PA MARIDU KU MUDJER
1: Konpromisu
KUZÊ KI KEL-LI SIGINIFIKA
Maridu ku mudjer ki ta leba asériu kel promésa ki es faze pa kunpanheru, ta nkara kazamentu kómu un union ki debe dura pa tudu ténpu di ses vida i kel-li ta pô-s ta xinti suguru. Es ta kunfia ma ses maridu ô mudjer ta kontinua lial pa ses union sikrê difikuldadis parse.
Alguns maridu ku mudjer ta xinti ma es é obrigadu kontinua djuntu pamodi ses família i otus algen ta faze-s preson. Má é mutu más midjór óras ki es sta disididu na kontinua djuntu pamodi amor i ruspetu ki es ten pa kunpanheru.
KONSEDJU DI BÍBLIA: ‘Maridu ka debe dexa se mudjer.’ — 1 Coríntios 7:11.
“Si bu ta leba asériu kel promésa ki bu faze pa bu maridu ô bu mudjer, bu debe spéra ma alvês el ta fadja ku bo. Bu ta sta sénpri dispostu pa púrdua i pa pidi diskulpa. Bu ta nkara prublémas sima dizafius, envês di un motivu pa sipara di kunpanheru.” — Micah.
PAMODI KI KEL-LI É INPORTANTI
Si un kazal ka ta leba asériu kel promésa ki es faze pa kunpanheru, óras ki prublémas parse, es ten más xansi di pensa ma es ka fazedu pa kunpanheru i es ta djobe manera pa kaba ku ses kazamentu.
“Txeu algen, óras ki es ta kaza, es ta bai lógu ku ideia ma si ses kazamentu ka da sértu, es ta divôrsia. Óras ki un algen ta kumesa se kazamentu ta pensa lógu na divórsiu, ses konpromisu ta fika fraku désdi komésu.” — Jean.
KUZÊ KI BU PODE FAZE
FAZE UN TÉSTI PA BU KABÉSA
Óras ki nhos sta na meiu di un diskuson. . .
-
Bu ta da kónta ma bu ta xinti rapendidu pamodi bu kaza ku bu maridu ô bu mudjer?
-
Bu ta fika ta sunha kordadu ma bu sta kazadu ku otu algen?
-
Bu ta fla bu maridu ô bu mudjer kuzas sima “N sta ben larga-u” ô “N sta ba djobe algen ki ta da-m valor”?
Si bu responde “sin” pa un ô más di kes pergunta li, nton gósi é ténpu pa bu kumesa ta leba más asériu kel konpromisu ki bu faze ku bu maridu ô bu mudjer.
NHOS PÂPIA KU KUNPANHERU SOBRI KES PERGUNTA LI
-
Nu sta ta leba ménus asériu kel konpromisu ki nu faze pa kunpanheru na kazamentu? Si kel-li sta kontise, é pamodi?
-
Kuzê ki nu pode faze gósi pa nu bira kel konpromisu ki nu faze pa kunpanheru más fórti?
AJUDA
-
Di vês en kuandu, skrebe un bilheti sábi pa bu maridu ô bu mudjer.
-
Poi fotus di bu maridu ô bu mudjer na bu méza di trabadju, asi bu ta mostra ma kel konpromisu ki bu ten ku el é inportanti pa bo.
-
Txoma bu maridu ô bu mudjer tudu dia, óras ki bu sta na trabadju ô óras ki nhos sta lonji di kunpanheru.
KONSEDJU DI BÍBLIA: ‘Kel ki Deus djunta na mésmu kanga, ómi ka debe sipara.’ — Mateus 19:6.
