Karta di Tiagu 4:1-17
4 Di undi ki ta ben kes géra i kes luta entri nhos? Es ka ta ben di nhos dizeju di karni ki ta luta déntu nhos?*
2 Nhos ta dizeja, má nhos ka ta ten. Nhos ta kontinua ta mata i ta dizeja kuzas di otus algen, má nhos ka ta konsigi kel ki nhos krê. Nhos ta kontinua ta luta i ta géra. Nhos ka ten pamodi nhos ka ta pidi.
3 Óras ki nhos ta pidi, nhos ka ta resebe pamodi nhos ta pidi ku obijetivu mariadu, pa nhos pode gasta-l na nhos dizeju di karni.
4 Nhos ki é infiel,* nhos ka sabe ma amizadi ku mundu é inimizadi ku Deus? Pur isu, ken ki krê ser amigu di mundu el ta bira inimigu di Deus.
5 Ô nhos ta atxa ma Skrituras ka ten razon di fla: “Kel spritu ki pasa ta mora na nos kontinua xeiu di dizeju invejozu”?
6 Má kel bondadi ki Deus ta mostra-nu é mutu más grandi. Pur isu, Skrituras ta fla: “Deus ta fika kóntra kes orgulhozu, má el ta mostra se grandi bondadi pa kes ki é umildi.”
7 Pur isu, nhos obi ku Deus, má nhos fika kóntra Diabu i el ta fuji di nhos.
8 Nhos txiga pértu di Deus, i el ta txiga pértu di nhos. Nhos linpa nhos mô, anhos ki é pekador, i nhos purifika nhos korason, anhos ki tene dúvida.
9 Nhos fika tristi, nhos lamenta i nhos txora. Pa nhos sorizu bira txoru, i nhos alegria bira tristéza.
10 Nhos rabaxa dianti di Jeová* i el ta engrandese nhos.
11 Irmons, nhos para di pâpia kóntra kunpanheru. Ken ki ta pâpia kóntra un irmon ô ta julga se irmon el sta pâpia kóntra lei i el sta julga lei. Nton si bu sta julga lei, bu ka sta kunpri lei má bu sta ta ser un juís.
12 Ten sô un ki ta faze lei i ki é Juís, kel ki pode salva i distrui. Má abo, bo é kenha pa bu julga bu prósimu?
13 Gósi nhos obi, nhos ki ta fla: “Oji ô manhan nu ta viaja pa kel sidadi li, i nu ta pasa un anu la, nu ta faze nogósiu i nu ta ganha dinheru”,
14 enbóra nen nhos ka sabe modi ki ta ser nhos vida manhan. Pamodi nos é sima un nevueru ki ta parse pa poku ténpu i dipôs ta dizaparse.
15 Envês di kel-li, nhos debe flaba: “Si Jeová* krê, nu ta vive i nu ta faze kel-li ô kel-la.”
16 Má anhos é orgulhozu i nhos ta ilojia sô nhos kabésa. Má kel tipu di orgulhu li é mariadu.
17 Pur isu, si algen sabe faze kel ki é dretu i simé el ka ta faze-l, el sta ta peka.
Nótas di rodapé
^ Na gregu ta fla: “na nhos ménbru”.
^ Na gregu ta fla: “Nhos ki ta faze adultériu”.
