Beto yindulaka nde yo kele mpidina sambu na mambu yina kele na Baebreo 12:16. Verse yai ke tuba nde Ezau “zitisaka ve bima ya santu” mpi “tekaka banswa na yandi ya mwana-ntete [na Yakobi] sambu na madia.” Beto yindulaka nde Yakobi kumaka na ndonga ya bantu yina basisaka Mesia sambu yandi bakaka ‘banswa ya mwana-ntete.’—Mat. 1:2, 16; Luka 3:23, 34.

Kansi, bansosa ya mudindu ya disolo yai ke monisa nde yo lombaka ve kaka nde muntu kuvanda mwana-ntete sambu na kuvanda nkaka ya Mesia. Banzikisa yai ke ndimisa yo:

Rubeni vandaka mwana-ntete ya Yakobi (Izraele), mwana yina yandi butaka ti Lea. Na nima, Yakobi ti Rashele, nkento yina yandi vandaka kuzola mingi, butaka Yozefi, mwana na bo ya ntete. Ntangu Rubeni salaka kifu, banswa ya mwana-ntete kumaka na Yozefi. (Kuy. 29:31-35; 30:22-25; 35:22-26; 49:22-26; 1 Bans. 5:1, 2) Kansi na ndonga ya bantu ya Izraele yina basisaka Mesia, Rubeni mpi Yozefi kele ve na kati. Kansi Mesia basikaka na dikanda ya Yuda, mwana ya iya ya Yakobi ti Lea.—Kuy. 49:10.

Luka 3:32 ke tubila ndonga tanu ya ba-nkaka ya Mesia. Ziku bo yonso vandaka bana-ntete.  Mu mbandu Boazi butaka Obedi mpi Obedi butaka Yese.—Ruti 4:17, 20-22; 1 Bans. 2:10-12.

Kansi Davidi, mwana ya Yese, vandaka ve mwana-ntete. Yandi vandaka mwana-nsuka na bana nana ya Yese. Ata mpidina Mesia butukaka na ndonga ya bana ya Davidi. (1 Sam. 16:10, 11; 17:12; Mat. 1:5, 6) Mutindu mosi ti mwana na yandi Salomo, yina vandaka na ndonga ya ba-nkaka ya Mesia, kansi yandi vandaka ve mwana-ntete.—2 Sam. 3:2-5.

Yo ke tendula ve nde kuvanda mwana-ntete vandaka ve mfunu. Mwana-Ntete vandaka ti lukumu mpi vandaka mfumu ya zole ya dibuta. Yandi mpi muntu vandaka kubaka makabu zole na bimvwama ya bibuti.—Kuy. 43:33; Kul. 21:17; Yoz. 17:1.

Kansi mwana-ntete lendaka mpi kuvidisa banswa na yandi. Abrahami pesaka ve banswa ya mwana-ntete na Ismaele, kansi na Izaki. (Kuy. 21:14-21; 22:2) Mutindu beto me mona yo, na dibuta ya Yakobi, banswa ya mwana-ntete vandaka ve na Rubeni kansi na Yozefi.

Beto vutukila ntangu yai Baebreo 12:16, ya ke tuba nde: “Beno keba sambu na kati na beno yo vanda ve ata ti muntu ya ke salaka pite to konso muntu yina ke zitisaka ve bima ya santu, bonso Ezau, yina tekaka banswa na yandi ya mwana-ntete sambu na madia.” Verse yai ke zola mpenza kutuba nki?

Ntumwa Polo vandaka ve kutubila ndonga ya ba-nkaka ya Mesia. Yandi vandaka kulomba Bakristu na “kusungika banzila ya makulu na [bo].” Sambu pite lenda kanga muntu nzila ya “kubaka ntima ya mbote ya nene ya Nzambi.” (Baeb. 12:12-16) Kana yandi sala mutindu yina, yandi ta vanda bonso Ezau, yina “zitisaka ve bima ya santu” mpi kudipesaka kibeni na mambu ya kinsuni.

Ezau zingaka na bilumbu yina bantu vandaka kupesa bimenga, ziku yandi mpi vandaka ti dibaku ya kupesa kimenga. (Kuy. 8:20, 21; 12:7, 8; Yobi 1:4, 5) Kansi sambu bangindu ya Ezau vandaka na mambu ya kinsuni, yandi tekaka banswa na yandi ya mbote ya kimpeve sambu na madia. Mbala ya nkaka yandi sosaka kuditanina na bampasi yina Biblia tubaka na ntwala nde yo ta kumina bana ya Abrahami. (Kuy. 15:13) Ezau monisaka nde bangindu na yandi kele na mambu ya kinsuni ntangu yandi kwelaka bankento zole yina vandaka ve bansadi ya Yehowa, yo pesaka bibuti na yandi mpasi mpi yo monisaka nde yandi ke baka ve na mbalu mambu ya kimpeve. (Kuy. 26:34, 35) Yakobi vandaka ve bonso Ezau, yandi salaka bikesa sambu na kukwela nkento yina kele nsadi ya Yehowa.—Kuy. 28:6, 7; 29:10-12, 18.

Inki beto lenda tuba sambu na ndonga ya ba-nkaka ya Yezu, Mesia? Bantangu ya nkaka, dibaku yango vandaka na bana-ntete, kansi bankaka na kati na bo mpi vandaka ve bana-ntete. Bayuda zabaka mambu yai mpi bo ndimaka yo, bo ndimaka nde Mesia butukaka na ndonga ya bantekolo ya Davidi, mwana-nsuka ya Yese.—Mat. 22:42.