Titu 1:1-16
1 Di Paulu, skravu di Deus i apóstlu di Jizus Kristu di akordu ku fé di kes ki Deus skodje i ku kel konhisimentu izatu di verdadi, ki sta di akordu ku adorason pa Deus.
2 Kes kuza li ten bazi na un speransa di vida pa tudu ténpu ki kel Deus, ki ka pode konta mintira, promete dja ten txeu ténpu
3 (má na se própi ténpu, el poi se palavra ta konxedu através di pregason di notísias sábi ki N skodjedu pa N pâpia di es, di akordu ku órdi di nos Salvador, Deus).
4 Pa Titu, un fidju di verdadi di akordu ku kel mésmu fé ki nu ten:
Pa Deus, nos Pai, i pa Kristu Jizus, nos Salvador, mostra-u grandi bondadi i da-u pas.
5 N dexa-u na Kreta pa bu pode koriji kes kuza ki ka sta dretu* i pa bu faze diziginason di ansions na kada sidadi, sima N da-u kes instruson:
6 un ansion debe ser un ómi ki ka sta akuzadu di nada, maridu sô di un mudjer, ki ten fidjus krenti, ki ka sta akuzadu di mau konportamentu* nen di ser rebéldi.
7 Dja ki un enkaregadu é un sérvu di Deus, el ka debe sta akuzadu di nada, el ka debe ser temozu, nen algen ki ta xatia faxi, nen ki ta bebe dimás, nen violéntu,* nen algen ki ten ganánsia pa ganha algun kuza ku dizonestidadi,
8 má ki gosta di resebe algen, ki ta ama kel ki é bon, ki ten bon juís, ki é justu, lial, ki ta kontrola se kabésa,
9 ki ta pega riju na palavra fiel* timenti el ta uza se arti di inxina, asi pa el pode inkoraja* ku kel ensinu ki é bon i pa el koriji* kes ki ta pâpia kóntra kel ensinu.
10 Pamodi ten txeu ómi ki é rebéldi, ki ta pâpia kuzas sen valor i ki ta ingana otus algen, prinsipalmenti kes ki ta fla ma meste fazedu sirkunsizon.
11 Es meste kaladu bóka, pamodi kes ómi li sta kontinua ta distrui famílias interu, ta inxina kuza ki es ka debe, asi pa es ganha algun kuza ku dizonestidadi.
12 Un di es, ses própi proféta, fla: “Kes algen di Kreta es é sénpri mintirozu, animal runhu i es é prigisozu ki ta kume dimás.”
13 Kel tistimunhu li é verdaderu. Pur isu, nhos kontinua ta koriji-s* di manera duru, asi pa ses fé bira fórti,
14 i ka nhos presta atenson na kes stória inventadu di judeus i na kes mandamentu di ómi ki ta disvia algen di verdadi.
15 Tudu kuza é puru pa kes algen ki é puru. Má pa kes ki sta kontaminadu i sen fé, nada é ka puru, pamodi ses menti i ses konsénsia sta kontaminadu.
16 Es ta fla na frenti di tudu algen ma es konxe Deus, má através di ses óbra es ta nega-l, pamodi es é nojéntu, dizobidienti i es ka sta aprovadu pa faze ninhun tipu di bon óbra.
Nótas di rodapé
^ Ô: “ki meste konpo; difisienti”.
^ Ô: “di leba un vida sen régra”.
^ Ô: “nen ki ta sota algen”.
^ Ô: “mensajen di kunfiansa”.
^ Ô: “konsedja”.
^ Ô: “reprende”.
^ Ô: “reprende-s”.
