KUZÊ KI PESOAS TA FLA

Txeu algen ta atxa ma é ka mariadu djuga dinheru, désdi ki lei di govérnu ka ta proíbi. Govérnus ta kustuma aprova alguns tipu di jogu di dinheru sima lotaria, i párti di kel dinheru ki ta ganhadu ta uzadu pa djuda pesoas.

KUZÊ KI BÍBLIA TA FLA

Bíblia ka ta pâpia di manera dirétu sobri djuga dinheru, má el ten txeu prinsípiu ki ta mostra kuzê ki Deus ta pensa sobri kel asuntu li.

Ideia di djuga pa ganha dinheru ki otus algen ta perde ta bai kóntra kel konsedju di Bíblia ki ta fla pa nu ‘proteje kóntra tudu tipu di ganánsia’. (Lucas 12:15) Txeu algen ta djuga dinheru pamodi es é ganansiozu. Na lugaris undi kes algen ta djuga es ta fla-s kantu dinheru ki es pode ganha. Má txeu bês es é ka onéstu ku es pamodi es sabe ma kel dizeju di bira riku ta poi kes algen ta gasta txeu dinheru na jogu. Envês di insentiva kes algen pa es ka bira ganansiozu, es ta insentiva-s pa es ganha dinheru sen faze sforsu.

Djuga dinheru ta poi algen ta pensa sô na se kabésa, pamodi es ta krê ganha dinheru ki otus algen ta perde. Má, Bíblia ta insentiva algen pa djobe ‘ka se própi vantaji, má kel di otu algen.’ (1 Coríntios 10:24) Un di kes 10 mandamentu ta fla: ‘Ka bu dizeja. . . nada ki é di bu prósimu.’ (Êxodo 20:17) Óras ki un algen ki ta djuga dinheru krê ganha, na verdadi el sta ta spéra ma otus algen ta perde ses dinheru.

Bíblia ta fla-nu tanbê pa nu toma kuidadu pa nu ka kridita na superstison i na sórti. Na Israel antigu, alguns algen ka tinha fé na Deus i es kumesa ‘ta poi méza pa deus di bon sórti’. Deus ta setaba kel adorason li? Nau. El fla-s: ‘Nhos kontinua ta faze kuzas ki N ta atxa ma é mariadu i nhos skodje kuzê ki N ka gosta.’ — Isaías 65:11, 12.

É verdadi ki na alguns país, párti di kel dinheru ta uzadu na edukason, pa djuda país i na otus kuza ki govérnu ta faze. Má manera ki es ta uza kel dinheru ka ta muda manera ki es ta ganha-l. Es ta ganha kel dinheru ku jogus ki ta poi algen ta bira ganansiozu i ta pensa sô na ses kabésa. Kel-li ta poi kes algen ta pensa ma es pode ganha dinheru sen trabadja.

‘Ka bu dizeja. . .  nada ki é di bu prósimu.’ — Êxodo 20:17.

KUZÊ KI BÍBLIA TA FLA

Bíblia ta aviza-nu ma ‘kes ki sta disididu na fika riku ta kai na tentason, na lasu i na txeu dizeju mariadu i ki ta prujudika-s, ki ta funda ómis na distruison i na disgrasa.’ (1 Timóteo 6:9) Djuga dinheru ten aver ku ‘ganánsia’ i ganánsia ta traze txeu stragu. É pur isu ki Bíblia ta aviza-nu txeu bês i di manera klaru ma nu debe ivita-l. — Efésios 5:3.

Bíblia ta fla ma amor pa dinheru ‘é raís di tudu tipu di kuzas mariadu’. I djuga dinheru pode pô-u ta ama dinheru más txeu, pamodi el ta pô-u ta pensa ma bu pode ganha dinheru sen faze ninhun sforsu. Amor pa dinheru pode bira txeu i el pode kumesa ta sufoka vida di un algen. Kel-li pode traze txeu prubléma i prujudika nos amizadi ku Deus. Bíblia ta fla ma kes algen ki ta ama dinheru ta ‘poi ses kabésa na txeu sufrimentu.’ — 1 Timóteo 6:10.

Óras ki un algen é ganansiozu, el ka ta fika kontenti ku kuzas ki el ten i kel-li ta pô-l ta ser un algen infilís. Bíblia ta fla: ‘Ken ki ta ama prata nunka el ka ta farta di prata, i ken ki ta ama rikéza nunka el ka ta fika kontenti ku kel ki el ta ganha.’ — Eclesiastes 5:10.

Milhons di algen ki kumesa ta djuga dinheru da kónta ma é difísil larga kel vísiu kruel li. Kel-li é un prubléma ki sta na mundu interu. Pur izénplu, alguns rilatóriu ta mostra ma sô na Mérka ten milhons di algen ki é visiadu na djuga dinheru.

Ten un provérbiu ki ta fla: ‘Un rikéza ki kumesa ku ganánsia na fin ka ta ser un benson.’ (Provérbios 20:21) Pamodi vísiu di djuga dinheru, txeu algen fika ku dívida i es perde tudu kuza ki es tinha. Tanbê es kaba ku ses kazamentu, es perde ses trabadju i ses amigu. Faze kel ki Bíblia ta fla-nu ta djuda-nu ivita kes mau rezultadu ki djuga dinheru ta traze.

‘Kes ki sta disididu na fika riku ta kai na tentason, na lasu i na txeu dizeju mariadu i ki ta prujudika-s, ki ta funda ómis na distruison i na disgrasa.’ — 1 Timóteo 6:9.