Sugundu livru di Samuel 22:1-51
22 I Davidi kanta kel kántiku li pa Jeová, na kel dia ki Jeová libra-l di mô di tudu se inimigus i di mô di Saul.
2 El fla:
“Jeová é nha rótxa i nha proteson. El é nha salvador.
3 Nha Deus é nha rótxa, na undi ki N ta djobe proteson,El é nha skudu i nha salvador* poderozu. El é nha proteson suguru.*El é kel lugar ki N ta fuji pa el, nha salvador ki ta salva-m di violénsia.
4 N ta txoma Jeová, ki merese lovor,I N ta salvadu di nhas inimigu.
5 Óndias di mórti kebra na nha ladu,Medu toma kónta di mi pamodi un monti ómi mau serka-m sima txeia.
6 Kes kórda di Sipultura* inrola na mi,Mórti poi un armadilha na nha frenti.
7 Na nha sufrimentu, N txoma Jeová,N kontinua ta txoma nha Deus.
Nton, la di se ténplu el obi nha vós,I nhas gritu di ajuda txiga na se obidu.
8 Téra kumesa ta sakudi i ta treme.Kes alisérsi di séu fika ta balansaI es sakudi pamodi el fika xatiadu.
9 Fumu staba ta sai di se narísI un lumi fórti staba ta sai di se bóka.El staba ta kuspi braza kenti.
10 El poi séu ta inbaxa i el dixi,I staba núven sukuru dibaxu di se pé.
11 El ben ta bua, montadu na un kerubin.
El parse na aza di un spritu.*
12 Nton, pa el sukundi, el poi sukuru na se vólta,Agu sukuru i núvens xeiu di agu.
13 Di kel lus ki staba se dianti sai braza kenti.
14 Nton, Jeová kumesa ta pâpia la di séu sima strubada,*I Kel Más Grandi poi se vós ta obidu.
15 El da ku se flexa i el spadja-s,I kantu el manda se relánpagu, es fika dizorientadu.
16 Fundu di mar fika ta parse klaru,Kes alisérsi di téra fika ta parse kantu Jeová mostra se raiba,Pamodi béntu fórti ki sai di se narís.
17 La di altu el longa mô,El pega-m i el tra-m di kes agu na lugar fundu.
18 El salva-m di nha inimigu ki é fórti,Di kes ki ta odiaba mi i ki éra más fórti di ki mi.
19 Es ataka-m na dia di nha disgrasa,Má Jeová djuda-m.
20 El leba-m pa un lugar suguru,*El libra-m pamodi el staba kontenti ku mi.
21 Jeová ta rekonpensa-m di akordu ku nha justisa,El ta paga-m di akordu ku inosensia* di nha mô.
22 Pamodi sénpri N sigi kaminhus di Jeová,I N ka faze pekadu di bandona nha Deus.
23 N ta pensa sénpri na tudu se mandamentu,N ka ta disvia di se lei.
24 N sta disididu na mante sen kulpa se dianti,I N ta toma kuidadu pa N ka faze ninhun éru.
25 Pa Jeová paga-m di akordu ku nha justisa,Di akordu ku nha inosensia se dianti.
26 Kel algen ki é lial, bu ta trata-l ku lialdadi.Kel ómi ki é balenti i sen kulpa, bu ta trata-l di manera ki bu ta fika sen kulpa tanbê.
27 Bo é puru ku kel algen ki é puru,Má bu ta ingana kes algen ki ta faze kuzas mariadu.*
28 Pamodi bu ta salva kes algen umildi,Má bus odju ta fika kóntra kes algen ki é orgulhozu i bu ta rabaxa-s.
29 Pamodi abo é nha lánpida, ó Jeová,É Jeová ki ta límia nha sukuru.
30 Ku bu ajuda, N ta pode ataka un grupu di bandidu.Ku forsa di Deus N ta pode subi un muralha.
31 Kaminhu di kel Deus verdaderu é perfeitu,Palavra di Jeová é puru.*
El é un skudu pa tudu kes ki ta djobe proteson na el.
32 Pamodi ken ki é Deus alén di Jeová?
I ken ki é rótxa si é ka nos Deus?
33 Kel Deus verdaderu é nha proteson,El ta bira nha kaminhu perfeitu.
34 El ta poi nha pé ta bira sima di un viadu,I el ta pô-m ta fika di pé na kes lugar altu.
35 El ta trena nha mô pa géra,Nhas brasu pode dobra un arku* di kóbri.
36 Bu ta da-m bu skudu di salvasonI bu umildadi ta bira-m grandi.
37 Bu ta bira nha kaminhu más largu pa N anda na el.Nha pé ka ta skorega.
38 N ta pirsigi nhas inimigu i N ta distrui-s.N ka ta volta timenti N ka kaba ku es.
39 N ta distrui-s i N ta kaba ku es, asi es ka ta labanta más.Es ta kai i N ta poi nha pé riba di es.
40 Bu ta da-m forsa pa géra.Bu ta poi nhas inimigu ta kai nha dianti.
41 Bu ta poi nhas inimigu ta fuji di mi*I N ta kaba ku kes ki ta ôdia-m.
42 Es ta grita pa ajuda, má ka ta ten algen pa salva-s.Ti mésmu es ta pidi Jeová pa djuda-s, má el ka ta responde-s.
43 N ta muí-s ti ki es fika finu sima puera,N ta pila-s i N ta masa-s sima lama na rua.
44 Bu ta salva-m di kes krítika di nha povu.
Bu ta proteje-m pa N ser xéfi di nasons,I un povu ki N ka konxe ta ben sirbi-m.
45 Kes stranjeru ta ben inbaxa nha dianti xeiu di medu,Kes kuza ki es obi sobri mi ta pô-s ta obi ku mi.*
46 Kes stranjeru ta perde koraji,*I es ta sai ta treme di ses lugar di proteson.
47 Jeová é un Deus bibu! Pa nha rótxa lovadu!
Pa nha Deus, kel rótxa di nha salvason, dadu glória.
48 Kel Deus verdaderu ta vinga pa mi.El ta poi povus dibaxu di nha autoridadi.
49 El ta salva-m di nhas inimigu.
Bu ta pô-m la na altura, lonji di kes ki ta ataka-m.Bu ta salva-m di ómi violéntu.
50 Ó Jeová, é pur isu ki N ta ben agradese-u, djuntu ku pesoas di nason,I N ta ben kanta lovor* pa bu nómi.
51 Deus faze kuzas grandi* pa salva se rei.El ta mostra amor lial pa kel algen ki el skodje,Pa Davidi i pa se disendenti* pa tudu ténpu.”
Nótas di rodapé
^ Na ebraiku ta fla: “txifri di salvason”. Djobe Disionáriu di Bíblia.
^ Ô: “proteson na un lugar altu”.
^ Ô: “Seol”. Kel-li krê fla sipultura ki ta podu tudu algen. Djobe Disionáriu di Bíblia.
^ Ô: “di béntu”.
^ Ô: “truvon”.
^ Ô: “más largu”.
^ Na ebraiku ta fla: “puréza”.
^ Ô talvês: “bu ta aji sima un algen ki ka ta pensa”.
^ Ô: “refinadu na lumi”.
^ Djobe Disionáriu di Bíblia.
^ Ô: “bu ta da-m kósta di nhas inimigu”.
^ Na ebraiku ta fla: “Óras ki ses obidu obi, es ta obi ku mi”.
^ Ô: “ses koraji ta dizaparse”.
^ Ô: “faze múzika”.
^ Ô: “grandis vitória”.
^ Na ebraiku ta fla: “simenti”.
