Irman Cynthia Pablo é un publikadora ki ten 64 anu i ki inda ka batiza. El é di kongregason di língua jestual di Panghulo, na Fillipinas. El é surdu i ségu i el é póbri. El ta vive djuntu ku se famílias ki é ka Tistimunha di Jeová, na sidadi di Valenzuela. Situason di Cynthia é txeu difísil i el fika más konplikadu inda pamodi koronavírus. Má simé irmons di se kongregason sta ta kuida di el dretu.

Pamodi se idadi, Cynthia ten ménus xansi di aguenta si el panha koronavírus. Pamodi koronavírus, kuazi ka ten agu na se zóna, pur isu ta fika más difísil el konsigi laba se ropas. Antis di kel situason li, irmans di se kongregason ta djudaba el ku trabadjus di kaza, má pamodi kes limiti ki govérnu poi, kes irman ka ta pode faze kel-li más.

Un ansion di se kongregason, ki txoma Walter Ilumin, konsigi autorizason di govérnu ki ta dexa-l sai di se kaza pa ba kuida di Cynthia. Kel autorizason li ta dadu sô pa kes algen ki ta faze kes trabadju ki ta mestedu más txeu. Alén di leba Cynthia ropa linpu, irmon Walter tanbê ta leba-l kumida i otus kuza ki el ta meste. Irmon Walter ta sigi tudu kes lei i orientason di govérnu, sima uza maskra i otus kuza pa proteje i el ta laba mô sénpri.

Cynthia ta mostra se gratidon pa irmons através di mensajis di vídiu gravadu. Dipôs irmon Walter ta mostra kongregason kes vídiu.

Irmon Walter tanbê ta bai pa se kaza pa traduzi runions ki ta fazedu através di vídiu. Pa kel-li, el ta faze kes jéstu na mô di Cynthia. Asi Cynthia sénpri ta konsigi da komentáriu na studu di Séntinela. Komentárius ki el ta da na runions duránti kel ténpu difísil li ta nkoraja otus ki ta sta ta sisti.

Nu ten sertéza ma Jeová sta kontenti di odja ma se povu sta ta djuda i konsola kunpanheru ‘inda más gósi ki nu sta ta odja kel dia ta txiga.’ — Hebreus 10:24, 25.