Beto kele na kiese ya kusonga beno nde Yehowa sakumunaka bansadi na yandi ya Ukraine. Yandi salaka nde bampangi na beto ya babakala mpi ya bankento ya kele na nsi yai kusala Nkinsi ya Kuyibuka Lufwa ya Kristu. Bampangi yidikaka Banzo ya Kimfumu mingi na westi ya Ukraine sambu bampangi-babakala mpi bankento yina tinaka bitumba kusala Nkinsi ya Lukutakanu ya Lufwa ya Yezu kuna. Bampangi salaka nkinsi yai mingi-mingi na bimvuka ya fioti. Bo sadisaka bampangi yina lendaka ve kuyambula banzo na bo sambu na nkinsi yai na kulanda yo na nzila ya video.

Na babwala mingi ya insi Ukraine, baapareyi yina ke tulaka makelele sambu na kusonga bantu nde basoda ke zola kulosa babombe vandaka kutula makelele kilumbu ya mvimba na kilumbu ya Nkinsi ya Kuyibuka Lufwa ya Yezu. Ntangu nkokila bwaka, baapareyi yina bikaka kutula makelele. Serhiy ke zingaka na Droujkivka na Donetsk. Yandi ke tuba nde: “Beto sambaka sambu Nkinsi ya Kuyibuka Lufwa ya Yezu kuzengana ve sambu na babombe. Ntangu fioti na ntwala nde Nkinsi ya Kuyibuka Lufwa ya Yezu kuyantika, makelele ya babombe zenganaka mpi makelele ya baapareyi yina ke tulaka makelele sambu na kusonga bantu nde basoda ke zola kulosa babombe zenganaka.”

Kimvuka mosi ya bampangi ya minunu mpi ya kele ti bifu na nitu ya kele na Nemichaïeve pene-pene ti Kiev, salaka ngonda kuluta mosi kukonda kuzwa mpila ya kukwenda ata na lukutakanu mosi ya dibundu. Bo vandaka kusamba sambu bo vukana ti bampangi na Nkinsi ya Kuyibuka Lufwa ya Yezu. Vitaliy kele nkuluntu. Yandi sadisaka kimvuka mosi na kusala Nkinsi ya Kuyibuka Lufwa ya Yezu. Yandi ke tuba nde: “Kura vandaka ve. Yo yina beto salaka Nkinsi ya Kuyibuka Lufwa ya Yezu ti nsemo ya batorshe. Beto vandaka ve ti kima yina ke tulaka tiya na nzo (chauffage). Beto tulaka ve miziki. Yo yina mwana na mono ya nkento vandaka kubula kidare (violon) sambu na kusadisa beto na kuyimba.”

Oleksandr kele nkuluntu. Yandi ke zingaka kisika yina bitumba ke salama. Yandi ke tuba nde: “Ntangu beto vandaka kukabula emvitasio ya Nkinsi ya Kuyibuka Lufwa ya Yezu, beto lendaka ve kusonikila bantu ya teritware ya dibundu na beto mikanda sambu banzo bebaka na babombe mpi bankwa na yo yambulaka yo. Ata mpidina, beto bingisaka bantu yina beto me zaba, bantu yina beto kutanaka ti bo na nsi ya ntoto ya banzo, mpi bantu yina beto tinaka ti bo nzila mosi. Bantu mingi ya beto kutanaka ti bo me solulaka ntete ve ti Bambangi ya Yehowa. Bamingi na kati na bo vukanaka ti beto na Nkinsi ya Kuyibuka Lufwa ya Yezu.”

Beto kele ntete ve ti bantalu yonso ya mabundu yonso ya insi Ukraine. Ata mpidina, beto me zaba nde bantu kuluta 210 000 vukanaka na Nkinsi ya Kuyibuka Lufwa ya Yezu.

Mpangi na beto mosi ya bakala na insi Ukraine tubaka mambu yai sambu na kupesa mersi sambu na Nkinsi ya Kuyibuka Lufwa ya Yezu. Yandi tubaka nde: “Kaka mutindu mwinda ya maswa ke sadisaka muntu yina ke tambusaka maswa na kundima nde bo me kuma pene-pene ya dibungu, Nkinsi ya Kuyibuka Lufwa ya Yezu ke ndimisa beto nde kilumbu ya Yehowa kele diaka ve ntama. Nkinsi ya Kuyibuka Lufwa ya Yezu me kumisa lukwikilu mono diaka ngolo.”

Na Kiya 21 avril 2022, bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bansamuni 35 me fwa

• Bansamuni 60 me lwala

• Bansamuni 43 729 me yambula banzo na bo sambu na kukwenda na bisika yina bitumba kele ve

• Banzo 374 ya bampangi me beba

• Banzo 347 ya bampangi me beba ngolo

• Banzo 874 ya bampangi me beba ve ngolo

• Nzo ya Kimfumu 1 me bwa

• Banzo ya Kimfumu 10 me beba ngolo

• Banzo ya Kimfumu 27 me beba ve ngolo

• 27 Komite ya Ke Sadisaka Bantu Yina Me Bwila Mpasi ke sadisa bampangi na Ukraine

• Bansamuni 44 971 me baka lusadisu ya Bakomite yina sambu na kuzwa bisika ya kuvanda na bisika yina bitumba kele ve

• Bansamuni 19 961 me tina na bansi ya nkaka. Bampangi na bo Bambangi ya Yehowa ke sadisa bo kuna