Bíblia ta muda vida di algen

KUZÊ ki un ómi di Skósia atxa ma éra más inportanti di ki ten un karera di susésu? Kuzê ki djuda un ómi na Brazil para di ten konportamentu seksual mariadu i para di uza dróga? Modi ki un jóven na Slovénia konsigi para di bebe? Odja kuzê ki kes algen li ten pa fla.

“Nha vida ta parseba sábi.” — JOHN RICKETTS

ANU KI EL NASE: 1958

PAÍS KI EL NASE: SKÓSIA

SE VIDA NA PASADU: UN ÓMI KI TINHA BONS REZULTADU NA SE TRABADJU

MODI KI ÉRA NHA VIDA ANTIS: N kria na un família ki tinha bon kondison di vida. Nha pai éra trópa na Inglatéra i el tinha un puzison altu, pur isu, mi ku nha família nu ta mudaba txeu. Alén di Inglatéra, nu mora na Skósia, Alimanha, Kénia, Malázia, Irlanda i Xipri. Kantu N tinha 8 anu, nha pai ku nha mai manda-m pa N ba studa na Skósia. Dipôs, N bai studa na universidadi di Cambridge na Inglatéra.

Ku 20 anu, N kumesa ta trabadja na nogósiu di pitróli i N pasa 8 anu ta faze kel-li. N kumesa ta trabadja na Mérka di Sul, dipôs na Áfrika i tanbê na Austrália Osidental. Dipôs ki N muda pa Austrália, N abri nha própi inpréza i ku ténpu N bende-l.

Dja ki N bende kel inpréza pa monti dinheru, ku 40 anu N reforma. Dipôs, N fika ta uza kel ténpu ki N tinha pa N viaja. N da vólta pa Austrália di móta dôs bês, tanbê N viaja pa mundu interu. Nha vida ta parseba sábi.

MODI KI BÍBLIA MUDA NHA VIDA: Mésmu antis di N reforma, N kria atxaba un manera di agradese Deus pa vida ki N tinha. N kumesa ta bai pa kel igreja ki N ta baba kantu N éra pikinoti. Má, es ta inxinaba poku kuza sobri Bíblia. Dipôs, N studa ku Mórmon, má N dizisti pamodi ses falta di kunfiansa na Bíblia.

Un dia, Tistimunhas di Jeová konku na nha pórta. N odja klaru ma kel ki es ta inxina ten bazi na Bíblia. Es mostra-m 1 Timóteo 2:3, 4 ki ta fla, ma Deus krê pa ‘tudu tipu di algen salva i pa es ten un konhisimentu izatu di verdadi.’ N fika dimiradu pamodi es fla ma nu meste ka sô ten konhisimentu, má konhisimentu izatu di Bíblia.

Studa Bíblia ku Tistimunhas di Jeová djuda-m ten kel konhisimentu izatu. Pur izénplu, N prende ma Deus i Jizus ka ta faze párti di Trindadi; es é dôs algen diferenti. (João 14:28; 1 Coríntios 11:3) N fika txeu kontenti di prende kel verdadi sinplis li. Má tanbê N fika xatiadu, pamodi N perde txeu ténpu ta tenta ntende un ensinu ki éra falsu!

N kumesa ta sisti runions di Tistimunhas di Jeová. N fika dimiradu ku ses manera di trata algen i ses manera di konporta. Ta parseba ma es éra santu. Kel amor di verdadi ki es ta mostraba pa kunpanheru konvense-m ma kel-la éra relijion verdaderu. — João 13:35.

BENSONS KI N RESEBE: Dipôs ki N batiza, N konxe un bon mudjer ki txoma Diane. El kriadu na un família ki éra Tistimunha di Jeová i el tinha txeu kualidadi bunitu ki txoma-m atenson. Ku ténpu nu kaza. Se amizadi i ajuda ki el ta da-m, é un benson di Jeová.

Mi ku Diane, nu kria ba prega na undi ki tinha más nisisidadi. Na anu 2010, nu muda pa Belize, na Mérka Sentral. Li nu ta prega pa kes pesoa ki ta ama Deus i ki krê prende más sobri el.

N ta xinti pas déntu mi, pamodi N atxa verdadi sobri Deus i se Palavra, ki é Bíblia. Dja ki N ta prega pa ténpu interu, N ta fika txeu kontenti pamodi N sta konsigi djuda txeu algen prende verdadi di Bíblia. Ka ten nada más sábi, ki odja kes verdadi di Bíblia ta muda vida di algen, sima es muda di meu. Gósi dja N atxa kel midjór manera di agradese Deus pa kel vida ki N ten.

“Es mostra-m txeu amor.” — MAURÍCIO ARAÚJO

ANU KI EL NASE: 1967

PAÍS KI EL NASE: BRAZIL

SE VIDA NA PASADU: TA TINHA KONPORTAMENTU SEKSUAL MARIADU

MODI KI ÉRA NHA VIDA ANTIS: N kria na Avaré, un sidadi pikinoti ki ta fika na stadu di San Paulu. Maioria di algen ki ta vive la é póbri.

Nha pai móre kantu nha mai staba grávida di mi. Kantu mi éra pikinoti N ta bistiba ropa di nha mai óras ki el ka ta staba na kaza. N fika ta konporta sima mudjer i pesoas ta pensaba ma mi era omoseksual. Ku ténpu, N kumesa ta ten relason seksual ku otus mininu i ku ómi.

Kantu N tinha uns 20 anu, N kumesa ta djobe ómis ku mudjeris pa N ten relason seksual. N ta djobeba es na txeu lugar, sima na bar, diskotékas i ti na frenti di igrejas. Na ténpu di karnaval N ta bistiba di mudjer i N ta disfilaba na kes skóla di sanba. Mi éra txeu konxedu.

Txeu di nhas amigu éra omoseksual, prostituta i visiadu na dróga. Alguns di es influensia-m pa N sprimenta dróga i N fika visiadu. Alvês nu ta fumaba noti interu. I txeu bês N ta fumaba mi sô, dia interu. N fika magru di tal manera, ki pesoas fika ta fla ma N tinha SIDA.

MODI KI BÍBLIA MUDA NHA VIDA: Duránti kel ténpu li, N konxe Tistimunhas di Jeová. Es mostra-m txeu amor. I un testu ki es lé pa mi, foi Romanos 10:13 ki ta fla: ‘Tudu algen ki invoka nómi di Jeová ta ser salvu’. Kes palavra li, mostra-m klaru ma é inportanti uza nómi di Jeová. Txeu bês, dipôs di pasa noti interu ta uza dróga, N ta abriba janéla, N ta djobeba pa séu i ta txora N ta oraba pa Jeová i N ta inploraba el pa el djuda-m.

N staba preokupadu ku nha mai ki staba ta sufri txeu, pamodi el staba ta odja ma dróga sta kababa ku nha vida. Pur isu, N disidi para di uza dróga. Poku ténpu dipôs, N seta studa Bíblia ku Tistimunhas di Jeová. Es da-m sertéza ma studa Bíblia ta daba mi kel forsa ki N mesteba pa N para di uza dróga. I kel-li kontise mê!

Sima N ba ta studa Bíblia, N da kónta ma N meste fazeba txeu mudansa na nha vida. Para di ser omoseksual foi kel kuza más difísil pa mi, pamodi era un konportamentu ki N tinha désdi kantu mi era pikinoti. Un kuza ki djuda-m faze kel mudansa li, é kaba ku kes amizadi mariadu ki N tinha i dexa di bai bar i diskotékas.

Nbóra ka foi fásil faze kes mudansa li, un kuza ki djuda-m txeu é sabe ma Jeová ta nportaba ku mi i ma el ta ntendeba sforsu ki N staba ta faze. (1 João 3:19, 20) Na anu 2002, dja-m paraba di ten kes konportamentu omoseksual i na kel mésmu anu N batiza i N bira un Tistimunha di Jeová.

BENSONS KI N RESEBE: Nha mai fika txeu dimiradu ku kes mudansa ki N faze, ki el kumesa ta studa Bíblia. Infilismenti, el panha tronbózi. Má simé, el sta kontinua ta bira se amizadi ku Jeová más fórti i el sta ama kes verdadi di Bíblia.

Na kes últimu 8 anu, N ten stadu ta prega pa ténpu interu i ta inxina pesoas kes verdadi di Bíblia. N ta rekonhese ma na alguns momentu N tevi ki luta ku kes dizeju mariadu. Má un kuza ki ta da-m koraji, é sabe ma óras ki N ta vense kes dizeju mariadu, N sta agrada Jeová.

Gósi, N ta xinti sábi ku nha kabésa, pamodi N ten un bon amizadi ku Jeová i N ta vive di un manera ki ta agrada-L. Oji N pode fla, ma mi é un ómi filís.

“Ami éra sima un baril sen fundu.” — LUKA ŠUC

ANU KI EL NASE: 1975

PAÍS KI EL NASE: SLOVÉNIA

SE VIDA NA PASADU: VISIADU NA BEBIDA

MODI KI ÉRA NHA VIDA ANTIS: N nase na Ljubljana, kapital di Slovénia. Ti kuatu anu, nha vida éra sábi. Má dipôs nha pai mata kabésa. I kantu kel-li kontise, nha mai tevi di trabadja duru pa kria-nu mi ku nha irmon más grandi.

Kantu N tinha 15 anu, N ba mora ku nha avó. N gostaba di moraba ku el pamodi txeu di nhas amigu ta moraba na kel mésmu zóna. Tanbê N tinha más liberdadi di ki kantu N ta moraba ku nha mai. Ku 16 anu, N kumesa ta kolega ku pesoas ki ta saíba pa bebe na fin di simana. N dexa nha kabélu kria, N kumesa ta bisti mariadu i dipôs N kumesa ta fuma.

N sprimenta txeu tipu di dróga, má N fika visiadu na bebida pamodi N ta atxaba el más sábi. Na komésu N ta bebeba sô uns kópu di vinhu. Má lógu dipôs N pasa ta bebe un garafa di un bês. Sikrê N ta bebeba txeu ka ta parseba ma N staba moku. Txeu bês algen ta daba kónta ma N bebe pamodi nha bafu. Má simé, ningen ka ta imajinaba kantu litru di vinhu ô serveja ki N bebeba misturadu ku vodka!

Txeu bês, mi ku nhas amigu nu ta pasaba noti interu na diskotéka ta bebe. I sikrê N bebeba mutu más txeu ki es, éra mi ki ta lebaba es pa kaza. Un dia, un di nhas amigu insulta-m kantu el fla má mi éra sima un baril sen fundu. I kel-li é un spreson mariadu ki es ta uza na nos língua pa pâpia di un algen ki ta bebe txeu dimás. N fika txeu maguadu.

N kumesa ta pensa kuzê ki N staba ta faze ku nha vida. N xinti sen valor. N xinti ma N ka sta fazeba nada inportanti.

MODI KI BÍBLIA MUDA NHA VIDA: Na kel ténpu, N kumesa ta repara ma un di nhas koléga di skóla staba diferenti. El staba mutu más kalmu. N tinha gana di sabe kuzê ki djuda-l muda. Pur isu N konvida-l pa nu bai bebe un kafé. Timenti nu staba ta pâpia, el splika-m ma el staba ta studa Bíblia ku Tistimunhas di Jeová. El kumesa ta pâpia ku mi sobri kes kuza ki el staba ta prende, i tudu kes kuza éra novu pa mi pamodi nunka N ka baba igreja i nunka N ka leba Bíblia. N kumesa ta sisti runion i ta studa Bíblia ku Tistimunhas di Jeová.

N prende na Bíblia txeu kuza ki pô-m ta krê muda nha vida. Pur izénplu, N prende ma nu sta ta vive na kel ténpu ki Bíblia ta txoma di ‘ténpu di fin’. (2 Timóteo 3:1-5) N prende tanbê, ma ka ta dura Deus ta ben kaba ku kes algen mau na Téra i el ta ben da kes algen dretu xansi di ben vive pa tudu ténpu na un paraízu li na Téra. (Salmo 37:29) Kel-li pô-m ta krê para di faze kes kuza mariadu ki N ta fazeba pa N pode ben sta djuntu ku kes algen dretu.

N kumesa ta pâpia ku nhas amigu sobri kes kuza ki N staba ta prende na Bíblia. Má txeu di es faze-m trósa pamodi kes kuza ki N fla-s. Má kel-la foi bon pa mi. Kel-li djuda-m odja ma es ka éra amigu di verdadi. N da kónta ma amizadi ki N tinha ku kes algen la éra un di kes razon ki pô-m ta ten prubléma ku bebida. Duránti simana interu es ta tinha gana pa fin di simana txiga pa es pode bebe otu bês.

N para di pasa nha ténpu ku es i N faze amizadi ku Tistimunhas di Jeová. Óras ki N ta staba djuntu ku Tistimunhas di Jeová N ta xintiba nkorajadu pamodi es ta amaba Deus di verdadi i es ta sforsaba pa vive di akordu ku se prinsípius. Poku-poku N ba ta larga vísiu di bebe.

BENSONS KI N RESEBE: N ta agradese Jeová pamodi N ka meste bebe más pa N xinti filís. N ka sabe modi ki nha vida ta staba gósi, si N ka largaba kes mau ábitu ki N tinha. Má N ten sertéza ma nha vida sta mutu más midjór.

Na kes últimu 7 anu, N tene priviléjiu di sirbi na filial di Tistimunhas di Jeová na Slovénia. Konxe i sirbi Jeová da nha vida más sentidu.