Mafunda ya bantu yina kwisaka na Foire internationale ya Rouen 2014, na nordi ya France, monaka kisika ya bo tandaka mikanda yina vandaka kubenda dikebi. Ntu-diambu na yo vandaka, “Biblia—Mazono, Bubu, mpi Mbasi.”

Na ntwala ya kukota na kisika yina, ba écrans plats vandaka kusongisa video mosi ya ke monisa bamaniskri ya ntama ya Biblia mpi yo vandaka kubenda dikebi ya banzenza mingi. Kana bo kuma na kati, banzenza vandaka kulonguka mambu ya me tala bandongisila ya Biblia yina ke sadisaka, mutindu yo kele sikisiki na mambu ya ntama mpi ya siansi, mpi mutindu bo me kabulaka yo mingi.

Bo monisaka diaka mutindu Biblia me zingaka bamvula mingi mpi mutindu bubu yai bamiliare ya batangi kele na yo, ya bo me niema na mitindu yonso mpi na forma yina bo lenda tula na ordinatere, na telefone to na tableti. Banzenza yina bakaka kopi mosi ya Mbalula ya Nsi-Ntoto ya Mpa, mbalula ya Biblia yina Bambangi ya Yehowa me basisaka na bandinga kuluta 120.

Banzenza mingi monisaka ntonda na bo na ngidika yina Bambangi ya Yehowa me bakaka sambu na kupesa bantu yonso Biblia. Nkento mosi ya ke kebaka bana vandaka kutala video yina ti bana ya fioti. Yandi tubaka nde: “Biblia kele na kati ya bimvwama na beto yonso. Yo kele mukanda ya moyo.

Konso ntangu ya mono ke tangaka yo, mono ke bakaka mvutu na bampasi na mono.”

Mama mosi ya bamvula 60 yitukaka ntangu bo songaka yandi nde yandi lenda baka kopi ya Biblia mosi ya ofele. Yandi tubaka nde: “Beto yonso fwete yantika diaka kutanga yo sambu beto yonso kele na mfunu na yo!”