Na Kitatu 25 mai 2022, mpangi Dennis Christensen kumaka mbote na Danemark. Bo basisaka yandi na boloko kilumbu mosi na ntwala mpi bo kulaka yandi mbala mosi na insi Russie. Yandi salaka bamvula tanu na baboloko ya mutindu na mutindu.

Mpangi Dennis tubaka nde: “Mono kele na kiese ya kubasika na boloko mpi ya kuzinga diaka kisika mosi ti nkento na mono Irina ya mono ke zolaka mingi. Lusadisu mpi kikesa yina bampangi ya ntoto ya mvimba vandaka kupesa mono vandaka dikabu ya Yehowa. Mono ke landa kusamba sambu na bampangi na mono ya babakala ti ya bankento ya kikesa yina bo ke niokula mpi ke tula na boloko sambu na lukwikilu na bo.”

Banduku mpi bampangi ya mabuta ya mpangi Dennis ti mpangi Irina ke sadila Biblia sambu na kupesa bo kikesa mpi ke pesa bo bima ya nkaka yina bo kele na yo mfunu. Mpangi Dennis ti nkento na yandi ke tuba nde: “Beto kele ti nzala ya ngolo ya kusambila diaka Yehowa na kimpwanza na lweka ya bampangi na beto ya Danemark.”

Bo kangaka mpangi Dennis mpi bo tulaka yandi na boloko na 25 mai 2017 ntangu basoda yina vandaka ti baluse ya kufika, kotaka na ngolo na kisika yina mpangi Dennis ti bampangi ya nkaka vandaka kusala lukutakanu na mbanza Oriol. Bo fundaka mpangi Dennis nde yandi vandaka kusadisa bisalu ya kimvuka mosi ya mubulu yina Tribinale ya Nene ya Russie katukaka kubuyisa bisalu na yo ngonda mosi na ntwala.

Bamfumu ya Russie me tubaka mbala mingi nde na 2017, bo buyisaka kaka bisalu ya dibundu ya Bambangi ya Yehowa ya me zabanaka na Leta, kansi ve nswa yina konso Mbangi ya Yehowa kele ti yo ya kusambila Nzambi. Ata mpidina, kukangama ya mpangi Dennis vandaka luyantiku ya ntangu yina bo bandaka kukanga na kingolo-ngolo Bambangi ya Yehowa mingi ya Russie ti ya Crimée mpi kutula na boloko.

Bubu yai, bampangi ya babakala mpi ya bankento 91 kele kaka na boloko. Beto ke samba sambu Yehowa kulanda kusadisa bampangi yai ya ke sadilaka yandi na ntima ya mvimba mpi sambu yandi sadila bo mambu “na mutindu ya kuswaswana.”—Nkunga 4:3.