Kes 27 publikador di kongregason Iqaluit ki ta fika na kes ilha di Kanadá na mar ártiku, sisti Komemorason djuntu através di vídiu. Di kes 55 studu di Kongregason, 12 sisti Komemorason pa vídiu i es xinti txeu kontenti pamodi es konsigi sisti.

Tiritóriu di kongregason ten uns dôs milhon di kilómetru kuadradu, ki ta bai di Kimmirut ti Grise Fiord, ki é kel zóna ki ta fika na párti más riba di Kanadá. Maioria di kes studanti di Bíblia ta mora uma lonji di Salon, pur isu ta sérba txeu difísil es konsigi sisti Komemorason na Salon.

Irmon Isaac Demeester, ki é un ansion na kongregason Iqaluit fla: “Es anu li, pa primeru bês, nos studanti di Bíblia konsigi sisti Komemorason ku nos. Un di kes studanti di Bíblia, ki ta mora na Grise Fiord, konvida más kuatu algen pa sisti, nton sinku algen, ki ta mora na kel párti más riba di Kanadá, konsigi sisti Komemorason”.

Kel situason novu pamodi koronavírus (COVID-19), djuda txeu irmon di kongregason Iqaluit odja vantaji di muda di akordu ku situason.

Irman Kathy Burechailo fla: “Nu konsigi da tistimunhu pa pesoas na Ártiku pa tilifóni. N tevi uns konbérsu rei di sábi ku alguns algen ki ta mora na kes párti más lonji di tiritóriu. Gentis sta tudu na kaza i es meste di konsolu.”

Irman Laura McGregor fla: “Fika na kaza sen pode sai, sta ta ser dífisil prinsipalmenti pa nos ki ta mora na Iqaluit pamodi koronavírus traze prublémas di dinheru i nu ka sabe kuzê más ki sta ta ben kontise. Kel-li foi primeru bês ki nu faze pon di komemorason pa nos família. Nu pasa sábi djuntu. Kel-li djuda-nu ntende midjór modi ki Komemorason é un runion sinplis i ma é un benson grandi konsigi kel pon ku kel vinhu faxi.”

Irmon Isaac fla: “Nbóra koronavírus sipara-nu di kunpanheru di txeu manera, é rei di sábi odja modi ki irmons di nos kongregason bira mutu más amigu di kunpanheru duranti es ténpu di Komemorason. Kel Komemorason li muda nos vida!”

Kongregason Iqaluit tene gana di faze ses própi Salon di Reinu lógu ki situason da. Timenti kel-la ka kontise, nu sabe ma Jeová ta abênsua ses sforsu sen kansa di leba notísia sábi pa kes lugar más riba di Kanadá, ki é un di kes lugar más lonji di Téra! — Atos 1:8.