maladi yai.

• Biblia me fuluka ti mambu ya bantu ya vandaka kudimona mfunu ve mpi ya vandaka ve ti kivuvu tubaka. Keti nge me kuditubilaka dezia nde, ‘Mono ke wa diaka ve nzala ya kuzinga’? Moize, Eliya mpi Davidi tubaka yo.​—Kutanga 11:14; 1 Bantotila 19:4; Nkunga 55:4.

• Biblia ke tubilaka nkento mosi na zina ya Ana yina vandaka “kudiyangisa mingi kibeni” sambu yandi vandaka kubuta ve mpi mbanda na yandi vandaka kuseka yandi ngolo.​—1 Samuele 1:6, 10.

• Biblia ke tubila mbandu ya Yobi. Mbala ya nkaka nge ke kutana ti mambu yina yandi kutanaka ti yo. Yandi vandaka kukwikila na Nzambi, yandi niokwamaka na mabanza mpi kilumbu mosi yandi tubaka nde: “Mono ke menga luzingu na mono; mono ke zola ve kulanda kuzinga.”​—Yobi 7:16.

Kana beto me longuka mutindu bantu yai ya Biblia ke tubila nwanaka ti basusi to bangindu ya mbi, yo ta sadisa beto mpi na kubaka kikesa ya kunwana ti basusi ya ke yangisa beto bubu yai.