Pa un insétu konsigi bua, subi algun kuza i sabe undi ki el sta, el ten ki sta linpu. Pur izénplu, si un furminga tene anténas suju kel-la ta pô-l ku ménus kapasidadi di orienta, di kumunika i di xinti txeru. É pur isu ki Alexander Hackmann, un ómi ki ta studa animal, fla: “Nunka bu ka ta atxa un insétu suju. Es sabe kuzê ki es ta faze si un lugar sta kontaminadu.”

 Pensa na kel-li: Alexander Hackmann i se kolégas studa kapasidadi ki furminga karpinteru (Camponotus rufifemur) ten pa linpa se anténas. Es diskubri kuzê ki kel furminga ta faze pa tra kuzas suju pikinoti ki ta sta na se anténas. El ta dobra se pérna pa fika sima un granpu i el ta pasa kada anténa na kel pérna dobradu. Kes kabélu más grós di se pérna ta tra kes sujidadi más grandi. Kes sujidadi más pikinoti, el ta tra-s ku otus kabélu di se pérnas. Spasu entri kes kabélu ten mésmu tamanhu ki grosura di kes kabélu na se anténas. I ten kes sujidadi inda más pikinoti, ki grosura di fiu di kabélu di un algen é 80 bês más grós di ki es. Pa tra kes sujidadi la el ta uza kes kabélu ki é sima un skova inda más finu.

 Odja un furminga ta linpa se anténas

 Alexander Hackmann i se ekipa ta atxa ma kapasidadi ki furminga ten di linpa se anténas pode ser uzadu na fábrikas. Pur izénplu, es pode uza kel mésmu sistéma di linpéza li, óras ki es ta faze kes pésa eletróniku pikinoti, ki kalker tipu di sujidadi pode straga-s.

 Kuzê ki bu ta atxa? Kapasidadi ki furminga karpinteru ten pa linpa se anténas ben di ivoluson? Ô tevi un algen ki faze-l?