1. Modi ki txeu algen ta reaji ku sabedoria ki Bíblia ta da? (Provérbios 1:20, 21)

 NA TXEU país é normal odja irmons ku irmans kontenti na kes rua ki ten txeu algen ta pasa, ta oferese publikasons. Dja bu kustuma prega di kel manera li? Si dja bu kustuma faze kel-li, talvês bu lenbra ma Provérbios ta fla ma sabedoria ta grita na rua pa pesoas obi. (Lé Provérbios 1:20, 21.) Na Bíblia i na nos publikasons nu ta atxa ‘sabedoria di verdadi’, ki é kel sabedoria di Jeová. É kel sabedoria li ki algen meste pa pode ten vida pa tudu ténpu. Nu ta fika kontenti óras ki algen ta seta nos publikasons. Má é ka tudu algen ki ta faze kel-li. Alguns algen ta prifiri ka obi kuzê ki Bíblia ta fla i otus ta ri di nos. Es ta atxa ma Bíblia é un livru antigu. I inda otus ta kritika kuzê ki Bíblia ta fla sobri konportamentu. Es ta fla ma kes algen ki ta sigi-l ta atxa ma es é midjór di ki otus algen i ma es é duru. Má ku amor, Jeová ta kontinua ta da kel sabedoria di verdadi pa tudu algen. Modi ki el ta faze kel-li?

2. Modi ki nu pode ten sabedoria di verdadi oji, má kuzê ki txeu algen ta skodje faze?

² Un di kes manera ki Jeová ta pô-nu ta obi ku sabedoria di verdadi é através di se Palavra, Bíblia. Kuazi tudu algen pode ten kel livru li. I kuzê ki nu pode fla sobri nos publikasons ki ten bazi na Bíblia? Pamodi bensons di Jeová, es sta na más di mil língua. Kes ki ta obi, ô kes ki ta lé i ta faze kel ki es ta prende, ta ten bons rezultadu.  Má txeu algen ta disidi ka obi ku sabedoria di Jeová. Óras ki es ten ki toma un disizon, es ta prifiri kunfia na ses kabésa ô obi ku otus algen. Ti es pode dispreza-nu pamodi nu skodje sigi kuzê ki Bíblia ta fla. Na kel studu li, nu ta ben odja pamodi ki algen ta reaji di kel manera li. Má primeru, nu ta ben odja modi ki nu pode ten sabedoria di Jeová.

3. Kuzê ki sabedoria di verdadi pode krê fla?

³ Sabedoria pode krê fla kapasidadi di uza kuzê ki nu sabe pa toma bons disizon. Má sabedoria di verdadi é mutu más di ki kel-li. Bíblia ta fla: ‘Ten grandi ruspetu pa Jeová é komésu di sabedoria, i konxe kel Algen Más Grandi é ntendimentu.’ (Pro. 9:10) Pur isu, óras ki nu ta toma un disizon inportanti, nu debe faze-l di manera ki Jeová ta pensa, i ‘konxe kel Algen Más Grandi’ é bazi di disizons ki nu ta toma. Nu pode faze kel-li óras ki nu ta djobe kuzê ki Bíblia i nos publikasons ku bazi na Bíblia ta fla. Asi, nu ta mostra sabedoria di verdadi. — Pro. 2:5-7.

4. Pamodi ki Jeová é kel úniku algen ki pode da-nu sabedoria di verdadi?

⁴ Jeová é kel úniku algen ki pode da-nu sabedoria di verdadi. (Rom. 16:27) Pamodi ki el é Fonti di sabedoria? Primeru, dja ki el é nos Kriador, el konxe i el sabe tudu kuza sobri se kriason. (Sal. 104:24) Sugundu, tudu kuza ki Jeová ta faze ta mostra se sabedoria. (Rom. 11:33) I tirseru, konsedjus di Jeová ki ten sabedoria ta traze bons rezultadu pa tudu kes algen ki ta faze sima es ta prende. (Pro. 2:10-12) Si nu krê ten sabedoria di verdadi, nu ten ki seta kes verdadi prinsipal i dexa pa es orienta disizons ki nu ta toma i nos manera di aji.

5. Kuzê ki ta kontise óras ki algen ka ta rekonhese ma Jeová é Fonti di sabedoria di verdadi?

⁵ Txeu di kes algen ki nu ta atxa na pregason ta rekonhese ma kes kuza bunitu ki naturéza ten é ben fetu. Má es ka ta kridita ma ta izisti un Kriador i es ta atxa ma tudu kuza ben di ivoluson. Otus ta fla ma es ta kridita na Deus, má es ta fla ma kes lei ki sta na Bíblia ka ta sirbi más i es ta prifiri sigi ses própi ideia. Kal ki é rezultadu? Mundu é un lugar midjór pamodi algen ta kunfia na ses própi sabedoria envês di na sabedoria di Deus? Es atxa filisidadi di verdadi ô un speransa suguru pa futuru? Kuzê ki nu ta odja na nos vólta ta da-nu sertéza di kel verdadi li: ‘Ka ten sabedoria, nen disirnimentu, nen konsedju ki ta fika kóntra Jeová.’ (Pro. 21:30) Kel-li ta insentiva-nu pa nu kontinua ta pidi Jeová pa da-nu kel sabedoria di verdadi! Má infilismenti maioria di algen ka ta pensa si. Pamodi?

6. Sima sta na Provérbios 1:22-25, kenha ki ka ta obi ku sabedoria di verdadi?

⁶ Txeu algen ka ta obi ku sabedoria di verdadi óras ki el ‘ta grita na rua.’ Sima Bíblia ta fla, ten três grupu di algen ki ka ta obi ku sabedoria: kes ‘ki ka ten spiriénsia,’ kes ‘ki ta faze algen trósa’ i kes ‘tolu’. (Lé Provérbios 1:22-25.) Nu ta ben odja más dretu pamodi ki kes algen li ka ta obi ku sabedoria di Deus i tanbê nu ta ben odja modi ki nu pode ivita bira sima es.

7. Pamodi ki alguns algen ta prifiri kontinua sima kes algen ‘ki ka ten spiriénsia’?

 ⁷ Kes algen ‘ki ka ten spiriénsia’ ta kridita na tudu kuza, ô es ta nganadu faxi. (Pro. 14:15, nóta di rodapé) Txeu bês nu ta atxa kes tipu di algen li na pregason. Pur izénplu, pensa na kes milhon di algen ki xéfis di relijion ô pulítikus sta ta ngana. Alguns algen ta fika dimiradu óras ki es ta diskubri ma xéfis di relijion ngana-s. Má kes algen ki ka ten spiriénsia ki Provérbios 1:22 pâpia di el, ta skodje kontinua si pamodi es gosta di kel-li. (Jer. 5:31) Es gosta di sigi ses própi ideia i es ka ta krê prende kuzê ki Bíblia ta fla ô obi ku se leis. Txeu algen ta xinti sima un mudjer di Kebéki, na Kanadá, ki é ferénha na se relijion, ki fla kel-li pa un Tistimunha di Jeová: “Si nos padri ngana-nu kulpa é ka di nos, kulpa é di sel!” Di sertéza nu ka krê imita kes algen ki ta skodje kontinua sen spiriénsia! — Pro. 1:32; 27:12.

8. Kuzê ki ta djuda-nu ten sabedoria di verdadi?

⁸ É ka atoa ki Bíblia ta inxina-nu pa nu ka kontinua sima kes algen ki ka ten spiriénsia, má pa nu ‘bira algen grandi na nos kapasidadi di ntende.’ (1 Cor. 14:20) Nu ta ten sabedoria óras ki nu ta aplika kes prinsípiu di Bíblia na nos vida. Si nu faze si, nu ta odja modi ki Bíblia ta djuda-nu ivita prublémas i toma disizons ku sabedoria. É bon nu pensa na ki disizons ki nu ta toma. Si dja ten txeu ténpu ki nu ta studa Bíblia i nu ta sisti runions, talvês nu ta pergunta pamodi ki inda nu ka da nos vida pa Jeová i batiza. Si dja nu batiza, nu sta ta faze prugrésu na prega i inxina notísias sábi? Disizons ki nu ta toma ta mostra ma prinsípius di Bíblia ta gia-nu? Nu ta trata otus sima Jizus ta trataba algen? Si nu da kónta ma nu meste midjora, nu debe presta atenson na kuzê ki Jeová ta inxina ki ‘ta da sabedoria pa ken ki ka ten spiriénsia.’ — Sal. 19:7.

9. Modi ki kes ‘ki ta faze algen trósa’ ta mostra ma es ta nega sabedoria?

⁹ Kel sugundu grupu di kes ki ka ta obi ku sabedoria di Deus é kes ‘ki ta faze algen trósa’. Alvês nu ta atxa kes tipu di algen li na pregason. Es gosta di faze otus algen trósa. (Sal. 123:4) Bíblia ta fla ma na ténpu di fin ta ben tinha txeu di kes algen ki ta faze trósa. (2 Ped. 3:3, 4) Sima kes jénru di Ló, oji alguns algen ka ta da atenson pa kes avizu di Deus. (Gén. 19:14) Txeu algen ta faze trósa di kes ki ta vive di akordu ku prinsípius di Bíblia. Kes algen ki ta faze trósa ‘ta aji di akordu ku ses própi dizeju mariadu.’ (Judas 7, 17, 18) Kuzê ki Bíblia ta fla di kes algen li é sima kel ki el ta fla di kes algen ki fika kóntra organizason di Jeová i di kes ki ta nega obi ku Jeová!

10. Sima sta na Salmo 1:1, modi ki nu pode ivita bira sima kes ki ta faze algen trósa?

¹⁰ Modi ki nu pode ten sertéza ma nu ka ta bira sima kes ki ta faze algen trósa? Un manera é ivita sta ku kes algen ki ta kritika tudu kuza. (Lé Salmo 1:1.) Kel-li krê fla ma nu ka ta obi, nen nu ka ta lé nada di kes algen ki fika kóntra organizason di Jeová. Nu sabe ma si nu ka toma kuidadu nu pode kumesa ta kritika i ta duvida di Jeová i di kes orientason ki nu ta resebe através di se organizason. Pa nu ivita kel-li, nu pode pergunta nos kabésa: ‘Sénpri N ta ten un kuza negativu pa fla óras ki nu ta resebe un  orientason novu ô alguns splikason? N ten tendénsia di kritika kes ki ta toma kónta di kongregason?’ Si nu koriji kes tendénsia mariadu faxi, Jeová ta fika kontenti ku nos. — Pro. 3:34, 35.

11. Kuzê ki kes algen ‘tolu’ ta atxa di kes lei di Jeová sobri konportamentu?

¹¹ Kel tirseru grupu di algen ki ta nega sabedoria é kes ‘tolu’. Es é tolu pamodi es ta nega vive di akordu ku leis di konportamentu di Deus. Es ta faze kel ki es ta atxa ma é dretu. (Pro. 12:15) Kes tipu di algen li ka ta obi ku Jeová, ki é Fonti di sabedoria. (Sal. 53:1) Óras ki nu ta atxa kes algen li na pregason, txeu bês es ta kritika-nu pamodi nu ta ruspeta kes lei di Jeová ki sta na Bíblia, má es ka ten nada midjór pa oferese-nu. Bíblia ta fla: ‘Algen tolu ka ta alkansa sabedoria di verdadi; es ka ten nada pa fla na porton di sidadi.’ (Pro. 24:7) Algen tolu ka ten bons konsedju pa da. É ka atoa ki Bíblia ta fla pa nu ‘fika lonji di ómi tolu’! — Pro. 14:7.

12. Kuzê ki ta djuda-nu ka ser sima kes algen tolu?

¹² Nos é ka sima kes algen ki ta ôdia konsedjus di Deus, má nu ta prende ama manera ki Jeová ta pensa, ki ta inklui tudu se leis sobri konportamentu. Nu ta bira kel amor li más fórti óras ki nu ta konpara kes ki ta obi ku Jeová i kes ki ka ta obi ku el. Repara ki tipu di prubléma kes algen ki ka ta obi ku konsedjus di Deus, ki ten sabedoria, ta pasa pa el. Dipôs, odja modi ki bu vida é mutu más midjór pamodi bu ta obi ku Deus. — Sal. 32:8, 10.

13. Jeová ta obriga-nu obi ku se konsedjus ki ten sabedoria?

¹³ Jeová ta da sabedoria pa tudu algen, má el ka ta obriga ningen pa seta-l. El ta fla kal ki ta ser rezultadu pa kes ki ka ta obi ku sabedoria. (Pro. 1:29-32) Kes ki ta disidi ka obi ku Jeová ‘ta sufri rezultadu di ses konportamentu’. Kel manera di vive li ta traze-s dór, sufrimentu i distruison. Má kes ki ta obi ku kes konsedju di Jeová ki ten sabedoria i ki ta faze sima el ta fla, ta fazedu kel promésa li: ‘Ken ki ta obi-m ta mora na suguransa i el ta fika trankilu sen xinti medu di ninhun disgrasa.’ — Pro. 1:33.

14-15. Kuzê ki nu ta prende ku Provérbios 4:23?

¹⁴ Sigi sabedoria di Deus sénpri ta djuda-nu. Sima dja nu odja é fásil atxa konsedju di Jeová ki ten sabedoria. Pur izénplu, na livru di Provérbios, Jeová ta da bons konsedju ki sénpri ta da bons rezultadu si nu sigi-s na nos dia-dia. Nu ben odja sô kuatu izénplu di kes konsedju ki ten sabedoria.

 ¹⁵ Proteje kuzê ki bu korason ta reprizenta. Bíblia ta fla: ‘Más di ki kalker otu kuza ki bu debe guarda, proteje bu korason, pamodi é di el ki ta ben kes fonti di vida.’ (Pro. 4:23) Pensa na kuzê ki nu meste faze pa nu proteje nos korason. Nu meste kume kumida ki é bon pa saúdi, faze izersísiu i ivita ábitus mariadu. Nu ta faze mésmu kuza pa proteje kuzê ki nos korason ta reprizenta. Nu ta lé Palavra di Deus tudu dia. Nu ta pripara, nu ta sisti i nu ta partisipa na runion. Sénpri nu ta sforsa pa nu partisipa na pregason. I nu ta ivita ten ábitus mariadu óras ki nu ta fika lonji di kalker kuza ki pode prujudika nos manera di pensa, sima diverson mariadu i maus koléga.

16. Pamodi ki Provérbios 23:4, 5 ta djuda-nu txeu gósi?

¹⁶ Sta kontenti ku kel ki bu ten. Bíblia ta da kel konsedju li: ‘Ka bu kansa dimás ta djobe rikéza. Óras ki bu poi bus odju na el, el ta dizaparse, pamodi di sertéza el ta kria aza sima un ágia i el ta bua pa séu.’ (Pro. 23:4, 5) Un algen pode perde kuzas material faxi. Má txeu algen riku i póbri sta preokupadu dimás ku ganha dinheru. É pamodi kel-li ki txeu bês es ta faze kuzas ki ta mantxa ses nómi, ta straga amizadi ki es ten ku otus algen i ti es ta prujudika ses saúdi. (Pro. 28:20; 1 Tim. 6:9, 10) Má sabedoria ta djuda-nu ka preokupa dimás ku dinheru. I kel-li ta djuda-nu ka ten ganánsia, má fika kontenti ku kes kuza ki nu ten. — Ecl. 7:12.

17. Modi ki nu pode ten ‘língua di kes algen sábiu’, sima sta na Provérbios 12:18?

¹⁷ Pensa antis di pâpia. Si nu ka toma kuidadu, kuzas ki nu ta fla pode faze txeu stragu. Bíblia ta fla: ‘Palavras ki ta fladu sen pensa é sima finka algen un spada, má língua di kes algen sábiu é un kura.’ (Pro. 12:18) Nu ta ten bons amigu si nu ka fika ta spadja fadjas ki otus algen ten. (Pro. 20:19) Si nu krê pa kuzas ki nu ta fla kura envês di prujudika otus algen, nu debe intxi nos korason di konhisimentu di Palavra di Deus.  (Luc. 6:45) Óras ki nu ta midita na kuzê ki Bíblia ta fla, kuzas ki nu ta fla ta ser sima un ‘fonti di sabedoria’ ki ta konsola otus algen. — Pro. 18:4.

18. Modi ki Provérbios 24:6 pode djuda-nu ten bons rezultadu na pregason?

¹⁸ Sigi orientasons di organizason. Bíblia ta da kel konsedju li ki ta djuda-nu txeu: ‘É ku bon orientason ki bu ta konsigi faze bu géra, i ku konsedju di txeu algen ta ten vitória.’ (Pro. 24:6, nóta di rodapé) Odja modi ki aplika kel prinsípiu li ta djuda-nu ten bons rezultadu na nos trabadju di prega i inxina. Envês di prega i inxina di nos manera, nu ta tenta sigi kes sujiston ki nu ta dadu. Nu ta resebe orientasons ki ten sabedoria na nos runion, na undi ki irmons ki ten bon spiriénsia ta faze diskursus ku bazi na Bíblia i otus párti pa trena-nu. Tanbê organizason di Jeová ta da-nu publikasons i vídius ki pode djuda algen ntende Bíblia. Bu sta ta prende uza kes feraménta li dretu?

19. Kuzê ki bu ta xinti pamodi Jeová ta da-nu sabedoria? (Provérbios 3:13-18)

¹⁹ Lé Provérbios 3:13-18. Nu ten txeu gratidon pa kes bon konsedju ki nu ta atxa na Palavra di Deus! Na undi ki nu ta staba sen es? Na kel studu li nu odja alguns izénplu di bons konsedju ki sta na livru di Provérbios. É klaru ki Bíblia interu sta xeiu di bons konsedju di Jeová. Nu debe sta disididu na sigi kes konsedju li na tudu kuza na nos vida. Maioria di algen ka ta da valor pa sabedoria di Deus, má nos nu ten sertéza ma ‘kes ki ta pega riju na el ta txomadu di filís.’