Bambangi ya Yehowa yina ke zingaka na Bulgarie ke salaka mambu mingi na kisalu ya Nzambi: bo ke longaka bantu ya nkaka mambu ya Nzambi mpi ya Ndinga na yandi, Biblia. Banda na mvu 2000, Bambangi ya Yehowa mingi ya ke zingaka na bansi ya nkaka kwendaka na Bulgarie sambu na kupesa Bambangi ya Yehowa ya ke zingaka kuna maboko. Inki mambu ya mpasi bo kutanaka ti yo na insi yai ya bo vandaka banzenza? Sambu na nki yo lombaka nde bo kanga ntima na bampasi yina? Beno wa mambu yina bampangi yina kwendaka kuzinga na Bulgarie ke tuba.

 Darren vandaka kuzinga na Angleterre. Yandi ke tuba nde: “Beto vandaka kaka ti lukanu ya kukwenda kusadila Yehowa na kisika yina mpusa ya kulonga nsangu ya mbote vandaka mingi. Na nima ya makwela na beto, mono ti Dawn, beto kwendaka na Londres sambu na kulonga bantu yina ke tubaka ndinga Russe Biblia. Mbala mingi, beto vandaka kuyilama sambu na kukwenda na insi ya nzenza kansi beto vandaka ve kukuka kukwenda sambu na bikuma ya mutindu na mutindu. Beto yambulaka ngindu yina, kansi na nima, nduku mosi sadisaka beto na kubakisa nde luzingu na beto sobaka mpi nde lukanu na beto yina, beto lenda lungisa yo.” Darren ti Dawn sosaka insi mosi yina mpusa ya bantu ya ke longaka Biblia vandaka mingi mpi yina bo lenda kwenda kuzinga kukonda mpasi. Yo yina na 2011, bo kwendaka na Bulgarie.

 Bampangi yina ke vandaka ve ti nzala ya kukwenda na insi ya nzenza sambu na kulonga nsangu ya mbote lenda baka kikesa na mbandu ya bampangi yina me kwendaka na bisika ya nkaka na ntoto mpi na kiese yina bo waka. Giada ti bakala na yandi Luca vandaka kuzinga na Italie. Yandi ke tuba nde: “Mono kutanaka ti bampangi-bankento ya kikesa yina vandaka na kiese ya kulonga nsangu ya mbote na Amérique du Sud mpi na Afrika. Kumona kiese ya bo vandaka ti yo mpi kuwa mambu ya bo kutanaka ti yo na kisalu ya kulonga simbaka kibeni ntima na mono. Yo sadisaka mono na kutadila diaka balukanu na mono na kisalu ya Yehowa.”

 Na 2015, Tomasz ti Veronika yambulaka insi Tchéquie sambu na kukwenda kuzinga na Bulgarie ti bana na bo zole Klara ti Mathias. Inki pusaka bo na kukwenda kuzinga na insi yina? Tomasz ke tuba nde: “Beto tadilaka mbote-mbote mbandu ya bampangi-babakala mpi bankento yina kwendaka na insi ya nkaka, bampangi ya dibuta na beto mpi vandaka na kati ya bampangi yina, mpi beto yindulaka mambu yonso yina bo kutanaka ti yo kuna. Kiese ya bo vandaka ti yo yitukisaka beto mpi beto tubilaka yo na dibuta.” Bantu ya dibuta yai ke longa sesepi nsangu ya mbote na teritware na bo ya mpa na Bulgarie na mbanza Montana.

 Mpangi-nkento Linda mpi kwendaka kuzinga na Bulgarie. Yandi ke tuba nde: “Bamvula me luta mingi banda mono kwendaka na Équateur mpi ya mono kutanaka ti bansamuni ya babakala mpi ya bankento yina kwendaka kuna sambu na kulonga nsangu ya mbote. Yo pusaka mono na kuyindula nde kele ti kilumbu yina mono mpi, mono ta kwenda kulonga nsangu ya mbote na kisika yina mpusa ya bansamuni kele mingi.” Petteri ti Nadja kele bankwelani. Bo ke zingaka na Finlande. Bo mpi, bo tadilaka mbandu ya bampangi yina kwendaka kuzinga kisika ya nkaka. Bo tubaka nde: “Na dibundu yina beto vandaka ntete, beto vandaka ti bansamuni ya eksperiansi yina kwendaka kulonga nsangu ya mbote na bisika ya nkaka. Bo vandaka kutubila ntangu yonso ti kiese bamvula yina bo salaka kuna. Bo vandaka kutuba nde yo vandaka bamvula ya kuluta mbote na luzingu na bo.”

 Kuyidika mambu na ntwala kele mfunu mingi sambu na bampangi yina ke zola kukwenda kusadila Yehowa na insi ya nzenza. (Luka 14:28-30) Nele katukaka na Belgique. Yandi ke yibuka nde: “Ntangu mono yantikaka kutala kana yo ke lomba nde mono kwenda kulonga nsangu ya mbote na insi ya nkaka, mono sambaka mpi mono salaka bansosa na mikanda na beto sambu na kuzwa masolo ya ke tubila diambu yai. Mono longukaka yo mpi mono monaka mambu yina yo lombaka nde mono sala sambu na kuvanda ya kuyilama na kukwenda.”

 Kristian ti Irmina katukaka na Pologne. Bo ke zingaka na Bulgarie yai bamvula uvwa. Bo bakisaka nde yo vandaka kibeni mfunu nde bo vanda na kimvuka mosi ya ke salaka balukutakanu na ndinga yina bo ke tubaka na Bulgarie, na insi Pologne na ntwala ya kukwenda. Yo pesaka bo kikesa mingi mpi yo sadisaka bo na kulonguka ndinga yango. Kristian ti Irmina tubaka nde: “Beto bakisaka nde kana beto kwenda kusadila Yehowa kisika ya nkaka, yandi ta lungisa bampusa na beto. Yo kele diambu mosi ya mbote kibeni. Kana nge songa Yehowa nde: ‘Mono yandi yai! Tinda mono!,’ nge lenda sala mambu yina nge yindulaka nkutu ve.”—Yezaya 6:8.

 Reto ti Cornelia katukaka na Suisse. Bo bakaka lukanu ya kukuma kuzinga na mutindu ya kukonda mindondo sambu bo bumba mbongo mpi bo yilama sambu na kukwenda kulonga na Bulgarie. Bo ke tuba nde: “Mvula mosi na ntwala nde beto katuka na insi na beto, beto kwendaka na Bulgarie mpi beto salaka mposo mosi sambu beto zaba kana luzingu na beto ta vanda nki mutindu kuna. Kuna, beto solulaka ti mpangi-bakala mosi ti nkento na yandi. Bo vandaka bamisionere. Bo vandaka ti eksperiansi mingi mpi bo pesaka beto bandongisila ya mbote.” Reto ti Cornelia sadilaka bandongisila yina ya mbote mpi bo me sala bamvula kuluta 20 banda bo kele na Bulgarie.

 Yo ke lombaka nde bantu yina ke kwenda kuzinga na insi ya nzenza kusala bansoba mingi mpi bansoba ya nkaka ke vandaka mpasi. (Bisalu 16:9, 10; 1 Bakorinto 9:19-23) Sambu na bantu mingi, mpasi na bo ya nene ke vandaka kulonguka ndinga ya mpa. Luca yina beto tubilaka dezia ke tuba nde: “Na balukutakanu, beto ke zolaka kupesa bakomantere na bangogo na beto mosi, kansi yantika mwa ntangu, mono ti nkento na mono, yo vandilaka beto mpasi na kuyidika komantere ya fioti na ndinga Bulgare. Yo vandaka bonso nde beto kumaka diaka bana ya fioti. Na masonga yonso, nkutu bana yina butukaka na Bulgarie vandaka kupesa bakomantere mbote kuluta beto.”

 Ravil katukaka na Allemagne. Yandi tubaka nde: “Kulonguka ndinga yina vandaka kulembisa mono. Kansi mono vandaka kaka kutuba nde: ‘Kana nge me sala kifu, kuwa ve nsoni.’ Mono ke bakaka mambu yina lenda kanga mono nzila bonso mambu ya mono fwete kutana ti yo na kisalu ya santu ya mono ke sala sambu na Yehowa kansi ve bonso bampasi.”

 Linda yina beto tubilaka dezia tubaka nde: “Yo ke vandilaka mono mpasi na kulonguka bandinga mpi ndinga Bulgare kele ndinga mosi ya mpasi. Mbala mingi mono vandaka kumona nde mono fwete yambula. Kana muntu ke solula ve ti bantu ya nkaka mpi yandi ke bakisa ve mambu ya bo ke tuba, yandi ke kudiwaka yandi mosi. Sambu kinduku na mono ti Yehowa kulanda kuvanda ngolo, mono ke longukaka mambu yonso na ndinga ya Suède. Nsuka-nsuka, bampangi-babakala mpi bankento sadisaka mono na kulonguka ndinga Bulgare.”

 Kima ya nkaka ya mpasi ke vandaka susi yina bantu ke vandaka ti yo kana bo me kuma na insi ya nzenza. Bantu yina ke kwendaka kuzinga kisika ya nkaka ke bikaka banduku na bo mpi bantu ya mabuta na bo. Eva kwendaka kuzinga na Bulgarie ti bakala na yandi Yannis. Yandi ke tuba nde: “Na luyantiku, mono vandaka kudiwa mono mosi. Kansi sesepi, beto ke solulaka mbala na mbala ti banduku na beto mpi dibuta na beto yina me bikalaka mpi awa beto me kumaka ti banduku ya mpa.”

 Mambu ya nkaka ya mpasi mpi kele. Robert ti Liana katukaka na Suisse. Bo ke tuba nde: “Ndinga mpi mutindu bantu ke zingaka na insi mosi buna vandaka kima ya mpasi sambu na beto. Diaka beto yindulaka ve nde na insi yai madidi ke vandaka mingi kibeni.” Kansi mutindu bo vandaka ti mabanza ya mbote mpi bo vandaka ve bantu ya nsoni-nsoni, bakala yai ti nkento na yandi ke sadilaka Yehowa na Bulgarie banda bamvula 14.

 Lilly ke pesa bampangi yonso yina lenda kwenda kulonga nsangu ya mbote kisika yina mpusa kele mingi kikesa nde bo kwenda. Yandi ke tuba nde: “Kana mono bikalaka na insi na beto, mono zolaka ve kumona lusadisu ya Yehowa na mutindu yai. Awa mono lenda sadisa bantu mingi kuluta mpi yo ke sadisaka mono na kupusana pene-pene ya Yehowa. Mono kele na kiese mingi.” Bakala na yandi Ravil ke ndima mambu yai ya yandi me tuba. Ravil ke tuba nde: “Yai kele luzingu ya kuluta mbote; kuzaba Bakristu ya kikesa ya me katukaka na bansi mingi mpi ya ke longaka Biblia kele dibaku ya mbote kibeni. Mono me longuka mambu mingi na lweka na bo.”

Mpeve ya kuvanda volontere mpi mutindu bampangi mingi ke ndima kisalu yai na luzolo na bo mosi ke sala nde beto longa “nsangu . . . ya mbote ya Kimfumu na ntoto ya mvimba.” (Matayo 24:14) Mpeve ya kudipesa na luzolo yonso salaka nde bampangi yina kwisaka na Bulgarie kubakisa nde Yehowa sadisaka bo na kulungisa mpusa yina vandaka na bantima na bo mpi salaka nde balukanu na bo yonso kulungana.—Nkunga 20:1-4.