LISON 44

Deus gosta di tudu tipu di fésta?

TOKA

Jeová krê pa nu vive sábi i ti pa nu faze fésta di vês en kuandu. Má el gosta di tudu tipu di fésta i feriadu? Modi ki nu pode mostra nos amor pa Jeová na kel asuntu li?

1. Pamodi ki txeu fésta ka ta agrada Jeová?

Bu pode fika dimiradu di sabe ma txeu fésta ta bai kóntra kel ki Bíblia ta inxina ô es ta ben di relijion falsu. Kes tipu di fésta la pode sta ligadu ku fitisaria ô bruxaria ô ku kel ideia ma alma ka ta móre. Alguns fésta pode sta ligadu ku superstison ô ku kel krénsa di distinu. (Isaías 65:11) Jeová ta aviza kes algen ki ta adora-l: ‘Nhos sipara di es i nhos para di toka na kuzas inpuru’. — 2 Coríntios 6:17. a

2. Modi ki Jeová ta xinti ku kes fésta ki ta da un algen ónra dimás?

Jeová ta aviza-nu pa nu ka ‘kunfia na ómi sima nos’. (Lé Jeremias 17:5.) Alguns feriadu ta da governantis ô trópas ónra. Otus é pa komemora indipendénsia ô sinblus di un país, sima bandera. (1 João 5:21) Otus feriadu tanbê ta apoia pulítika ô un organizason ki ta lida ku prublémas na sosiadadi. Modi ki Jeová ta xinti si nu da un algen ô un organizason ónra dimás, inda más si kel organizason ta spadja ideias ki é kóntra Se vontadi?

3. Ki tipu di konportamentu pode poi un fésta ka ta agrada Jeová?

Bíblia ta kondena ‘bebe dimás, féstas diskontroladu i bebedera’. (1 Pedro 4:3) Na alguns fésta, pesoas ka ta kontrola ses kabésa i es ta ten konportamentu mariadu. Pa nu mante nos amizadi ku Jeová, nu meste fika lonji di kes tipu di kuza li.

SABE MÁS

Prende modi ki bu pode poi Jeová kontenti óras ki bu ta toma bons disizon sobri feriadus i féstas.

4. Ka bu partisipa na féstas ki ka ta agrada Jeová

Lé Efésios 5:10, i dipôs pâpia sobri kes pergunta li:

Kuzê ki nu debe lenbra di el óras ki nu ta disidi si nu ta komemora un feriadu?
Ki feriadu txeu algen ta komemora na undi bu ta mora?
Bu ta atxa ma kes feriadu ta agrada Jeová?

Pur izénplu, dja bu kustuma pergunta kuzê ki Deus ta atxa di fésta di anu? Ka ten ninhun párti na Bíblia ki ta fla ma un sérvu di Jeová faze fésta di anu. Má Bíblia ta pâpia di dôs algen ki ka ta sirbiba Jeová ki faze kel-la. Lé Génesis 40:20-22 i Mateus 14:6-10. Dipôs pâpia sobri kes pergunta li:

Kuzê ki kontise igual na kes dôs fésta di anu?
Di akordu ku kes stória li, kuzê ki bu ta atxa ma Jeová ta pensa sobri fésta di anu?

Má simé, bu pode pergunta: ‘Jeová ta nporta mê si N partisipa na un fésta di anu ô na un otu fésta ki Bíblia ka ta aprova?’ Lé Êxodo 32:1-8. Dipôs, odja VÍDIU i pâpia sobri kes pergunta li:

VÍDIU: Féstas i feriadus ki ka ta agrada Deus (5:07)

Pamodi ki nu debe ten sertéza di kuzê ki ta agrada Jeová?
Modi ki nu pode faze kel-la?

Modi ki nu pode sabe si un fésta ka ta agrada Deus

Kel fésta ta bai kóntra kuzas ki Bíblia ta inxina? Tenta sabe pamodi ki kel fésta kumesa ta fazedu.
El ta da ónra dimás pa un algen, un organizason ô sinblus di un país? Nu ta da Jeová ónra más di ki kalker otu kuza i nu ta kunfia ma el ta rezolve tudu prubléma na mundu.
Kes kustumu i kuzas ki ta fazedu na kel fésta ta bai kóntra kel ki Bíblia ta inxina? Nu ten ki mante un konportamentu linpu.

5. Djuda otus algen ruspeta kes kuza ki bu ta kridita na el

Óras ki otus algen sta faze-u preson, pode ser difísil ka partisipa na un fésta ki Jeová ka gosta. Nton, splika bu disizon ku paxénxa i ku jetu. Pa bu odja un izénplu di modi ki bu pode faze kel-li, odja VÍDIU.

VÍDIU: Splika bus krénsa ku jetu (2:01)

Lé Mateus 7:12, i dipôs pâpia sobri kes pergunta li:

Di akordu ku kel versíklu li, bu debe fla bu família ki ka ta sirbi Jeová pa es ka komemora un feriadu?
Kuzê ki bu pode faze pa bu mostra bu família ma nbóra bu ka ta komemora un feriadu ku es, bu ta ama-s i bu ta da-s valor?

6. Jeová krê pa nu ser filís

Jeová krê pa nu pasa momentus sábi djuntu ku nos família i amigus. Lé Eclesiastes 8:15, i dipôs pâpia sobri kel pergunta li:

Modi ki kel versíklu li ta mostra ma Jeová krê pa nu ser filís?

Jeová krê pa se povu divirti i pa es pasa momentus sábi djuntu. Odja VÍDIU di nos kongrésus internasional ki ta mostra klaru ma Jeová krê pa nu pasa momentus sábi djuntu.

VÍDIU: Irmons ta resebedu dretu na kongrésus internasional (5:40)

Lé Gálatas 6:10, i dipôs pâpia sobri kes pergunta li:

Nu meste partisipa na kes feriadu ki txeu algen ta komemora pa mostra ma nu ta ‘faze ben’ pa otus algen?
Kuzê ki ta pô-u más kontenti: Óras ki bu ta da pamodi é un feriadu ô óras ki bu ta da pamodi bu krê?
Txeu Tistimunha di Jeová alvês ta organiza algun kuza spesial pa ses fidjus i es pode ti da-s un prezenti ki es ka staba ta spéra. Si bu ten fidju, kuzê ki bu pode faze di spesial pa el?