‘Nhos kontinua ta púrdua kunpanheru di korason, sikrê algen tene algun razon di kexa kóntra kel otu.’ — COLOSSENSES 3:13.

Nos tudu nu ta fadja. Nu pode ofende otus ô es pode ofende-nu. Pur isu, nos tudu nu meste púrdua otus algen i nu meste pa es purdua-nu tanbê. Óras ki nu ta púrdua, nu ka ta fika ku rankor di kel algen ki ofende-nu. Nu ka ta ‘paga ningen mal ku mal’ i nu ka ta fika sénpri ta lenbra di fadjas di kel algen. (Romanos 12:17) Má i si nu fika txeu maguadu i nu ka sta para di pensa na kel ki kontise? Nton, nu debe pâpia ku kel algen ku ruspetu i sô nos dôs. Nos obijetivu debe ser faze pas, envês di prova kenha ki ten razon i kenha ki ka ten. — Romanos 12:18.

‘Nhos mostra umildadi i nhos trata otus sima algen más inportanti ki nhos’. — FILIPENSES 2:3.

Óras ki nos é umildi i nu ta mostra ruspetu, pesoas ta gosta di sta ku nos. Es sabe ma nu ta trata-s ku bondadi i konsiderason i ma nu ka ta krê magua-s. Má si nu ta atxa ma nos é  midjór ki otus algen ô si sénpri nu ta insisti na faze kuzas di nos manera, nu ta ranja prublémas i nu ka ta da dretu ku otus algen. Pesoas ka ta krê sta ku nos i nu ta ten poku ô ninhun amigu.

‘Deus ta trata tudu algen igual, i na tudu nasons, el ta seta ken ki ta ruspeta-l i ki ta faze kel ki é dretu.’ — ATOS 10:34, 35.

Nos Kriador ka ta atxa ma alguns algen é midjór di ki otus sô pamodi ses nason, ses língua, ses puzison na sosiadadi ô ses kor di péli. ‘Di un sô ómi, El faze tudu rasa di ómi’. (Atus 17:26, Bíblia Na Prugrésu Di Traduson Pa Lingua Kabuverdianu, BPK.) Kel-li krê fla ma nos tudu é irmons ku irmans. Óras ki nu ta da tudu algen valor i nu ta trata-s ku bondadi, nu ta dexa-s kontenti, nu ta xinti filís i nu ta agrada nos Kriador.

‘Nhos bisti di brandura’. — COLOSSENSES 3:12.

Óras ki nos é brandu, é más fásil pa otus algen txiga na nos. Es ta xinti más avontádi pa pâpia ku nos ô ti pa koriji-nu, pamodi es sabe ma nu ta kontinua kalmu. Mésmu óras ki un algen sta xatiadu ku nos, si nu da-l un respósta di manera brandu, kel-la pode pô-l ta fika kalmu. Provérbios 15:1 ta fla: ‘Un respósta mansu ta branda raiba, má un palavra duru ta omenta raiba.’

‘É más sábi da di ki toma.’ — ATOS 20:35.

Txeu algen oji é ganansiozu i es ta pensa sô na ses kabésa. Má sô ken ki gosta di da é ki é filís di verdadi. (Lucas 6:38) Ken ki gosta di da é filís pamodi el ta ama algen más di ki kuzas ki el ten. I pamodi kel amor li, sénpri el ta mostra gratidon i el ta agradese óras ki otus algen ta faze kuzas pa el. (Colossenses 3:15) Pensa na kel-li: ‘Bu ta gostaba di sta djuntu ku un algen ki é ingratu i ki nunka ka ta da kel ki el ten? Ô bu ta gostaba di sta djuntu ku un algen ki ta mostra gratidon i ki gosta di da?’ Nton, ser kel tipu di algen ki bu krê pa otus algen ser. — Mateus 7:12.