Nómi di Deus é Jeová i el ta siginifika “El ta faze kontise.” Jeová é Deus Tudu-Poderozu. É el ki faze tudu kuza. El ten puder di faze kalker kuza ki el krê.

Na língua ebraiku, es ta skrebeba nómi di Deus ku kuatu létra ki ta reprizentadu pa kes létra YHWH ô JHVH. Nómi di Deus ta parse na kes testu orijinal di Bíblia na língua ebraiku uns 7 mil bês. Pesoas di mundu interu ta uza nómi di Deus di maneras diferenti, i es ta fla-l di akordu ku ses língua.

▸ Kapítlu 1, parágrafu 15

Autor di Bíblia é Deus, má el uza ómis pa skrebe-l. É sima si bu avó pidi-u pa bu skrebe-l un karta. Kel karta é di bu avó. Di mésmu manera, Deus uza se spritu santu pa gia kes skritor di Bíblia pa skrebe se pensamentus. Spritu santu di Deus gia-s di monti manera. Alvês el pô-s ta ten vizon ô ta sunha sobri kes kuza ki es ta ben skrebeba dipôs.

▸ Kapítlu 2, parágrafu 5

Prinsípius é ensinus di Bíblia ki ta djuda-nu toma bons disizon. Pur izénplu, kel prinsípiu ki ta fla: ‘Kolega ku algen mariadu ta straga bons konportamentu’, ta inxina-nu ma nu pode faze kuzas dretu si nu kolega ku algen dretu ô nu pode faze kuzas mariadu si nu kolega ku algen mariadu. (1 Coríntios 15:33 ) I tanbê kel otu prinsípiu ki ta fla: ‘É kel ki algen símia, kel ki el ta kodje’, ta inxina-nu ma nu ka ta pode skapa di rezultadu di kuzas ki nu ta faze. — Gálatas 6:7.

▸ Kapítlu 2, parágrafu 12

Profesia é un mensaji di Deus. Pode ser un splikason di vontadi di Deus, ensinu sobri maneras di konporta, un lei ô un julgamentu. Tanbê, el pode ser un mensaji di kuzas ki sta ta ben kontise na futuru. Na Bíblia ten txeu profesia ki dja kunpri.

▸ Kapítlu 2, parágrafu 13

Na Bíblia ten txeu profesia sobri Misías ki kunpri na Jizus. Djobe kuadru “ Profesias sobri Misías.”

▸ Kapítlu 2, parágrafu 17, nóta di rodapé

Jeová faze Téra pa ser un paraízu pa umanus ki ta ama-l mora na el. Se vontadi ka muda. Ka ta dura, el ta ben kaba ku tudu maldadi i el ta ben da se povu vida pa tudu ténpu.

▸ Kapítlu 3, parágrafu 1

Satanás é kel primeru anju ki rabela kóntra Deus. Satanás ta siginifika ‘opozitor’ ô algen ki ta fika kóntra otu algen. El ta txomadu si pamodi el ta luta kóntra Jeová. Tanbê el ta txomadu Diabu ki krê fla ‘algen ki ta labanta alébi’ ô algen ki ta konta mintira pa prujudika otu algen. El ta txomadu si pamodi el labanta Jeová alébi i el ta ngana pesoas.

▸ Kapítlu 3, parágrafu 4

Jeová faze anjus txeu ténpu antis di el faze Téra. Es fazedu pa vive na Séu. Ten más di 100 milhon di anju. (Daniel 7:10 ) Anjus é ka igual ku kunpanheru. Kada un di es ten ses nómi i ses manera di ser. Anjus ki é lial é umildi i es ka ta seta pa umanus adora-s. Ten anjus ki ten más responsabilidadi ki kes otu. Es ta mandadu faze txeu tipu di trabadju. Pur izénplu, alguns di es ta sirbi pértu di tronu di Jeová, otus ta leba mensaji di Jeová. Tanbê es ta proteje i es ta orienta kes algen ki ta sirbi Jeová li na Téra. Alén di kel-li, es ta aplika julgamentus ki Deus manda-s i es ta djuda na trabadju di pregason. (Salmo 34:7; Apocalipse 14:6; 22:8, 9 ) Na futuru, es ta ben sta ku Jizus na géra di Armajedon. — Apocalipse 16:14, 16; 19:14, 15.

▸ Kapítlu 3, parágrafu 5; kapítlu 10, parágrafu 1

Pekadu é tudu kel ki nu ta pensa, ki nu ta xinti ô ki nu ta faze kóntra vontadi di Deus. Deus da-nu lei i prinsípius ki ta djuda-nu ivita faze kuzas mariadu, pamodi pekadu ta prujudika nos amizadi ku el. Na komésu, Jeová faze tudu kuza perfetu. Má kantu ki Adon ku Eva skodje ka obi ku el, es peka, i es dexa di ser perfetu. Es bira bédju i dipôs es móre. Nos tanbê nu ta bira bédju i nu ta móre pamodi pekadu ki nu erda di Adon ku Eva.

▸ Kapítlu 3, parágrafu 7; kapítlu 5, parágrafu 3

Armajedon é géra di Deus pa kaba ku mundu di Satanás i ku tudu maldadi.

▸ Kapítlu 3, parágrafu 13; kapítlu 8, parágrafu 18

Reinu di Deus é un govérnu ki Deus kria na Séu. Jizus dja sta ta governa kómu Rei. Na futuru Jeová ta ben uza Reinu pa kaba ku tudu maldadi. Reinu di Deus ta ben governa Téra interu.

▸ Kapítlu 3, parágrafu 14

Deus faze Jizus primeru, dipôs el faze tudu otus kuza. Jeová manda Jizus pa Téra pa ben móre pa nos. Dipôs ki Jizus matadu, Jeová resusita-l. Gósi Jizus sta ta governa na Séu. El é Rei di Reinu di Deus.

▸ Kapítlu 4, parágrafu 2

Bíblia dja flaba na ki ténpu ki Misías ta parseba. Ta sérba na fin di un ténpu ki ta txomadu 69 simana ki kumesa na anu 455 antis di Jizus i el ta findaba na anu 29.

Modi ki nu sabe ma kes 69 simana ta findaba na anu 29? Kes 69 simana kumesa na anu 455 antis di Jizus, kantu Neemias volta pa Jiruzalen pa ba konpo sidadi. (Daniel 9:25; Neemias 2:1, 5-8 ) Dipôs di kel anu li é sô nu konta kes 69 simana. Un simana ten 7 dia. Má na profesia kada dia bale un anu, pamodi Bíblia ta fla: ‘Un anu pa kada dia’. (Números 14:34; Ezequiel 4:6 ) Nton, si kada simana bale 7 anu, pa nu sabe kantu anu ta pasaba ti ki Misías txiga nu ten ki faze kónta di 69 x 7. Kel-li ta da 483 anu. Si nu konta 483 anu désdi 455 A. J. nu ta txiga na anu 29. É na kel anu li ki Jizus batiza i el bira Misías. — Lucas 3:1, 2, 21, 22.

 Es mésmu profesia ta papiaba di más un simana alén di kes 69. Na kel últimu simana, na anu 33, Misías ta sérba mortu. I na fin di es simana, na anu 36 D.J., notísias sábi di Reinu di Deus, ki antis éra sô pa kes judeu, ta kumesaba ta ser pregadu pa pesoas di otus nason. — Daniel 9:24-27.

▸ Kapítlu 4, parágrafu 7

Bíblia ta inxina ma Jeová Deus é Kriador. El faze Jizus antis di kalker otu kuza. (Colossenses 1:15, 16 ) Jizus é ka Deus Tudu-Poderozu. Nunka el ka fla ma el é sima Deus. Envês di kel-li el fla: ‘Nha Pai é más grandi ki mi.’ (João 14:28; 1 Coríntios 15:28 ) Má alguns relijion ta inxina Trindadi. Es ta fla ma Deus é três pesoa na un sô: Pai, Fidju i spritu santu. Palavra “Trindadi” ka sta na Bíblia. El é un ensinu falsu.

Spritu santu é ka un algen, el é forsa di Deus ki nu ka ta odja. El ta uza es forsa pa faze se vontadi. Pur izénplu, Bíblia ta fla ma kes primeru kriston ‘fika xeiu di spritu santu’. I tanbê Jeová fla: ‘N ta baza nha spritu riba tudu algen.’ — Atus 2:1-4, 17, BPK.

▸ Kapítlu 4, parágrafu 12; kapítlu 15, parágrafu 17

Pamodi ki kristons verdaderu ka ta uza krus pa es adora Deus?

1. Pa txeu ténpu relijions falsu uza krus na ses adorason. Na ténpu antigu, es ta uzaba krus pa adora naturéza ô kuzas ki Deus faze i na adorason falsu ki ta nvolveba séksu. Mésmu 300 anu dipôs di mórti di Jizus, kes sigidor verdaderu di Jizus Kristu ka ta uzaba krus na ses adorason. Txeu ténpu dipôs, Constantino ki éra un inperador di Roma, manda pa uza krus kómu sinblu di relijion kriston. Krus bira ta uzadu pa pode traze más algen pa relijion kriston. Má krus ka tinha nada aver ku Jizus Kristu. Nova Enciclopédia Católica na inglês ta splika: ‘Nu ta atxa krus na kes kultura ki ta izistiba antis di Kristu i dipôs di Kristu.’

2.  Jizus ka móre na krus. Palavra gregu ki traduzidu pa ‘krus’ siginifika un ‘pósti’, un ‘tronku’ ô un ‘arvi’. A Bíblia Companheira na inglês ta fla: ‘Ka ten nada na gregu  [Novu Testamentu] ki ta mostra ma uzadu dôs padás di madera kruzadu.’ Jizus móre pregadu na un pósti.

3. Jeová ka krê pa nu uza ninhun tipu di imaji pa nu adora-l. — Êxodo 20:4, 5; 1 Coríntios 10:14.

▸ Kapítlu 5, paráfrafu 12

Jizus manda se disiplus pa komemora se mórti. Es ta faze-l tudu anu na dia 14 di mês di nizan, na mésmu data ki israelitas ta komemoraba Páskua. Pon ku vinhu ki ta reprizenta korpu i sangi di Jizus ta pasadu pa tudu algen ki sta na Komemorason. Sô kes algen ki ta ba governa ku Jizus na Séu ki ta kume kel pon i ta bebe kel vinhu. Kes algen ki ten speransa di vive pa tudu ténpu li na Téra, ka ta kume kel pon nen es ka ta bebe kel vinhu. Má es ta sisti kel Komemorason pamodi es ta da valor pa kuza ki Jizus faze pa nos.

▸ Kapítlu 5, parágrafu 21

Na Tradução do Novo Mundo na inglês palavra alma ta siginifika: (1) algen, (2) animal, ô (3) vida di un algen ô di un animal. Odja alguns izénplu:

• Algen. Bíblia ta fla: ‘Na ténpu di Nué . . . poku algen, ô 8 alma, skapa di agu’. (1 Pedro 3:20 ) Na kel testu li palavra alma ta siginifika algen: Nué ku se mudjer, se três fidju i kes três mudjer di se fidjus.

• Animal. ‘Deus fla: ‘N krê pa agu fika xeiu di kriaturas [ô ‘almas’] bibu, i pa kriaturas ki ta bua, bua pa riba di Téra, na meiu di Séu.’ Dipôs Deus fla: ‘N krê pa Téra intxi di kriaturas [ô ‘almas’] bibu, kada un di se tipu: animal di kaza, animal ki ta rasta i animal brabu di Téra, kada un di se tipu.’ I kontise si.’ — Génesis 1:20, 24, nóta.

•  Vida di un algen ô di un animal. Jeová fla Muizes: ‘Tudu kes ómi ki staba bu tras pa mata-u [‘ki staba tras di bu alma’] dja ká móre.’ (Êxodo 4:19, nóta) Kantu Jizus staba na Téra el fla: ‘Ami é bon pastor, un bon pastor ta da se vida [ô ‘alma’] pa se ovelhas.’ — João 10:11, nóta.

  Alén di kel-li, óras ki un algen ta faze un kuza di ‘tudu alma’, kel-li krê fla ma kel algen ta faze tudu kel ki el pode i di bon vondadi. (Mateus 22:37; Deuteronómio 6:5 ) Palavra alma tanbê pode ser uzadu pa fala di un dizeju ô pititi di un algen ô di un animal. Un algen mortu ô un korpu mortu pode txomadu di alma mortu. — Números 6:6; Provérbios 23:2; Isaías 56:11; Ageu 2:13.

▸ Kapítlu 6, parágrafu 5; kapítlu 15, parágrafu 17

Kes palavra na língua ebraiku i na língua gregu ki traduzidu pa “spritu” na Tradução do Novo Mundo, na inglês, ta siginifika kuzas diferenti. Má sénpri el krê fla un kuza ki nu ka ta pode odja, sima béntu, ô ar ki umanus ô animal ta respira. Kes palavra na língua ebraiku i na língua gregu tanbê pode uzadu pa fala di anjus i spritu santu ki é forsa di Deus. Bíblia ka ta inxina ma algun kuza ta sai di déntu nos i ta kontínua ta vive na un otu lugar óras ki un algen móre. — Êxodo 35:21; Salmo 104:29; Mateus 12:43; Lucas 11:13.

▸ Kapítlu 6, parágrafu 5; kapítlu 15, parágrafu 17

Geena é nómi di un rubera ki ta fikaba pértu di Jiruzalen undi ki es ta kemaba lixu. Ka ten ninhun próva ki ta mostra ma na ténpu di Jizus es ta uzaba kel lugar pa torturaba ô pa kemaba algen ô animal bibu. Nton, Geena é ka un lugar ki nu ka ta odja na undi ki ta kemadu ô  torturadu pesoas ki dja móre pa tudu ténpu. Kantu Jizus papiaba di kes algen ki ta botadu na Geena, el sta ta falaba di distruison konplétu. — Mateus 5:22; 10:28.

▸ Kapítlu 7, parágrafu 20

É kel orason ki Jizus faze pa inxina se disiplus modi ki es debe ora. Pur izénplu, odja modi ki Jizus inxina-nu ora:

• ‘Pa bu nómi ser santifikadu’

  Nu ta faze orason pa Jeová linpa se nómi di tudu mintiras. Asi tudu algen na Séu i na Téra ta ben ruspeta i onra nómi di Deus.

• ‘Faze bu Reinu ben’

  Nu ta faze orason pa govérnu di Deus kaba ku es mundu mau di Satanás, pa governa Téra interu i pa faze Téra bira un paraízu.

• ‘Pa bu vontadi fazedu na Téra’

  Nu ta ora pa vontadi di Deus fazedu na Téra. Asi kes algen ki ta obi ku el pode vive pa tudu ténpu na Paraízu sima Deus kreba désdi komésu.

▸ Kapítlu 8, parágrafu 2

Jeová da resgati pa salva umanus di pekadu i di mórti. Resgati é un présu ki mesteda pa kunpra di vólta kel vida perfetu ki primeru ómi Adon perde. I tanbê pa rekupera amizadi di umanus ku Jeová ki straga. Deus manda Jizus pa Téra pa ben móre pa tudu pekadoris. Pamodi mórti di Jizus, tudu algen ten xansi di bira perfetu i di vive pa tudu ténpu.

▸ Kapítlu 8, parágrafu 21; kapítlu 9, parágrafu 13

Profesia ki sta na livru di Daniel, kapítlu 4, ta mostra-nu ma Reinu de Deus ta kumesaba ta governa na anu di 1914.

Profesia: Jeová da Rei Nabucodonosor un sonhu sobri un arvi grandi ki kortadu. Na kel sonhu podu un sintu di féru ku kóbri na toku di kel arvi. Kel-li éra pa ka dexaba el kria pa ‘séti ténpu.’ Dipôs ki tradu sintu, arvi ta kriaba otu bês. — Daniel 4:1, 10-16.

Kuzê ki kel profesia ta siginifika pa nos: Kel arvi ta reprizenta govérnu di Deus. Duránti monti ténpu Jeová uza reis na Jiruzalen pa governa nason di Israel. (1 Crónicas 29:23 ) Má kes rei dexa di ser fiel pa Deus i ses govérnu finda. Jiruzalen distruídu na anu 607 A.J. É na kel anu la ki kumesa kes ‘séti ténpu.’ (2 Reis 25:1, 8-10; Ezequiel 21:25-27 ) Jizus fla: ‘Kes nason ta ben piza Jiruzalen ti ki kaba kel ténpu markadu pa nasons.’ Kantu Jizus fla kel-li el sta ta papiaba di kes ‘séti ténpu.’ (Lucas 21:24 ) Má kes ‘séti ténpu’ ka finda kantu ki Jizus staba na Téra. Jeová fla ma el ta skodjeba un Rei na fin di kes ‘séti ténpu.’ Jizus skodjedu pa ser Rei i se govérnu ta ben traze txeu kuza sábi pa povu di Deus na mundu interu i pa tudu ténpu. — Lucas 1:30-33.

Modi ki kunpri kes ‘séti ténpu’: Kes ‘séti ténpu’ dura 2.520 anu. Si nu konta 2.520 anu désdi 607 A.J. nu ta txiga na anu 1914. Na anu di 1914 Jeová faze Jizus bira Rei di Reinu di Deus na Séu.

 Modi ki nu txiga es konkluzon? Bíblia ta fla ma três ténpu i meiu ta da 1.260 dia. (Apocalipse 12:6, 14 ) Nton, ‘séti ténpu’ é dobru di 1.260 dia, ki ta da 2.520 dia. Asi 2.520 dia ta bale 2.520 anu, pamodi na profesia sobri govérnu Bíblia ta fla: ‘Un dia pa un anu’. — Números 14:34; Ezequiel 4:6.

▸ Kapítlu 8, parágrafu 23

Bíblia ta fala sô di un xéfi di anjus, i se nómi é Miguel. — Daniel 12:1; Judas 9.

Miguel é kel Xéfi di anjus di Deus. Bíblia ta fla na Apocalipse 12:7: ‘Miguel ku se anjus géra kóntra dragon ku se anjus’. Livru di Apocalipse ta fla ma Xéfi di anjus di Deus é Jizus. Nton, kel-li krê fla ma Miguel é otu nómi ki Jizus ten. — Apocalipse 19:14-16.

▸ Kapítlu 9, parágrafu 4

Ténpu di fin é un ténpu ki ta kontiseba grandis kuza li na Téra antis di Reinu di Deus distrui mundu di Satanás. Bíblia tanbê ta txoma es ténpu, di ‘fin di es sistéma’ i ‘prezénsa di Fidju di Ómi.’ (Mateus 24:3, 27, 37 ) ‘Ténpu di fin’ kumesa na anu 1914, kantu ki Reinu di Deus kumesa ta governa na Séu. I el ta finda óras ki mundu di Satanás distruídu na Armajedon. — 2 Timóteo 3:1; 2 Pedro 3:3.

▸ Kapítlu 9, parágrafu 5

Resureison é óras ki Deus faze un algen mortu vive otu bês. Bíblia ta fala di 9 algen ki resusitadu. Kes algen ki faze resureison é Elias, Elizeu, Jizus, Pedru i Polu. Kes milagri li kontise pamodi puder di Deus. Jeová promete ma el ta ben resusita algen justu i algen injustu pa es ben vive pa tudu ténpu li na Téra. (Atos 24:15 ) Bíblia tanbê ta inxina ma ten resureison pa vida na Séu. Kel-li ta kontise óras ki Deus resusita kes algen ki el skodje pa ba vive na Séu, djuntu ku Jizus. — João 5:28, 29; 11:25; Filipenses 3:11; Apocalipse 20:5, 6.

▸ Kapítlu 9, parágrafu 13

Fitisaria ô bruxaria é óras ki un algen ta tenta pâpia ku dimónis. El pode faze-l ku ajuda di un otu algen, sima un méstri ô un kuranderu. Pesoas ki ta nvolve ku fitisaria ô bruxaria ta faze-l pamodi es ta kridita na kel ensinu falsu ki ta fla ma algen mortu ta kontínua ta vive na un otu lugar, i ma es ta bira spritu ku txeu puder. Dimónis tanbê ta tenta ngana pesoas pa ka obi ku Deus. Es ta uza astrolojia, dibinha futuru, majia, fitisaria, agoru ô indís. Txeu livru, revistas, filmis, kartás i alguns múzika ta poi fitisaria ô bruxaria ta parse ma el é un kuza ki ka ten nada di mariadu ô ti ma el é sábi. Na alguns lugar es ta kustuma faze aniversáriu pa mortus, es ta faze sakrifisius ô es ta da prezentis pa algen ki dja móre. Má tudu kes kuza li ten aver ku dimónis. Ten pesoas ki ta kustuma uza dróga óras ki es ta tenta uza puder di dimónis. — Gálatas 5:20; Apocalipse 21:8.

▸ Kapítlu 10, parágrafu 10; kapítlu 16, parágrafu 4

Jeová é Deus Tudu-Poderozu, i é el ki faze tudu kuza na Séu i na Téra. (Apocalipse 15:3 ) El é donu di tudu kuza, pur isu el ten tudu direitu i autoridadi di governa kuzas ki el faze. (Salmo 24:1; Isaías 40:21-23; Apocalipse 4:11 ) El kria leis pa tudu kuza ki el faze. Jeová tanbê ten autoridadi pa skodje kenha ki el krê pa governa. Nu ta apoia direitu ki Deus ten di governa óras ki nu ta obi ku el i nu ta mostra nos amor pa el. — 1 Crónicas 29:11.

▸ Kapítlu 11, parágrafu 10

Un mudjer grávida pode perde se mininu pamodi un asidenti ô un duénsa. Má Deus ta kondena óras ki un algen ta disidi di se livri vontadi na faze abortu ô tra vida di un mininu ki sta pa nase. Lógu ki mudjer fika grávida, kel mininu ka é sô párti di korpu di kel mudjer. El é un vida, un otu algen.

▸ Kapítlu 13, parágrafu 5

É óras ki ta podu sangi ô un di kes kuatu párti prinsipal di sangi na korpu di un algen. Pode ser sangi di kel algen mê ki staba guardadu, ô sangi di un otu algen. Kes kuatu párti prinsipal di sangi é plasma, glóbulus burmedju, glóbulus branku i plaketas.

▸ Kapítlu 13, parágrafu 13

Na Bíblia, palavra ‘disiplina’ é ka sô un palavra ki krê fla kastigu. Óras ki nu ta resebe disiplina nu sta ta inxinadu, ta idukadu i korijidu. Jeová nunka ka ta disiplina ku abuzu ô ku maldadi. (Provérbios 4:1, 2 ) Jeová ta da bon izénplu pa pai ku mai. Disiplina ki Jeová ta da, sénpri ta da bon rezultadu, ti ki kel algen pode bira ta ama disiplina. (Provérbios 12:1 ) Jeová ta ama se povu i el ta trena-s. El ta da-s instruson ki ta koriji ideias mariadu i ki ta djuda-s prende pensa i aji di manera ki ta dexa-l kontenti. Disiplina ki pai ku mai ta da debe djuda fidjus ntende pamodi ki es debe obi ku es i ku Jeová. Tanbê disiplina ta nvolve inxina fidju ama Jeová, ama se Palavra i ntende prinsípius di Bíblia.

▸ Kapítlu 14, parágrafu 13

Es é anjus mau ki ten mutu más puder ki nos. Nu ka ta odja-s. Es bira anjus mau i inimigus di Jeová kantu es disidi ka obi ku el. (Génesis 6:2; Judas 6 ) Es djunta ku Satanás i es fika kóntra Jeová. — Deuteronómio 32:17; Lucas 8:30; Atos 16:16; Tiago 2:19.

▸ Kapítlu 16, parágrafu 4