Na un dia friu i di béntu fórti na Alberta, na Kanadá, Bob staba ta konduzi uns 100 kilómetru pur óra kantu ki dirapenti un róda di tras di se karu rabenta. Bob ka da kónta di kuzê ki kontise, nton el kontinua ta konduzi pa bai se kaza ki ta fikaba sinku kilómetru di undi ki el staba.

 Na un karta ki Bob skrebe pa un kongregason di Tistimunhas di Jeová di kel zóna, el splika kuzê ki kontise dipôs. El skrebe: “Sinku jóven ki staba na un karu, para na nha ladu i es dixi vidru di ses karu. Es fla-m ma róda di nha karu dja rabenta. Nu para karu i es oferese pa troka kel róda. Nen N ka sabia si N tinha un otu róda i un makaku na nha karu. Timenti N sta speraba xintadu na nha kadera di róda na bera di strada, es kanba dibaxu di nha karu, es atxa kel otu róda i kel makaku i es troka-l. Staba txeu friu ku névi. Es staba bistidu dretu, má simé es troka róda di nha karu, nton N konsigi konduzi ti txiga kaza. N ka ta konsigi trokaba kel róda mi sô.

 “N ta agradese kes sinku jóven Tistimunha di Jeová ki djuda-m. Es staba ta bai pa kaza di pesoas pa inxina-s sobri Bíblia. N odja klaru ma es ta faze sima kel ki es ta inxina. Ta sérba un situason difísil si es ka djudaba mi, pur isu N ta agradese-s di korason. Kenha ki ta pode imajinaba ma kel dia N ta atxaba kes jóven rei di dretu sima anjus na strada?”