LISHOMO 13
Didini dyakushang’apa dinkuvapukanianga dashi vanu namu Nnungu
Ikava kenga Nnungu ni linagwaledyo, mwaa shani vitendo vyakunyata vinkutandeka mu didini dilivalanga kenga dinkuntumikila nae? Kwaungwipi, didini adyo ni dyakushang’apa; dyanavo dinkupundisha ushwang’a kwaupande wa Nnungu. Didini dyakushang’apa dinkuvapukanianga dashi vanu na Nnungu? Na Nnungu ankuligwa dashi? Nae alota kutenda nyamani kwaupande wa shinu asho?
1. Didini dyakushang’apa dinkuvapukanianga dashi vanu na Nnungu kupitila mapundisho lavo?
Didini dyakushang’apa “dindibadilisha umwiu wa Nnungu kwaushwang’a.” (Valoma 1:25) Kwampano, didini dyoe hadinapundisha shinu lina lyake Nnungu. Pavedoni, Ibibiliya inkuvalanga kenga lina lyake Nnungu livaikidile litumike. (Valoma 10:13, 14) Shikatandeka shinu shakunyata vananangalaledi vadidini, kenga mapadili na vashungaji vaashidoni: “Alo ni malotelo a Nnungu.” Kanji awo ni ushwang’a. Nnungu mwíko hanatenda vinu vyakunyata. (Shomya Tiyagu 1:13.) Shashididi, didini dyakushang’apa dinkuvapukanianga vanu na Nnungu.
2. Didini dyakushang’apa divapukanianga dashi vanu na Nnungu kupitila mu vitendo?
Didini dyakushang’apa hadinavatanana vanu kenga mwanavatananila Yeova. Ibibiliya inkuvalanga kenga didini dyakushang’apa “madambi lavo landyunjikananga mpaka kuwa.” (Maono 18:5) Mu myaka vyoe, didini dyakushang’apa dinkungila nkono ding’ondo, dinkulinjidyanga mu dishiyasha, na kutadya kupela kwa vanu voe. Vananangalaledi vadidini vankuvanavo shinamilo sha mali loe na vankuvakanyalidya vakwoda vavo pakulota vaumye shadaka. Vitendo avi vinkulodya ngala kenga vanavo havanammanya shinu Nnungu, na haivaikidile vanavo kushidoni vatumigwe na Nnungu.—Shomya 1 Nshuwau 4:8.
3. Nnungu ankuligwa dashi kwaupande wa didini dyakushang’apa?
Ikava kenga vinu vyakunyata vitandeka mu didini dyakushang’apa vinkukuleka na shitundi, wako wona kenga Yeova ankuligwa dashi? Nae ankuvanagwaledya vanu, kanji nae ave na shitundi na vananangalaledi vadidini dyakushang’apa, divapukanianga vanu namu Nnungu na divatenda kunyata vakwoda vavo. Nae andilivikila kenga didini dyakushang’apa dindabamolegwa na “nkukunya pakaaneka kavili.” (Maono 18:21) Muwakati wakuvandika, Nnungu andabamola didini uti dyakushang’apa.—Maono 18:8.
LAMBELA KUMANYA VYOE
Manya mwashi mwaligwidya Nnungu kwaupande wa didini dyakushang’apa. Lipundishe vyoe kwaupande wa avilá vyatandile nae, nayadavo lipundishe mwaa shani haikuvaikidile kukatoka dimongo pakulota ummanye Yeova.
4. Nnungu hanakubali shinu didini uti
Vanu voe vona kenga didini ni dindila dyakuvilingananga dyuka kwa Nnungu. Kanji shinu ashi shiu? Shomya Mateu 7:13, 14, na badae mwambangile mwaa shakudya sha mwina:
-
Ibibiliya inkuvalanga nyamani kwaupande waindila yúka ku shingumi?
Lola VIDEO, na badae mwambangile mwaa shakudya sha mwina.
-
Da Ibibiliya inkuvalanga kenga didini uti dipagwite dinkumpuwangidya Nnungu?
5. Didini dyakushang’apa hadinalodya linagwaledyo lya Nnungu
Didini dyakushang’apa dinkunshang’apila Nnungu kwa dinamuna dya kuvilingananga. Indila imo yakunyata ni kulinjidyanga muding’ondo dya mushilambo. Pakulota ulole mpano umo, lola VIDEO. Badae mwambangile mwaa vyakudya vya mwina.
-
Maganisha loe lalínjidyenge dashi mu ing’ondo II ya mushilambo uti?
-
Wako uligwa dashi kwaupande wa madalaka lavavénavo didini adyo?
Shomya Nshuwau 13:34, 35 na 17:16. Badae mwambangile mwaa vyakudya vya mwina:
-
Yeova aligwíte dashi didini dyakushang’apa padilinjidyenge mu ing’ondo?
-
Didini dyakushang’apa ni lipata lya vinu uti vyakunyata. Vinu shani vyaugwene vilodya kenga didini dyakushang’apa hadinalodya shinu linagwaledyo lya Nnungu?
Didini dyakushang’apa hadinalodya shinu linagwaledyo lya Nnungu
6. Nnungu ankulota kuvapwashela vanu vaume mu didini dyakushang’apa
Shomya Maono 18:4, a na badae mwambangile mwaa shakudya sha mwina:
-
Unkuligwa dashi kwa kumanya kenga Nnungu ankulota kuvapwashela vanu vaume mu didini dyakushang’apa?
7. Wena mushu ulipundisha kwaupande wa Nnungu wiu
Didini dyakushang’apa dinkuulula kwambukisha maoni lako kwaupande wa Nnungu? Nkumbukile mwana aita indila yambone yampundishidye tatake. Mwana ajo kutwala kunyema pakaja na kwanjanga kutenda vinu vyakunyata. Kutwala tatake mene kukubali vitendo vya mwanagwe. Mwaa shani hashinava shambone kumukumu tatamunu kwamwaa wa vitendo vyakunyata vya mwanagwe?
-
Tushidoni shambone kumukumu Yeova na kuleka kulipundisha kwaupande wake kwamwaa wa vitendo vya didini dyakushang’apa?
VANU VANJI VANKUSHIDONI: “Hangunatanana vinu vya Nnungu mwaa didini ni lipata lya matatisho loe.”
-
Wako wonela momo?
-
Mwaa shani vitendo vya didini dyakushang’apa havyulula kwambukisha maoni letu kwaupande umwe Yeova?
KWAUNGWIPI
Didini dyakushang’apa dinkushang’apila Nnungu kwaindila ya mapundisho lakushang’apa na vitendo vyakudabukanga. Nnungu andauka nabamola didini dyakushang’apa.
Tukumbukilange
-
Uligwa dashi kwaupande wa mapundisho na vitendo vya didini dyakushang’apa?
-
Yeova aligwa dashi kwaupande wa didini dyakushang’apa?
-
Nnungu alota kutenda nyamani na didini dyakushang’apa?
LIPUNDISHE
Lipundishe dindila mbili dya didini dyakushang’apa dinnyatila Nnungu.
“Je, Dini Zote Ni Sawa? Je, Zote Zinaongoza kwa Mungu?” (Makala iliyo kwenye mtandao)
Mwaa shani Yeova ankulota tulipudye kwake nae pamo na vavetu?
“Je, Ni Lazima Mtu Awe Katika Dini Fulani?” (Makala iliyo kwenye mtandao)
Nshungaji jumo idini yake inímuvyanga. Kanji nae andyuka mushu alipundisha umwiu kwaupande wa Nnungu.
Vanu vadidini va imbula yakala, vandívalanga ushwang’a na vandípundisha kenga Nnungu avele kushu na nkalau. Manya umwiu wa vinu vitatu kwaupande wa lipundisho alyo.
“Uwongo Unaofanya Watu Wasimpende Mungu” (Mnara wa Mlinzi, Novemba 1, 2013)
a Pakulota umanye mwaa shani libuku lya Maono linkushema didini dyakushang’apa kenga nkongwe ashamegwa Babiloni nkumene, lola Dimbande dikumene 1.
