Pamodi ki nu ta sufri, nu ta bedja i nu ta móre?
Nos Kriador ta trata-nu sima se fidjus i el ka krê pa nu sufri. Má simé ten txeu sufrimentu na mundu. Pamodi ki kel-li ta kontise?
Nu ta sufri pamodi kuzê ki nos primeru pai ku mai faze
‘Pekadu entra na mundu pamodi un ómi, i mórti entra pamodi pekadu, di es manera mórti spadja pa mundu interu’. — ROMANOS 5:12.
Deus kria nos primeru pai ku mai, Adon ku Eva, ku menti i korpu perfetu. El pripara un lugar na Téra pa es mora, ki éra un paraízu. Kel lugar txomaba Jardin di Éden. Deus fla-s ma es podia kumeba fruta di tudu tipu di arvi di jardin, ménus di un. Má Adon ku Eva disidi kume fruta di kel arvi. I kel-la éra pekadu. (Génesis 2:15-17; 3:1-19) Kantu ki es dizobidese, Deus tra-s di kel jardin i vida fika difísil pa es. Dipôs, Adon ku Eva tevi fidjus i ses fidjus tanbê tevi un vida difísil. (Génesis 3:23; 5:5) Dja ki nu ben di Adon ku Eva, nos tudu nu ta duense, nu ta bedja i nu ta móre.
Tanbê nu ta sufri pamodi kes anju ki rabela
‘Mundu interu sta na puder di Malvadu.’ — 1 JOÃO 5:19.
Kel ‘Malvadu’ é Satanás. El é un anju ki rabela kóntra Deus. (João 8:44; Apocalipse 12:9) Dipôs, otus anju faze mésmu kuza i es djunta ku Satanás. Es ta txomadu di dimónis. Kes anju mau ta uza ses puder pa ngana pesoas i pa afasta-s di nos Kriador. Es ta tenta poi pesoas ta faze kuzas mariadu. (Salmo 106:35-38; 1 Timóteo 4:1) Satanás ku dimónis gosta di faze pesoas sufri.
Alvês nu ta sufri pamodi nu ta toma maus disizon
‘Kel ki algen símia, é kel ki tanbê el ta kodje’. — GÁLATAS 6:7.
Txeu bês, nu ta sufri pamodi pekadu ki nu erda di nos primeru pai ku mai i di influénsia di Satanás na mundu. Má, alvês é nos mê ki ta poi nos kabésa na sufrimentu. Modi? Óras ki algen ta faze kuzas mariadu ô ta toma maus disizon, normalmenti é el ki ta sufri kes mau rezultadu. Má ken ki ta faze kuzas dretu ta ten bons rezultadu. Pur izénplu, un xéfi di família ki é onéstu, trabadjador i ki ta ama se família ta ten bons rezultadu i el ta dexa se família filís. Má si el gasta se dinheru na djogu, na bebe dimás ô si el é prigisozu, tudu se família ta kai na mizéria. Nton, un algen ki ten sabedoria ta sigi konsedjus di nos Kriador. Deus krê pa nu ten txeu kuza bon i ‘txeu pas.’ — Salmo 119:165.
Nu ta sufri pamodi nu sta ta vive na ‘ténpu di fin’
‘Na ténpu di fin, ómis ta ba ama sô ses kabésa, ta ama dinheru, ka ta obi ku pai ku mai, diskontroladu, runhu, ka ta ama kuzas dretu’. — 2 TIMÓTEO 3:1-5.
Txeu algen oji, ta konporta sima Bíblia dja flaba. Ses konportamentu ta mostra klaru ma nu sta ta vive na ‘ténpu di fin’ di es mundu. Bíblia dja flaba ma nu ta sabeba ma nu sta vive na ténpu di fin, óras ki nu odja géras, falta di kumida, grandis tremor di téra i duénsas. (Mateus 24:3, 7, 8; Lucas 21:10, 11) Tudu kes kuza li ta traze txeu sufrimentu i mórti.
