Ézudu 33:1-23
33 Tanbê, Jeová fla Muizés: “Bai djuntu ku povu ki bu tra di téra di Ijitu pa kel téra ki N jura Abraon, Izaki i Jakó, kantu N fla: ‘N ta da nhos disendenti* kel téra li.’
2 N ta manda un anju na nhos frenti i N ta kóre ku kes kananeu, kes amoreu, kes itita, kes perizeu, kes eveu i kes jebuzeu.
3 Bai pa un téra ki ta da leti ku mel. Má, N ka ta bai ku nhos, pamodi nhos é un povu temozu i N podia kababa ku nhos tudu na kaminhu.”
4 Kantu povu obi kes palavra duru li, es kumesa ta txora i ningen ka uza ses jóia.
5 Jeová fla Muizés: “Fla kes israelita: ‘Nhos é un povu temozu. Di un óra pa kel otu N podia pasaba na nhos meiu i kaba ku nhos tudu. Gósi, nhos kontinua sen nhos jóia timenti N ta odja kuzê ki N ta faze ku nhos.’”
6 Pur isu, kes israelita tra ses jóia na monti Orebe i es ka torna pô-s más.
7 Nton, Muizés panha se ténda i el arma-l un bokadinhu lonji di kanpamentu, i el txoma-l di ténda di runion. Tudu ken ki ta djobeba orientason di Jeová ta baba pa ténda di runion, ki ta fikaba fóra di kanpamentu.
8 Óras ki Muizés ta baba pa ténda, povu interu ta fikaba di pé na entrada di ses própi ténda i es ta sigiba Muizés ku odju ti ki el entraba na ténda.
9 Lógu ki Muizés ta entraba na ténda, kel kuluna di núven ta dixiba i ta fikaba na entrada di ténda, timenti Deus ta papiaba ku Muizés.
10 Óras ki povu interu ta odjaba kel kuluna di núven paradu na entrada di ténda, kada un ta inbaxaba na entrada di se própi ténda.
11 Jeová ta papiaba ku Muizés róstu ku róstu, sima un ómi ta pâpia ku un otu ómi. Óras ki Muizés ta voltaba pa kanpamentu, Juzué, fidju di Nun, ki éra se sérvu i se ajudanti, ka ta saíba di ténda.
12 Nton Muizés fla Jeová: “Bu fla-m: ‘Gia kel povu li’, má bu ka dexa-m sabe ken ki bu ta manda ku mi. Tanbê bu fla-m: ‘N konxe-u pa nómi,* i N sta kontenti ku bo.’
13 Favor, si bu sta kontenti ku mi, pô-m ta konxe bus kaminhu, pa N pode konxe-u i pa bu pode kontinua kontenti ku mi. Lenbra tanbê ma kel nason li é bu povu.”
14 Nton el fla: “É mi própi ki ta bai ku bo, i N ta da-u pas.”
15 Nton Muizés fla-l: “Si bu ka bai ku nos, ka bu manda-nu bai di li.
16 Modi ki pesoas ta sabe ma bu sta kontenti ku mi i ku bu povu? Si bu ben ku nos, ami i bu povu, nu ta ser diferenti di kes otu povu di téra.”
17 Jeová fla Muizés: “Tanbê N ta ben faze kuzê ki bu pidi, pamodi N sta kontenti ku bo i N konxe-u pa bu nómi.”
18 Muizés fla: “Favor, mostra-m bu glória.”
19 El responde: “N ta poi tudu nha bondadi ta pasa bu dianti, i N ta pô-u ta konxe nha nómi, Jeová. I N ta mostra ma N sta kontenti ku ken ki N mostra ma N sta kontenti. I N ta mostra mizerikórdia pa ken ki N mostra mizerikórdia.”
20 Má dipôs el fla-l: “Bu ka pode odja nha róstu, pamodi ninhun ómi ka ta pode odja-m i kontinua bibu.”
21 Jeová fla tanbê: “Li ten un lugar pértu di mi. Fika riba di rótxa.
22 Óras ki nha glória sta ta pasa, N ta pô-u na un braku di rótxa i N ta kubri-u ku nha mô ti ki N pasa.
23 Dipôs, N ta tra nha mô i bu ta odja nha kósta. Má bu ka pode odja nha róstu.”
