Ézudu 20:1-26
20 Nton, Deus fla tudu kes palavra li:
2 “Ami é Jeová, bu Deus, ki tra-u di téra di Ijitu, kel téra undi ki bu éra skravu.
3 Bu ka debe ten otus deus alén di mi.*
4 “Ka bu faze ninhun imajen na fórma di státua pa bo, nen ninhun fórma di algun kuza ki ten di riba na séu, ô dibaxu na téra, ô na agu dibaxu di téra.
5 Ka bu inbaxa ses dianti nen ka bu sirbi-s, pamodi ami Jeová, bu Deus, ami é un Deus ki ta iziji pa adora-m sô mi, i ki ta traze kastigu pamodi éru di pai riba ses fidju, riba kel tirseru jerason i riba kel kuartu jerason di kes ki ta odia-m,
6 má ki ta mostra amor lial pa tudu ténpu* pa kes ki ta ama-m i ki ta obi ku nhas mandamentu.
7 “Bu ka debe uza nómi di Jeová, bu Deus, atoa, pamodi Jeová ka ta dexa di kastiga kel ki uza Se nómi atoa.
8 “Lenbra di dia di sábadu pa bu mante-l sagradu.
9 Bu ten 6 dia pa bu trabadja i pa bu faze tudu kuza ki bu ten pa faze,
10 má kel sétimu dia é un sábadu pa Jeová, bu Deus. Bu ka debe faze ninhun trabadju, nen bo, nen bu fidju matxu, nen bu fidju-fémia, nen bu skravu, nen bu skrava, nen bu animal doméstiku, nen kel stranjeru ki ta mora ku bo déntu di bu kanpamentu.*
11 Pamodi na 6 dia Jeová faze séu, téra, mar i tudu kuza ki ten na es, i el kumesa ta diskansa na sétimu dia. É pamodi kel-li ki Jeová abênsua dia di sábadu i el bira-l sagradu.
12 “Onra bu pai ku bu mai, pa bu pode vive txeu ténpu na téra ki Jeová, bu Deus, sta ta da-u.
13 “Bu ka debe mata.
14 “Bu ka debe faze adultériu.
15 “Bu ka debe furta.
16 “Bu ka debe da tistimunhu falsu óras ki bu ta sirbi di tistimunha kóntra bu prósimu.
17 “Ka bu dizeja kaza di bu prósimu. Ka bu dizeja mudjer di bu prósimu, nen se skravu, nen se skrava, nen se boi, nen se buru, nen nada ki é di bu prósimu.”
18 Povu interu obi kes strubada* i son di buzina i es odja kes relánpagu i monti ta bota fumu. Nton, es fika ta treme di medu i es fika di lonji.
19 Pur isu, es fla Muizés: “Pâpia abo ku nos i nu ta obi, má pa Deus ka pâpia ku nos pa nu ka móre.”
20 Nton, Muizés fla povu: “Ka nhos xinti medu, pamodi Deus verdaderu sta poi nhos na próva, pa nhos kontinua ta ten grandi ruspetu pa el, asi pa nhos ka peka.”
21 Nton, povu kontinua lonji, má Muizés txiga pértu di kel núven sukuru undi ki Deus verdaderu staba.
22 Dipôs Jeová fla Muizés: “É kel-li ki bu ten ki fla kes israelita: ‘Nhos odja ku nhos própi odju ma N pâpia ku nhos la di séu.
23 Nhos ka debe faze deus di prata pa nhos adora alén di mi, nen nhos ka debe faze deus di oru pa nhos.
24 Bu debe faze-m un altar di téra. Na el, bu debe oferese bus oférta kemadu i oferese bu sakrifisiu di pas, ovelha i toru. Na tudu lugar undi ki nha nómi ta lenbradu di el, N ta bai la i N ta abensua-u.
25 Si bu faze un altar di pédra pa mi, ka bu uza pédras ki kortadu ku un feraménta. Pamodi si bu uza un feraménta, bu ta bira kel altar inpuru.
26 I ka bu subi nha altar pa digrau, pa es ka odja-u pa baxu di bu ropa.’*
Nótas di rodapé
^ Ô: “kóntra mi”.
^ Ô: “ti pa milézimu jerason”.
^ Na ebraiku ta fla: “di bus porton”.
^ Ô: “truvon”.
^ Na ebraiku ta fla: “pa es ka odja-u nu”.
