Romanus 4:1-25
4 Nton si é si, kuzê ki nu pode fla sobri Abraon, nos pai?*
2 Pur izénplu, si Abraon txomadu justu pamodi kuzas ki el faze, el ta tinha motivu pa ingaba di kel-li pa otus algen, má pa Deus nau.
3 Pamodi kuzê ki Skrituras ta fla? “Abraon poi fé na Jeová,* i pamodi se fé, Deus fla ma el é justu.”
4 Óras ki un ómi ta trabadja, se pagamentu é ka un bondadi ki es ta faze-l, má é un kuza ki es ta debe-l.
5 Má imajina un ómi ki ka ta faze óbras, má ki ta poi fé na Deus. Deus, ki é kel ki ta fla ma un algen mau é justu, ta fla ma kel ómi é justu pamodi se fé.
6 Di mésmu manera, Davidi tanbê pâpia di alegria di kel ómi ki Deus ta fla ma é justu sen djobe pa se óbra:
7 “Filís é kes ki purduadu kes kuza mariadu ki es faze i kes ki ses pekadu kubridu.*
8 Filís é kel ómi ki Jeová* ka ta leba en kónta se pekadu di ninhun manera.”
9 Nton, kel alegria é sô pa kes algen ki sirkunsidadu ô tanbê é pa kes algen ki ka sirkunsidadu? Pamodi nu ta fla: “Fé di Abraon poi Deus ta fla ma el é justu.”
10 Ki ténpu ki Deus fla ma el é justu pamodi se fé? Kantu el staba sirkunsidadu ô kantu el ka staba sirkunsidadu? É kantu el ka staba sirkunsidadu.
11 I el resebe un sinal, ki é sirkunsizon, sima un sélu* di justisa pamodi fé ki el tinha kantu inda el ka staba sirkunsidadu, asi pa el sérba pai di tudu kes ki ten fé ki ka sirkunsidadu, pa Deus pode fla ma es é justu.
12 Tanbê, el bira pai di kel disendénsia ki faze sirkunsizon. Ka sô di kes ki faze sirkunsizon, má tanbê di kes ki sigi di pértu kes pasu di fé ki nos pai Abraon da timenti inda el ka staba sirkunsidadu.
13 Pamodi ka foi através di lei ki Abraon i se disendénsia* resebe promésa ma el ta sérba erderu di un mundu, má foi através di justisa pamodi fé.
14 Si éra através di lei ki pesoas ta erdaba promésa, nton fé ta bira sen valor i kel promésa ki Abraon fazedu ka ta siginifikaba nada.
15 Na verdadi, lei ta traze raiba di Deus, má undi ki ka ten lei, tanbê el ka ta violadu.
16 Abraon resebe kel promésa através di se fé. Pur isu, kel-li foi pamodi kel grandi bondadi di Deus, asi pa kel promésa ben kunpri pa tudu se disendénsia,* ka sô pa kes ki ta sigi lei, má tanbê pa kes ki ta sigi fé ki Abraon mostra. El é pai di nos tudu.
17 (É sima sta skrebedu: “N pô-u ta bira pai di txeu nason.”) Abraon mostra se fé dianti di Deus, kel ki ta da mortus vida i ta pâpia di kuzas ki ka izisti sima si es izisti.*
18 Enbóra sen speransa, má ku bazi na speransa, el tinha fé ma el ta biraba pai di txeu nason di akordu ku kel ki fladu: “É si ki bu disendénsia* ta ben ser.”
19 Enbóra se fé ka bira fraku, el da kónta ma se korpu dja staba sima ki mortu (dja ki el tinha uns 100 anu), i tanbê el sabia ma Sara dja staba grandi dimás pa ten fidju.
20 Má pamodi kel promésa di Deus, el ka duvida pamodi falta di fé. Má el bira poderozu pamodi se fé i el da Deus glória.
21 I el tinha tudu serteza ma Deus ta konsigi fazeba kel ki El prometeba.
22 Pur isu, pamodi se fé “Deus fla ma el é justu”.
23 Má, kes palavra “Deus fla ma el é” ka skrebedu sô pamodi el,
24 má tanbê pamodi nos. Nos tanbê, Deus pode fla ma nos é justu, pamodi nu ta kridita na El, ki resusita* Jizus, nos Sinhor.
25 El intregadu pamodi nos fadja i el resusitadu,* asi pa Deus pode fla ma nos é justu.
Nótas di rodapé
^ Na gregu ta fla: “nos pai di akordu ku karni”.
^ Ô: “purduadu”.
^ Ô: “garantia; konfirmason”.
^ Na gregu ta fla: “simenti”.
^ Na gregu ta fla: “simenti”.
^ Ô talvês: “ta poi ta izisti kel ki ka izisti”.
^ Na gregu ta fla: “simenti”.
^ Na gregu ta fla: “labanta di mórti”.
^ Na gregu ta fla: “labantadu”.
