Jizus konsentra se vida ‘ta prega i ta pâpia sobri notísias sábi di Reinu di Deus.’ (Lucas 8:1) El anda txeu kilómetru na téra di Israel pa el inxina algen sobri Reinu di Deus. Kes kuatu Ivanjélhu ta pâpia sobri se trabadju di pregason i es ta pâpia di Reinu más di 100 bês. Na txeu di kes lugar ki Ivanjélhus ta pâpia sobri Reinu, é própi Jizus ki sta pâpia di el, má simé es é sô un párti pikinoti di tudu kel ki Jizus fla sobri Reinu di Deus! — João 21:25.

Pamodi ki Reinu di Deus éra rei di inportanti pa Jizus kantu el staba na Téra? Un di kes motivu é pamodi el sabia ma Deus skodje-l pa ser Rei di kel Reinu li. (Isaías 9:6; Lucas 22:28-30) Má se obijetivu ka éra ganha puder ô glória. (Mateus 11:29; Marcos 10:17, 18) Jizus ka pâpia sobri Reinu ta pensa sô na se kabésa. Reinu di Deus éra, i ti inda é txeu inportanti pa Jizus, * prinsipalmenti pamodi kes kuza ki Reinu ta ben faze pa kes algen ki el ta ama, ki é se Pai na Séu i se sigidoris fiel.

Jizus ta amaba se Pai ki sta na Séu txeu dimás. (Provérbios 8:30; João 14:31) El gosta txeu di kes kualidadi bunitu di se Pai sima amor, konpaxon i justisa. (Deuteronómio 32:4; Isaías 49:15; 1 João 4:8) Pur isu, di sertéza Jizus ta ôdia kes mintira ki ta fladu sobri se Pai, sima kel ki algen ta fla ma Deus ka ta preokupa ku nos sufrimentu i ti ma el krê pa nu sufri. Kel-li é un di kes motivu ki poi Jizus ta prega ku zelu sobri kes ‘notísias sábi di Reinu’. El sabia ma Reinu ta ben linpaba nómi di se Pai di tudu kes mintira. (Mateus 4:23; 6:9, 10) Modi ki Reinu ta ben faze kel-li?

Jeová ta ben kaba ku tudu nos prubléma através di Reinu. ‘El ta linpa tudu lágua di odju’ di kes algen fiel. Jeová ta ben kaba ku kes motivu ki ta poi kes algen ku lágua. Pur isu, ‘ka ta ten más mórti, nen ka ta ten más tristéza, nen txoru, nen dór.’ (Apocalipse 21:3, 4) Deus ta ben kaba ku tudu nos sufrimentu através di Reinu.

 É pur isu ki Jizus tinha gana di pâpia ku otus algen sobri Reinu! El sabia ma kel Reinu li ta ben mostraba ma se Pai ten txeu puder i konpaxon. (Tiago 5:11) Fóra kel-li, Jizus sabia ma Reinu ta ben djudaba kes algen ki el ta ama, ki é kes algen fiel.

Txeu ténpu antis di Jizus ben pa Téra, el ta viveba na Séu djuntu ku se Pai. Deus kria tudu kuza através di se Fidju: Séu ku strélas i galáksias ki é uma bunitu i nos planéta Téra, ki tanbê ki é uma bunitu, ku tudu kes animal i planta. (Colossenses 1:15, 16) Má kel kriason di Deus ki Jizus ‘gostaba más txeu’ éra di algen na Téra. — Provérbios 8:31.

Jizus mostra txeu amor pa pesoas timenti el staba na Téra. Désdi komésu, el mostra klaru ma el ben pa Téra pa ‘pâpia di notísias sábi’ pa kes algen ki mesteba. (Lucas 4:18) Má Jizus ka pâpia sô pâpia di amor, el mostra amor pa otus algen monti bês. Pur izénplu, kantu un monti di algen djunta pa obi-l ta pâpia, Jizus ‘xinti péna di es i el kura kes ki staba duenti.’ (Mateus 14:14) Kantu un ómi ki tinha lépra fla Jizus ma si el krê, el ta kuraba el, kel amor ki el tinha pô-l ta kura kel ómi. Kantu el kura kel ómi el fla-l ku konpaxon: ‘N krê sin! Fika linpu.’ (Lucas 5:12, 13) Kantu Jizus odja Maria, ki éra se amiga, ta txora pamodi se irmon Lázaru móre, Jizus ‘xinti mágua na korason i el fika tristi’ i el ‘kumesa ta txora.’ (João 11:32-36) Dipôs Jizus faze un kuza ki ningen ka staba ta spéra: el poi Lázaru ta vive otu bês sikrê dja tinha kuatu dia ki el staba mortu! — João 11:38-44.

É klaru ki Jizus sabia ma kes milagri ki el faze ta djudaba kes algen pa poku ténpu. El sabia ma, sédu ô tardi, tudu kes algen ki el kura ta fikaba duenti otu bês i ma tudu kes ki el resusita ta moreba otu bês. Má el sabia tanbê ma Reinu di Deus ta ben kababa ku tudu kes prubléma li i pa tudu ténpu. É pur isu ki el ka sô faze milagri, má tanbê el pâpia ku zelu sobri ‘notísias sábi di Reinu’. (Mateus 9:35) Kes milagri ki el faze ta da-nu sô un ideia di kuzê ki, ka ta dura, Reinu di Deus ta ben faze na Téra interu. Odja alguns promésa di Bíblia ki ta ben kunpri na kel ténpu.

•  Ningen ka ta ben fika duenti más.

  ‘Na kel ténpu, odjus di kes algen ségu ta ben abri i obidus di kes algen surdu ta ben distapa. Na kel ténpu, kes algen manku ta ben salta sima viadus, i língua di kes algen mudu ta ben grita di alegria.’ Tanbê, ‘ningen ki ta mora la ka ta fla: “N sta duenti.”’ — Isaías 33:24; 35:5, 6.

• Ningen ka ta móre.

  ‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.

  ‘El ta ben kaba ku mórti pa tudu ténpu, i Jeová, kel Sinhor Más Grandi, ta ben linpa lágua di tudu róstu.’ — Isaías 25:8.

• Kes ki móre ta ben vive otu bês.

  ‘Tudu kes ki sta na sipultura mimorial ta ben obi se vós i es ta sai’. — João 5:28, 29.

  ‘Ta ben ten resureison’. — Atos 24:15.

• Tudu algen ta ben ten trabadju i un lugar pa es mora.

  ‘Es ta ben faze kazas i mora na es; es ta ben planta lugaris xeiu di pé di uva i kume di ses fruta. Es ka ta faze kazas pa otus algen mora, es ka ta planta pa otus algen ba kume. I kes ki N skodje ta ba goza rezultadu di trabadju di ses mô.’ — Isaías 65:21, 22.

•  Ka ta ben ten más géra.

  ‘El ta kaba ku géra na téra interu.’ — Salmo 46:9.

  ‘Nason ka ta labanta spada kóntra kel otu nason, nen es ka ta prende géra más.’ — Isaías 2:4.

• Ningen ka ta ben pasa fómi.

  ‘Téra ta ben da kumida; Deus, nos Deus, ta ben abensua-nu.’ — Salmo 67:6.

  ‘Ta ben ten kumida avontádi na Téra, i riba monti ta ben ten un monti kumida.’ — Salmo 72:16.

• Ka ta ben ten más pobréza.

  ‘Kes póbri, ka ta ben skesedu di es’. — Salmo 9:18.

  ‘El ta ben salva kes algen póbri ki ta sta ta txora ta pidi ajuda, i tanbê kes algen umildi i tudu kes ki ka ten algen pa djuda-s. El ta xinti péna di koitadu i di póbri, i el ta salva vida di algen póbri.’ — Salmo 72:12, 13.

Óras ki nu ta pensa na tudu kes promésa li, nu ta ntende pamodi ki Reinu éra inportanti pa Jizus. El pâpia sobri Reinu di Deus, pa tudu kes algen ki krê obiba el. Pamodi el sabia ma Reinu ta ben kababa ku tudu kes prubléma ki ten na Téra.

Bu fika kontenti di prende sobri kes promésa di Reinu ki sta na Bíblia? Nton, modi ki bu pode prende más sobri kel Reinu li? I kuzê ki bu pode faze pa kes promésa li djuda-u?