Djobe ajuda

‘Un algen pode ganha un algen ki sta el sô, má dôs algen djuntu ta konsigi mante firmi kóntra el.’ — Eclesiastes 4:12.

ÓRAS ki otus algen ta djuda-nu, é más faxi nu vense un inimigu. Ka ta nporta é kenha ô é kuzê. Pur isu, si bu krê vense kel ábitu di fuma, é bon bu pidi ajuda na bu família ô na bus amigu ô na kalker otu algen ki ta apoia-u i ki ten paxénxa.

Bu pode pâpia ku un algen ki para di fuma, pamodi el ta konsigi ntende-u i djuda-u. Un irmon na Dinamarka, ki txoma Torben, fla: “Ajuda ki N resebe di otus algen foi inportanti pa mi.” Abraham, ki ta mora na Índia, skrebe kel-li: “Amor di verdadi ki nha família i otus irmon mostra-m djuda-m para di fuma.” Má alvês, ajuda di família i amigus ka ta txiga.

Un ómi ki txoma Bhagwandas, fla: “N fuma duránti 27 anu. Má pamodi N prende na Bíblia ma nu debe larga ábitus mariadu N disidi para. N tenta para di fuma poku-poku. N larga kes amigu ki N tinha antis i N djobe ajuda di dotor. Má nada ka rezolve. Ti ki un dia di noti, N abri nha korason pa Jeová i N inplora-l pa el djuda-m para di fuma. Ti ki enfin N konsigi para!”

Un otu kuza inportanti ki nu debe faze é pripara pa difikuldadis ki pode parse. Kal ki é kes difikuldadi? Kel otu artigu ta pâpia di es.

[Kuadru]

BU DEBE TOMA RAMEDI?

Kel-li é un nogósiu ki ta da txeu dinheru. Antis di bu disidi si bu ta toma kes ramedi ô nau pensa na kes pergunta li:

Modi ki es ta djuda-u? Txeu di kes tratamentu ta djuda pa bu ka xinti txeu mal óras ki bu tenta para di fuma. Má, nen tudu algen ka ta konkorda ma kes ramedi li ta djuda di verdadi.

Kal ki é ses risku? Alguns di kes ramedi ta poi algen ta xinti tontura, depreson i ti gana di mata kabésa. Tanbê bu debe lenbra ma na kes tratamentu es ta da-u otus dróga na lugar di nikotina ki tanbê ta prujudika saúdi. Na verdadi un algen ki ta toma kes ramedi la, ta kontinua visiadu simé.

Ta da pa para sen ramedi? Fazedu un piskiza ki ta mostra ma 88 pursentu di kes algen ki konsigi para di fuma es fla ma es konsigi sen toma ramedi.