Ézudu 5:1-23
5 Dipôs, Muizés i Aron bai na Faraó i es fla-l: “Jeová, kel Deus di Israel, fla: ‘Dexa nha povu bai komemora un fésta pa mi na dizértu.’”
2 Má Faraó fla: “Ken ki é Jeová ki N ten ki obi ku se vós pa N dexa Israel bai se kaminhu? N ka konxe Jeová, inda más N ka sta dexa Israel bai se kaminhu.”
3 Má es fla: “Kel Deus di ebreus pâpia ku nos. Favor, nu krê faze un viajen di três dia na dizértu pa oferese Jeová, nos Deus, un sakrifisiu, sinon el ta kastiga-nu ku duénsa i ku spada.”
4 Rei di Ijitu responde-s: “Muizés i Aron, pamodi ki nhos sta tra povu di ses trabadju? Nhos volta pa nhos trabadju!”
5 I Faraó tanbê fla: “Gósi ki kel povu* li dja bira txeu, nhos krê pa es para di trabadja?”
6 Na kel mésmu dia, Faraó da kes kapatás i ses ajudanti kel órdi li:
7 “Ka nhos da povu padja más pa faze tijolu. Nhos dexa-s bai djunta padja es mê.
8 Má nhos iziji-s kel mésmu kuantidadi di tijolu ki es ta fazeba antis. Ka nhos iziji más poku, pamodi es sta ta bira prigisozu.* É pur isu ki es sta ta pidi: ‘Nu krê bai, nu krê oferese un sakrifisiu pa nos Deus!’
9 Nhos pô-s ta trabadja más duru inda i nhos pô-s ta fika okupadu, asi pa es ka presta atenson na kes mintira.”
10 Nton, kes kapatás i ses ajudanti bai na povu i es fla: “É si ki Faraó fla: ‘N ka sta da nhos padja más.
11 Nhos bai djobe anhos na undi ki nhos ta atxa padja, má nhos ten ki kontinua ta faze kel mésmu kuantidadi di tijolu.’”
12 Nton, povu spadja pa téra di Ijitu interu pa djunta padja ki ta restaba di kodjéta.
13 I kes kapatás kontinua ta faze-s preson. Es ta flaba: “Tudu dia, kada un di nhos debe tirmina se trabadju, sima nhos ta fazeba kantu es ta daba nhos padja.”
14 Tanbê es sota kes ajudanti ki éra israelita, ki kes kapatás di Faraó skodjeba pa toma kónta di israelitas. Kes kapatás pergunta-s: “Pamodi ki nen onti nen oji nhos ka faze kel mésmu kuantidadi di tijolu ki nhos ta fazeba antis?”
15 Nton, kes ajudanti israelita bai kexa na Faraó i es fla: “Pamodi ki nho sta trata sérvus di nho asi?
16 Es ka ta da sérvus di nho padja, i inda es ta fla-nu: ‘Nhos faze tijolu!’ Sérvus di nho sta ta sotadu, má é própi povu di nho ki é kulpadu.”
17 Má el fla-s: “Nhos sta ta bira prigisozu!* É pur isu ki nhos sta fla: ‘Nu krê bai, nu krê oferese sakrifisiu pa Jeová.’
18 Gósi nhos bai, nhos volta pa trabadju! Nhos ka ta dadu padja, má simé nhos debe faze kel mésmu kuantidadi di tijolu.”
19 Nton, kes ajudanti israelita fika na un situason txeu difísil pamodi kel órdi ki es dadu: “Nhos ka debe faze kuantidadi más poku di tijolu pur dia.”
20 Dipôs, kantu es sai di dianti di Faraó, es inkontra ku Muizés i Aron ki staba la ta spera-s.
21 I lógu es fla-s: “Pa Jeová odja kuzê ki nhos faze i pa el julga nhos, pamodi nhos poi Faraó i se sérvus ta dispreza-nu,* i nhos poi un spada na ses mô pa es mata-nu.”
22 Nton, Muizés ora pa Jeová i el fla: “Jeová, pamodi ki nho poi povu ta sufri? Pamodi ki nho manda-m?
23 Désdi ki N bai pâpia ku Faraó na nómi di nho, el sta trata povu piór di ki antis i nho ka faze nada pa salva povu di nho.”
Nótas di rodapé
^ Na ebraiku ta fla: “povu di téra”.
^ Ô: “es sta ta relaxa korpu”.
^ Ô: “Nhos sta ta relaxa”.
^ Ô: “nhos pô-nu ta txera mal pa Faraó i se sérvus”.
