Tenta sabe verdadi
Prubléma
Txeu algen ta faze diskriminason pamodi es ka sabe tudu informason sobri un asuntu ô pamodi es ta kridita na informasons falsu. Odja alguns izénplu:
-
Alguns patron ta atxa ma mudjeris ka ta konsigi faze kes trabadju tékiniku ô ki ten aver ku siênsia.
-
Pesoas di un país talvês ta fla ma krimi na ses país bira más txeu pamodi stranjerus. I txeu algen ta atxa ma stranjerus é kriminozu mésmu si es ka sabe nada sobri es. I óras ki ten algun buatu sobri novus tipu di krimi txeu algen ta krê fla ma talvês é kes stranjeru ki faze kes krimi.
-
Txeu algen ta atxa ma kes algen ki é difisienti ta sta sénpri tristi ô marguradu.
Kes algen ki ta kridita na mintiras sima kes-li ta tenta atxa izénplus ô próvas pa splika pamodi ki es ta faze diskriminason. I es ta atxa ma kalker algen ki ka ta konkorda ku es é iginoranti.
Prinsípiu di Bíblia
‘Un algen sen konhisimentu é ka un kuza dretu’. — PROVÉRBIOS 19:2.
Kuzê ki kel-li krê fla? Si nu ka sabe verdadi, nu pode toma disizons mariadu. Si nu kridita na tudu kuza ki nu ta obi envês di tenta sabe verdadi, nu ta julga algen di manera mariadu.
Modi ki sabe verdadi ta djuda-nu
Si nu sabe verdadi sobri alguns algen, é más difísil nu kridita na mintiras ki otus algen ta konta sobri es. Óras ki nu sabe verdadi sobri algun grupu di algen, é más fásil ka faze kel grupu diskriminason.
Kuzê ki bu pode faze
-
Lenbra ma óras ki bu obi algun kuza mariadu sobri un grupu di algen, kel-li ka krê fla ma tudu algen di kel grupu é si.
-
Seta ma talvês bu ka sabe tudu kuza sobri un grupu di algen.
-
Tenta ten informasons di kunfiansa.
