Mama mosi na zina ya Desicar ya ke sansaka mwana na yandi ya nkento yandi mosi, vandaka ti nzala ya kulonga diaka mingi nsangu ya mbote mpi ya kukuma mupasudi-nzila ya ntangu yonso. Yandi ke zingaka na insi mosi ya mbongo ke vandaka mpasi. Insi yango kele Vénézuéla. Ata mpidina, yandi vandaka kaka ti lukanu ya kukuma mupasudi-nzila mpi yandi kumaka yo. Yandi vandaka na kiese ya mingi. Kansi maladi ya COVID-19 yantikaka.

 Ntangu maladi yai yantikaka, Desicar vandaka kumona mpasi sambu na kuwakanisa kisalu na yandi ya kulonga nsangu ya mbote ti mutindu mambu kumaka kusalama na ntangu yina. Yandi vandaka ve kukuka kusonika mikanda. Diaka, yandi lendaka ve kusadila vidéoconférence na kisalu ya kulonga sambu Internet ke vandaka ntalu mingi na kisika ya yandi ke zingaka. Yandi ke tuba nde: “Mono lembaka nitu. Na mbala mosi, mono lendaka diaka ve kusala kisalu ya kulonga mutindu mono vandaka kusala yo ntete. Mono yindulaka nde mono ta vanda diaka ve mupasudi-nzila mosi ya me zaba mbote kisalu na yandi.”

 Na nima, na janvier 2021, Betele ya Bambangi ya Yehowa ya Vénézuéla yidikaka mambu sambu na kusala kampanie mosi ya sipesiali ya kisalu ya kulonga nsangu ya mbote. Bo yidikaka mambu sambu kiteso ya baradio 60 mpi batelevezio 7 kulutisa badiskure ya bantu yonso ya me katuka na Biblia na bilumbu ya bamposo tanu ya ngonda yina. Bo lombaka Bambangi ya Yehowa na kubingisa bantu yina me zola na kulanda badiskure yango. Betele pesaka mpi bampangi-babakala mpi bankento bangiufula mpi baverse ya Biblia ya konso diskure. Mpidina, bo lenda sadila yo na mikanda yina bo vandaka kusonika sambu na kutindila bantu mpi na ntangu bo ke binga bantu na telefone. Diaka, Betele lombaka bampangi na kusadila ba message ya telephone sambu na kulonga. Kusala mutindu yai vandaka metode ya mpa sambu na Bambangi mingi ya Yehowa ya Vénézuéla.

 Desicar vandaka kuvingila na kiese yonso ntangu yina ya kampanie. Ata yandi me bikaka ntete ve kusadila ba message ya telefone na kisalu na yandi, yandi bakaka lukanu ya kumeka. Yandi vandaka ti mfunu ya lusadisu. Yandi ke tuba nde: “Mono ke kukaka ve kusadila teknolozi.” Yandi lombaka mwana na yandi ya nkento na kusadisa yandi. Mwana na yandi longaka yandi mutindu ya kusadila yo, ebuna Desicar lendaka sesepi kupesa maboko na kampanie yina.

 Yandi tindilaka bantu mingi ya yandi me zabana ti bo ba message na telefone sambu na kulomba bo na kulanda badiskure yina bo kotisaka dezia ndinga. Yandi yitukaka mingi na kumona mbuma yina yo butaka. Bantu mingi ya yandi sonikilaka landaka badiskure yina mpi bo yulaka yandi bangiufula. Bantu ya nkaka landaka ve badiskure yina kansi bo yulaka Desicar inki bo tubilaka na badiskure yango. Desicar ke tuba nde: “Mono sonikaka bunkufi ya mambu yina mono bakaka na banoti na mono mpi mono kabisaka bangindu yina ti bo. Mono me bikaka ntete ve kusala bamvutukilu ya mpa 5 na ngonda mosi, kansi na nsuka ya kampanie yai, mono salaka bamvutukilu ya mpa 112!” a

 Desicar lombaka mpi mpangi na yandi ya nkento ya kele ve Mbangi ya Yehowa ya ke zingaka pene-pene ti yandi na kulanda badiskure yina na radio. Desicar ke tuba nde: “Yandi ndimaka. Mono yitukaka mingi kibeni. Konso Lumingu na ngunga ya nana na suka, mono vandaka kukwenda kukuta yandi na nzo na yandi, mpi beto vandaka kulanda badiskure kisika mosi. Yandi vandaka ti bangiufula mingi ntangu badiskure vandaka kusalama mpi na nima.” Mpangi yai ya Desicar ya nkento vukanaka mpi na Nkinsi ya Kuyibuka Lufwa ya Yezu na nzila ya vidéoconférence, mpi yandi pesaka Desicar nswa ya kusadila Internet na yandi sambu na kulonga nsangu ya mbote.

 Desicar ke tuba nde: “Mono ke pesa Yehowa mersi mingi. Mono ke pesa mpi bankuluntu ya dibundu na beto mersi mingi sambu bo pesaka mono kikesa mingi. Bo sadisaka mono na kuwa diaka kiese ya kulonga nsangu ya mbote.” (Yeremia 15:16) Desicar kele kaka mupasudi-nzila ya ntangu yonso mpi yandi ke landa kusolula ti bantu yina yandi sonikilaka ba message mpi ya monisaka mpusa.