MAMBU YINA BANTU KE TUBAKA

Bantu mingi ke tubaka nde kubula bansaka ya mbongo kele ve mbi kana nsiku ke buyisa yo ve. Bansaka ya nkaka ya mbongo yina nsiku ke ndimaka mu mbandu loteri, ke kotisaka mbongo mingi sambu na mambote ya bantu yonso ya insi.

MAMBU YINA BIBLIA KE TUBAKA

Biblia ke tubilaka ve bansaka ya mbongo. Kansi yo ke vandaka ti minsiku yina ke sadisaka beto na kuzaba mutindu Nzambi ke tadilaka kubula bansaka ya mbongo.

Kana bantu ke bula bansaka ya mbongo, bo ke sosaka kaka kudia bantu ya nkaka mbongo. Kusala mambu mutindu yai ke wakanaka ve ti lukebisu ya Biblia yina ke lombaka beto na ‘kukeba na mitindu yonso ya lukasi.’ (Luka 12:15) Ya kieleka, lukasi ke pusaka bantu na kubula bansaka ya mbongo. Na bisika yina bo ke budisaka bansaka ya mbongo, bo ke songaka bantu kaka nde bo ta nunga mpi nde bo ta baka mbongo mingi kansi bo ke songaka bo ve ata fioti nde shanse ya kununga ke vandaka fioti. Bo ke salaka mutindu yai sambu bo ke zabaka nde nzala ya kukuma bamvwama ta pusa bantu na kubasisa mbongo mingi sambu na kubula bansaka yina. Bansaka ya mbongo ke sadisaka ve bantu na kuyambula lukasi kansi yo ke pusaka bo na kukuma ti nzala ya kuzwa mbongo kukonda kusala ata kima.

Kubula bansaka ya mbongo ke pusaka bantu na kusosa kaka mambote na bo mosi sambu bantu ya ke bulaka yo ke sosaka kaka kununga mpi kudia bantu ya nkaka mbongo. Kansi Biblia ke tubaka nde konso muntu “kulanda na kusosa, mambote na yandi mosi ve, kansi ya muntu ya nkaka.” (1 Bakorinto 10:24) Diaka, nsiku mosi na kati ya Bansiku Kumi ya Nzambi ke tuba nde: “Nge fwete yuma ve ntima . . . sambu na konso kima ya nkweno na nge.” (Kubasika 20:17) Mutindu muntu ya ke bula bansaka ya mbongo ke zolaka kaka kununga, yandi ke zolaka kaka nde bantu ya nkaka kuvidisa mbongo na bo sambu yo kuma ya yandi.

Biblia ke kebisa beto mpi sambu beto bwa ve na mutambu ya kukwikila nde nzambi ya Menga ya Mbote (shanse) ke natilaka bantu balusakumunu. Na Izraele ya ntama, bantu ya nkaka vandaka kukwikila diaka ve na Nzambi mpi bo kumaka ‘kuyidika mesa sambu na nzambi ya Menga ya Mbote.’ Keti Nzambi vandaka kundima mambu yai ya bo vandaka kusala sambu na “nzambi ya Menga ya Mbote”? Ve, yandi songaka bo nde: “Beno landaka kusala mambu ya mbi na meso na mono, mpi beno [ponaka] mambu yina vandaka kupesa mono ve kiese.”—Yezaya 65:11, 12.

Ya kieleka na bansi ya nkaka, Leta ke sadilaka mbongo ya bansaka yina nsiku ke ndimaka na mambu ya banzo-nkanda, sambu na kusadisa bisalu ya insi mpi bisalu mingi ya nkaka sambu na mambote ya bantu yonso. Ata mpidina, beto vila ve nde bo ke zwaka mbongo yai kaka na nzila ya bisalu yina ke pusaka bantu na kukuma ti lukasi, na kusosa kaka mambote na bo mosi mpi na kuyindula nde bo lenda zwa mbongo kukonda kusala ata kima.

“Nge fwete yuma ve ntima . . . sambu na konso kima ya nkweno na nge.”—Kubasika 20:17.

MAMBU YINA BIBLIA KE TUBAKA

Biblia ke tubaka nde “bantu yina kele ti lukanu ya ngolo ya kukuma bamvwama ke bwaka na mpukumuna, na mutambu, mpi na banzala ya buzoba ti ya mbi yina ke nataka bantu na lufwa mpi na kubeba.” (1 Timoteo 6:9) Lukasi ke pusaka bantu na kubula bansaka ya mbongo. “Lukasi” kele kibeni kigonsa. Yo yina Biblia ke tulaka yo na liste ya mambu mingi yina beto fwete buya kibeni.—Baefezo 5:3.

Bansaka ya mbongo ke pusaka bantu na kuyindula nde bo lenda zwa mbongo kukonda kusala ata kima. Yo yina, yo ke kunaka bo zola ya mbongo yina kele “kele musisa ya mambu ya mbi ya mitindu yonso” mutindu Biblia ke tubaka. Nzala ya kuvanda ti mbongo mingi lenda kuma ngolo na luzingu ya muntu mpi kubebisa kinduku na yandi ti Nzambi. Biblia ke tubaka nde bantu yina ke zolaka mbongo ke “kuditobulaka ti bampasi mingi.”—1 Timoteo 6:10.

Nzala ya kukuma ti bima mingi ke manisaka kiese ya muntu mpi ke pusaka yandi na kusepela ve ti bima yina yandi kele na yo. Biblia ke tuba nde: “Muntu yina ke zolaka arza ta fulukaka ve arza ata fioti, mpi muntu yina ke zolaka kimvwama ta fulukaka ve lufutu.”—Longi 5:10.

Bantu mingi kibeni ya ke bulaka bansaka ya mbongo me kudikumisaka bampika na yo. Barapore ya nkaka ke monisa nde kaka na États-Unis, bantu mingi kibeni me kumaka bampika ya bansaka ya mbongo.

Kingana mosi ke tuba nde: “Dikabu yina muntu bakaka ntete na lukasita vanda ve lusakumunu na nsuka.” (Bingana 20:21) Kubula bansaka ya mbongo me salaka nde bantu ya nkaka kudikotisa na bamfuka to nkutu bo kudinatila bampasi. Yo me katudisaka bantu mingi na bisalu mpi yo me fwisaka makwela na bo mpi nkutu yo me fwisaka kinduku na bo ti bantu ya nkaka. Kana beto ke sadila mambu yina Biblia ke tubaka, beto ta zinga na kiese mpi ta kutana ve ti bampasi yina kubula bansaka ya mbongo ke nataka.

“Bantu yina kele ti lukanu ya ngolo ya kukuma bamvwama ke bwaka na mpukumuna, na mutambu, mpi na banzala ya buzoba ti ya mbi yina ke nataka bantu na lufwa mpi na kubeba.”—1 Timoteo 6:9.