Ee. Bambangi ya Yehowa ke kwikilaka nde Biblia ya mvimba kele ya “kupemama na Nzambi mpi yo kele mfunu.” (2 Timoteo 3:16) Yo ke tadila mpi Kuwakana ya Ntama ti ya Kuwakana ya Mpa, mutindu bo ke bingaka yo. Mbala mingi, Bambangi ya Yehowa ke bingaka bitini yai ya Biblia Masonuku ya Kiebreo mpi Masonuku ya Kigreki ya Bukristu. Kubinga yo mutindu yai ke salaka nde bantu kumona ve nde bitini ya nkaka ya Biblia me manaka ngala to nde yo kele diaka ve mfunu.

 Na nsadisa ya mpeve santu ntumwa Polo, yina vandaka mpi Mukristu, sonikaka nde: “Mambu yonso ya bo sonikaka ntama, bo sonikaka yo sambu na kulonga beto.” (Baroma 15:4) Yo yina, Masonuku ya Kiebreo kele ti mambu ya mfunu sambu na beto. Diaka, Masonuku ya Kiebreo kele ti masolo ya mfunu mpi bandongisila ya mbote.

•   Masolo ya mfunu. Masonuku ya Kiebreo ke tubilaka mpi na pwelele yonso mutindu Nzambi gangaka bima mpi mutindu bantu salaka disumu. Kana bantendula yai vandaka ve, beto zolaka ve kuzwa bamvutu ya mbote ya bangiufula bonso: Beto me katukaka na wapi? Sambu na nki bantu ke fwaka? (Kuyantika 2:7; 17) Diaka, Masonuku ya Kiebreo ke tubilaka mambu yina Yehowa Nzambi sadilaka bansadi na yandi yina vandaka na kiese mpi yina kutanaka ti bampasi bonso beto.​—Yakobo 5:17.

•   Bandongisila ya mbote. Mukanda ya Bingana mpi ya Longi ya kele na kati ya Masonuku ya Kiebreo, kele ti bandongisila ya mayele ya me tala luzingu, mpi bandongisila yango ke manaka ve ngala. Mikanda yai ke pesaka bandongisila sambu na kuvanda ti luzingu ya dibuta ya kiese (Bingana 15:17), sambu na kuvanda ti bukati-kati na mambu ya me tala kisalu (Bingana 10:4; Longi 4:6), mpi sambu baleke kusadila kileke na bo mbote (Longi 11:9–12:1).

 Diaka, kana beto ke tanga Nsiku ya Moize ya kele na Torah (mikanda tanu ya ntete ya Biblia), beto ta bakila yo mambote. Bakristu kele ve na nsi ya Nsiku yina kansi yo kele ti bansiku ya mfunu yina lenda sadisa beto na kuvanda na luzingu ya kiese.​—Levi 19:18; Kulonga 6:5-7.