N kria pértu di Tampare, un lugar kalmu i verdi, na Finlándia. Nha família ka éra mutu relijiozu, má es ta daba txeu valor pa edukason i bon konportamentu. Nha mai é di Alimanha i kantu mi éra pikinoti, N ta kustuma pasaba algun ténpu na Alimanha Osidental, undi nhas avó ta moraba.

 N gosta di disportu désdi mininu. Désdi kantu mi éra pikinoti, N ta djugaba tudu tipu di disportu, má kantu N tinha 14 anu, N disidi konsentra na jogu di ténis. Kantu N tinha 16 anu, N ta trenaba dôs ô três bês pa dia. N tinha dôs trenu profisional i dipôs N ta pratikaba mi sô di noti. N gostaba txeu di modi ki ta djugadu ténis. Djuga ténis éra un manera di N dizâfia nha kabésa. Nbóra N ta gostaba di sta ku nhas amigu i di alvês toma un serveja, nunka N ka tevi prubléma ku dróga ô bebida. Kuza más inportanti na nha vida éra jogu di ténis.

 N kumesa ta partisipa na torneiu di ATP ku 17 anu. a Dipôs di ganha txeu jogu, N fika txeu konxedu na nha país. Kantu N tinha 22 anu, N staba entri kes 50 midjór djugador di ténis na mundu.

 Duránti txeu ténpu, N viaja pa mundu interu ta djuga ténis profisional. N konxe txeu lugar bunitu, má tanbê N fika ta sabe di txeu prubléma ki ta pasa na mundu, sima krimi, abuzu di dróga i dizastris na naturéza. Pur izénplu, kantu N staba na Mérka, es fla-nu pa nu ka vizita alguns párti di uns sidadi pamodi la tinha txeu krimi. Kel-la nkomoda-m. Nbóra N staba ta faze kuza ki N ta gostaba, na fin di dia, N ta xintiba vaziu déntu mi.

 Nha namorada, ki txoma Sanna, kumesa ta studa Bíblia ku Tistimunhas di Jeová. Ta daba mi grasa di el pamodi el gostaba di kuzas di relijion, má N ka inpidi-l di studa. Na anu di 1990 nu kaza i dipôs di un anu el batizadu kómu Tistimunha di Jeová. N ka éra un algen relijiozu, nbóra N ta kriditaba na Deus. N ta lenbra ma nha avó, ki é di Alimanha, ta kustuma leba Bíblia txeu i el inxina-m ora.

 Un dia, mi ku Sanna nu bai vizita un kazal di Tistimunhas di Jeová. Kel maridu, ki txoma Kari, mostra-m profesia di Bíblia sobri ‘ténpu di fin’. (2 Timóteo 3:1-5) N fika txeu dimiradu, kantu N ntende ma kel-li ta splikaba pamodi ki tudu kes kuza mariadu sta ta kontise na mundu. Kel dia nu ka pâpia txeu sobri relijion. Di la pa dianti N kumesa ta studa Bíblia ku Kari, i tudu kel ki N staba ta prende ta fazeba sentidu pa mi. Nbóra N ta viajaba txeu i éra difísil N konsigi ténpu pa studa Bíblia, Kari ka dizisti di mi. Kes pergunta ki N ta fazeba el na studu, el ta respondeba mi es pa karta. Bíblia da-m respósta pa kes pergunta más inportanti di vida. Poku-poku N ntende ma kel asuntu ki Bíblia más ta pâpia di el é sobri Reinu di Deus, ki ta ben kunpri se vontadi na Téra. Kantu N prende ma nómi di Deus é Jeová i tudu kel ki El faze pa nos, N fika dimiradu. (Salmo 83:18) Má kuzê ki dexa-m más dimiradu inda foi prende ma Jeová manda se fidju pa ben salva-nu. Resgati é ka sô un kuza tékiniku. É un próva ma Deus ta ama-nu. (João 3:16) Tanbê N prende ma N tinha xansi di ser amigu di Deus i vive na pas, na Paraízu, pa tudu ténpu. (Tiago 4:8) N kumesa ta pergunta: “Modi ki N pode mostra nha gratidon pa Deus?”

 N para i N pensa txeu na nha vida. N staba ta prende na Bíblia ma filisidadi verdaderu ta ben di djuda algen. N tinha gana di inxina otus algen kes kuza sábi ki N staba ta prende. (Atos 20:35) Má, kómu mi éra djugador profisional N ta fikaba txeu ténpu lonji di kaza ta partisipa na jogus, uns 200 dia pa anu. Ser djugador di ténis éra kuza más inportanti na nha vida i na vida di nha família. Tudu nos inerjia, dinheru i ténpu éra pa djuda-m ser un djugador di ténis di susésu. N da kónta ma N tinha ki fazeba un mudansa.

 Sima N tinha susésu na djuga ténis, N sabia ma txeu algen ka ta ntendeba si N dizistiba pamodi relijion. Má xansi di konxe Jeová midjór i di vive pa tudu ténpu tinha más valor pa mi ki kalker otu prémiu ki N pode ganhaba. Nton toma kel disizon la foi fásil. N staba disididu na ka obi kuzê ki algen ta flaba. Mi ki tinha ki toma nha disizon. Un testu di Bíblia ki da-m txeu forsa pa N aguenta preson foi Salmo 118:6 ki ta fla: ‘Jeová sta di nha ladu, N ka ta xinti medu. Kuzê ki ómi ta pode faze-m?’

 Na kel ténpu la, alguns patrosinador promete paga-m txeu dinheru, i N ta pode djugaba ténis profisional sen preokupason, duránti txeu anu. Má, dja N tomaba nha disizon. Nton N ka seta kes oférta la i dipôs N para di djuga na kes jogu di ATP. N kontinua ta studa Bíblia, i na dia 2 di julhu di 1994, N batiza kómu Tistimunha di Jeová.

 Ka kontise ninhun disgrasa na nha vida pa pô-m ta pensa na Deus. Tanbê N ka ta atxa ma mi éra un algen ki staba ta buska verdadi. N ta atxaba ma vida staba dretu i ma N ka mesteba más nada. Má, éra sima si Bíblia staba ta spéra pa N atxa-l. N diskubri ma vida ten un siginifikadu i nha vida bira mutu más midjór di ki kel ki N ta speraba! Gósi, nos família sta mutu más fórti i unidu. N sta txeu kontenti pamodi nha três fidju-matxu sigi nhas pasu. Es bira sérvus di Jeová envês di djugadoris.

 Ti inda N gosta di djuga ténis. N sta ta sustenta nha família ku trabadju ligadu ku ténis, sima trenador i jerenti di un séntru di ténis. Má gósi, disportu é ka kuza más inportanti na nha vida. Antis N ta trenaba txeu óra tudu simana pa N podia bira un djugador midjór ô un kanpion. Gósi mi é pioneru fíksu, N sta kontenti pamodi N ta uza nha ténpu pa djuda algen prende i aplika kes prinsípiu di Bíblia ki muda nha vida. N atxa filisidadi verdaderu. Gósi kes kuza más inportanti na nha vida é nha amizadi ku Jeová Deus i fala ku otus algen di nha speransa di ben ten un futuru rei di sábi. — 1 Timóteo 6:19.