LISHOMO 40
Tulota kuva dashi tuvambone pameo pake Nnungu?
Nkumbukile jujumunu ampanganianga mwanagwe pakulota auke kushikola. Nae anakikisha kenga animwinganga medi na dinguvo dyake dyambone. Kutenda davo kunampwashela mwana kuvanavo shingumi shambone na vanu vanji vandona kenga vatatavake vankushunga shana. Kenga vatatamunu valota mwana ave wambone, Tatagwetu Yeova ankulota wetu tuve tuvambone mumili na mumakumbukililo. Wetu tukava tuvambone, tunapata ipaida na tunamupa ishima Yeova.
1. Tulota kuulula dashi kuva tuvambone mumili?
Yeova ankutwaulila doni ‘Ava mmanashwe.’ (1 Patulu 1:16) Kuva tuvanashwe mana ake kuva tuvambone mumili na makumbukililo. Tunaulula kuva tuvambone mumili kwa kulinga medi kula liduva na dinguvo dyetu, ding’ande na magali letu lakava lambone. Namomo tunkuulula kupwashela kutenda ulanda ku ing’ande yetu ya Utawala. Patuva tuvambone mumili tunamupa Yeova ishima.—2 Vakolintu 6:3, 4.
2. Madyavalelo shani lalota kututadya kuva tuvadagwa?
Ibibiliya inkutwaulila kenga ituvaikidile “tulyushaniange vyaudagwa uti vyamumili na vyamwimumu.” (2 Vakolintu 7:1) Ashi mana ake ituvaikidile tulikanyalidye kuleka shinu shoeshoe shilota kudabuwanga mili na makumbukililo letu. Makumbukililo letu lavaikidile lampuwangidye Yeova. (Dimu 104:34) Pavedoni tunalikanyalidya pakulota kuleka makumbukililo lakunyata. Namomo tunalikanyalidya kuleka malove lakunyata.—Shomya Vakoloshu 3:8.
Nyamani shinji shilota kuulula kutunyatyanga mumili au mumakumbukililo? Vinkupagwa vinu vyoe vilota kuulula kudabuwanga mili wetu. Ndyomana hatunamuta olya na hatunatumila mitela vyakwambalwisha. Patunaleka kutumila vinu avi, tunavanavo shinamilo shambone na tunalodya kenga tunkwishimu shawadi ya shingumi. Namomo tunalikanyalidya kuvanavo makumbukililo lambone kwakuleka malove lakunyata, kenga kuntenda punyeta na kulola video vyakutukana. (Dimu 119:37; Vaepeshu 5:5) Inkuululika kuva shinu shakukamadyanga kuleka madyavalelo ala, kanji Yeova ankuulula kutupwashela kutema.—Shomya Ishaiya 41:13.
LAMBELA KUMANYA VYOE
Lipundishe mwashi mwatulota kuululila kumwishimu Yeova kwakuva tuvambone mumili na mwashi mwatulota kuululila kutema madyavalelo lakunyata.
3. Kutenda ulanda pamili petu kunantumbyanga Yeova
Tunkuulula kumanya maoni amwe Yeova kwaupande wa ulanda kwa kulambela kumanya malamulo lavapéle Yeova Vanaishilaeli kala. Shomya Kuma 19:10 na 30:17-19, na badae mwambangile mwaa vyakudya vya mwina:
-
Kulingana na mishitali avi Yeova avenavo maoni shani kwaupande wa ulanda wa pamili?
-
Madyavalelo shani lalota kukupwashela kuva wambone pamili?
Tunkulota wakati na kulikanyalidya pakulota kutenda ulanda pamili. Ata ikava davo tunkuulula kuva tuvambone palyutu lyoelyoe lyatunama ata tukava tuvamashikini au tuvatajili. Lola VIDEO, na badae mwambangile mwaa shakudya sha mwina.
-
Vanu vatuvandadidya valota kumwishimu dashi Yeova ikava kenga tunkutumila vyombo vyetu na ulanda?
4. Tema madyavalelo lakunyata
Yeova ankuulula kutupwashela pakulota tuteme lidyavalelo lyakunyata
Ikava kenga wako ni umunu unamuta olya au unatumila mitela vyakwambalwisha unkuulula kwona kenga ni shinu shakukamadyanga kutema madyavalelo alo. Nyamani shilota kukupwashela? Kumbukila vinu vyakunyata vinaumilila kwamwaa wa madyavalelo alo. Shomya Mateu 22:37-39 na badae mwambangile mwaa kumuta olya au kutumila mitela vyakwambalwisha vinkwambukisha dashi . . .
-
umbodi wa munu namu Yeova.
-
valikola va munu ajo na vanu vanama namu nae.
Tenda shinu shilota kukupwashela kutema madyavalelo lakunyata. a Lola VIDEO.
Shomya Vapilipo 4:13, na badae mwambangile mwaa shakudya sha mwina:
-
Kuvanavo madyavalelo lambone lakushwali, kulipundisha Ibibiliya na kupagwa pamikutano kulota kumpwashela dashi munu kupata dimongo pakulota kutema madyavalelo lakunyata?
5. Likanyalidye kutema makumbukililo na madyavalelo lakunyata
Shomya Vakoloshu 3:5, na badae mwambangile mwaa vyakudya vya mwina:
-
Tunkumanya dashi kenga kulola video vyakutukana, kutumidya ntenga, na kutenda punyeta ni madyavalelo lakunyata pameo pake Yeova?
-
Da inkuululika kwodedya malamulo lamwe Yeova kwaupande wa ulanda wa mmakumbukililo? Mwaa wa nyamani?
Lipundishe mwashi mwakutamela makumbukililo lakunyata. Lola VIDEO.
Yesu andívalanga mpano ulodya kenga ituvaikidile tutende shinu pakulota tuke mushu tuvanavo makumbukililo lambone. Shomya Mateu 5:29, 30, na badae mwambangile mwaa shakudya sha mwina:
-
Yesu havalenge kenga ituvaikidile tulikate upande wamili wetu, kanji andilodya mwashi mwakumidya wamushi. Munu immaikidile atende nyamani pakulota aleke makumbukililo lakunyata? b
Ikava kenga unkulikanyalidya pakulota kutema makumbukililo lakunyata, Yeova ankwona kulikanyalidya kwako. Shomya Dimu 103:13, 14, na badae mwambangile mwaa shakudya sha mwina:
-
Ikava kenga unkutenda ing’ondo na lidyavalelo lyakunyata, lyaandiko ali lilota kukupwashela dashi kuka mushu utenda ing’ondo ayo?
Haunadobe!
Unkuulula kukumbukila doni, ‘ninditatakela, hangunona shinu ipaida yakuka mushu ngutenda ing’ondo.’ Kanji kumbukila shinu ashi: Nkútukuta pagwanga hainalodya shinu kenga haulula kuka mushu na kutukuta kwake, namomo hainalodya shinu kenga ivaikidile aujile kunyuma na anjange kavili. Nimomo momo, ata ukagwa hainalodya shinu kenga haulula kuka mushu utenda ing’ondo na haulula shinu kutema. Namomo hainalodya shinu kenga kulikanyalidya kwako ni kwa bule. Ni shinu shakawaida kulikuvala. Kanji haunadobe! Na lipwashalelo limwe Yeova, unaulula kutema lidyavalelo lyakunyata.
VANU VANJI VANKUSHIDONI: “Shinu ashi shiningwinjilananga. Hanguulula kuleka.”
-
Ulota kutumila lyaandiko shani pakulota kunnodya munu ajo kenga Yeova ankuulula kumpwashela kuleka lidyavalelo lyakunyata?
KWAUNGWIPI
Tunampuwangidya Yeova tukava tuvambone mumili, mumakumbukililo, na muvitendo vyetu.
Tukumbukilange
-
Mwaa shani ni shinu shikumene kuva tuvalanda?
-
Tulota kuulula dashi kuva tuvambone mumili?
-
Ulota kuulula dashi kutadya makumbukililo na vitendo vyako kuva vyambone?
LIPUNDISHE
Vinu shani víkakamadyanga vivaikidile utende pakulota uvenavo ulanda wa pamili ata ikava kenga hauvenavo vinu vyoe vya pamili?
Lola nyamani shivaikidile utende pakulota ulule kuleka kumuta olya.
Manya shijoidyo shipagwite kwa kulola video vyakutukana.
“Ponografia—Je, Ina Madhara?” (Mnara wa Mlinzi, Agosti 1, 2013)
Lola nnume jumo aulwile kutema lidyavalelo lyakulola video vyakutukana.
“Nilishindwa Mara Nyingi Kabla ya Kushinda” (Mnara wa Mlinzi Na. 42016)
a Ligasheti livenavo muti “Mwashi mwakulakela kumuta olya” livele isemu ya Lipundishe ya lishomo ali linkuvalanganga vinu shani vivaikidile munu atende pakulota ateme madyavalelo lake.
b Pakulota kupata lipwashalelo lyakutema kutenda punyeta, lola “Ninaweza Kushinda Jinsi Gani Mazoea ya Kupiga Punyeto?” mulibuku Maswali Ambayo Vijana Huuliza—Majibu Yafanyayo Kazi, Buku la 1, sura ya 25.
