Izaki tinha 40 anu kantu el kaza ku Rebeka. El ta amaba el txeu. Dipôs, es ben ten dôs fidju jémiu.

Kel primeru fidju txomaba Izaú i kel sugundu txomaba Jakó. Izaú gostaba di sta na kanpu i el éra un bon kasador di animal. Má Jakó gostaba di sta na kaza.

Na kel ténpu, óras ki un pai moreba, fidju más grandi ta fikaba ku kuazi tudu pártis di txon i ku dinheru di se pai. Kel-la ta txomadu di eransa. Na família di Izaki, eransa ta inkluiba tanbê un párti di kes promésa ki Jeová fazeba Abraon. Izaú ka ta daba ninhun valor pa kes promésa, má Jakó sabeba ma kes promésa éra txeu inportanti.

Un dia Izaú txiga na kaza uma kansadu pamodi el dura ta kasa animal. El xinti txeru di kumida sábi ki Jakó staba ta faze i el fla: ‘N sta ta móre di fómi! Da-m un bokadinhu di kumida!’ Jakó fla-l: ‘N ta da-u, má primeru promete ma bu ta da-m bu eransa.’ Izaú fla: ‘N ka krê ki sabe di eransa! Bu pode fika ku el. Da-m sô nha kumida.’ Bu ta atxa ma Izaú faze dretu? Nau, el ka faze. Izaú perde un kuza rei di inportanti sô pamodi un pratu di kumida.

Kantu Izaki staba más bédju txiga ténpu pa el abênsua se fidju más grandi. Má Rebeka djuda Jakó, se fidju más pikinoti  pa resebe benson. Kantu Izaú da kónta, el fika rei di xatiadu i el rezolve mata se irmon jémiu. Izaki ku Rebeka krê protejeba Jakó, pur isu es fla-l: ‘Bai fika ku bu tiu Labon ti ki Izaú fika más kalmu.’ Jakó obi konsedju di se pai ku se mai i el bai pa se irmon ka mata-l.