LISHOMO 7
Utawala wa Nnungu ni nyamani?
1. Utawala wa Nnungu ni nyamani?
Mwashani Yesu inimaikila kuva nanangalaledi?—MALUKUSHI 1:40-42.
Utawala wa Nnungu ni ishilikali ya kuwa. Wanavo undadiva lyutu lya dishilikali uti dya vanu, na unatandedya malotelo, a Nnungu kuwa na mushilambo shapai. Ntenga wambone ni au: muwakati wakuvandika Utawala wa Nnungu wanavo undava ishilikali yambone ya valota vanu uti. Utawala awo undavaunganisha vanu uti vamushilambo shapai.—Shomya Daniyele 2:44; Mateu 6:9, 10; 24:14.
Utawala unkuloteka kuvanavo nanangalaledi. Pavedoni, Yeova anintandola Mwanagwe, Yesu Klistu, pakulota kuva nanangalaledi wa Utawala wa Nnungu.—Shomya Maono 11:15.
2. Mwaa shani Yesu inimaikila kuva nanangalaledi?
Mwana wa Nnungu inimaikila kuva nanangalaledi mwaa nae ni wambone, na ananagwaledya ishaliya. (Mateu 11:28-30) Na yadavo, Yesu ankuvanavo dimongo dyakuvapwashela vanu, mwaa nae anatawala shilambo shapai kutunduvangila kuwa. Baada Yesu ya kulitakatuwa pakati pa vakupela, nae andyúka kuwa, na andikala kunkanakono kumwe Yeova, alindilila pakulota ave nanangalaledi. (Vabalaniya 10:12, 13) Kumwisho kwake, Nnungu animupa Yesu dimongo pakulota atunduvange kutawala.—Shomya Daniyele 7:13, 14.
3. Nyani alota kutawala pamo namu Yesu?
Shipinga shimo shishamegwa “vanashwe” shinatawala pamo namu Yesu kuwa. (Daniyele 7:27) Vatandi kutandalegwa ni vamyombe vakukulupilika vake Yesu. Mpaka nelo Yeova ankuvatandola valume na vakongwe vakukulupilika pakulota vave vanashwe. Kenga momo mwaintadakadile Yesu, vanavo baada yakupela, vandalitakatuwa kuva mili waimumu.—Shomya Nshuwau 14:1-3; 1 Vakolintu 15:42-44.
Vanu vangapi valota kúka kuwa? Yesu andivalanga ni “shipinga shidikidiki.” (Lukashi 12:32) Kumwisho kwake, vanavo vandava vanu 144.000, na vanatawala shilambo shapai pamo namu Yesu.—Shomya Maono 14:1.
4. Shitandeke nyamani patunduvenge Yesu kutawala?
Utawala wa Nnungu unditunduvanga kutawala mwaka wa 1914. * Yesu patunduvenge kutawala kuwa, shitandi nae animpukusha Shatwani na vandamoni kutwala kuvajela mushilambo shapai. Kwamwaa wa shitendo asho, Shatwani andivanavo shitundwe, na akatunduvanga kwidanavo mauvilo mushilambo shapai. (Maono 12:7-10, 12) Kutunduvangila wakati wowo, mauvilo a vanu lankuka mushu lamamodya. Ding’ondo, indala, vilwele na vindangenda, uti vinu avi ni “shimanyikilo” shilodya kenga Utawala wa Nnungu muwakati wakuvandika unatunduvanga kutawala mushilambo shapai.—Shomya Lukashi 21:7, 10, 11, 31.
5. Utawala wa Nnungu unkutenda nyamani nelo?
Kupitila shimadengo shakwandadya ntenga mushilambo uti, Utawala wa Nnungu unkuvaunganianga vanu vakuvilingananga. Vanu voe vakulishapeya vankukubali kutawaligwa namu Yesu. Utawala wa Nnungu unauka navashililidya vanavo pashilota kubamolegwa shilambo shaukalau. Kutunduvangila, ambi vanu uti valota kutawaligwa na ishilikali ya Nnungu inkuvabidi vamwigwilile Yesu.—Shomya Maono 7:9, 14, 16, 17.
Mu myaka 1.000, Utawala wa Nnungu unauka natandedya malotelo ake Nnungu akunantandi pakati pa vanu. Shilambo shapai shindauka nava ipalaishu. Kumwisho kwake, Yesu anauka namuujidya Tatake Utawala. (1 Vakolintu 15:24-26) Unimmanya munu akunagwadile pakulota ummanyiye vya Utawala wa Nnungu?—Shomya Dimu 37:10, 11, 29.
^ lipungu 6 Pakulota umanye vyoe vyakulava vya mu Ibibiliya kwa mwaka wa 1914, lola mamba 217 mpaka 220 mu libuku Ibibiliya Itupundisha Nyamani?
