1, 2. (a) Unkuulula kushidoni unimmanya munu wakumanyikana kwamwaa wakumanya lina? Valanganga. (b) Maoni shani lavavénavo vanu kwaupande wake Yesu?

VAPALI vanu voe vakumanyikana mushilambo. Wako unkuulula kumanya lina lya munu wakumanyikana. Pamo na davo kumanya lina lya munu hainatosha shinu kenga wako unimmanya shana munu ajo. Pakulota ummanye shalowa indikuvaikila kumanya shinamilo shake, mwavalalele na shakwashi shinannagwela.

² Yesu Klistu andinama mushilambo shapai myaka 2.000 vipitile kunyuma. Kanji vanu vankuvanavo maoni akuvilingananga kwaupande wake Yesu. Vanji vatangola kenga nae avele munu wambone, vanji avele nkúlava, na vanji vona kenga nae ni Nnungu. Kushi wako, wonela mwashi?—Lola imbande Igwa Shana 12.

3. Mwaa shani ni shinu shikumene wako kummanya Yeova namu Yesu Klistu?

³ Kumanya umwiu kwaupande wake Yesu ni shinu shikumene namene. Mwaa shani? Mwaa Ibibiliya inkuvalanga doni “Shingumi shíkamalilika sho ni ashi vakumanye wako kuva Nnungu wiu úvele jumo jojo na vammanye aijá wauntumididye, Yesu Klistu.” (Nshuwau 17:3). Kwaumwiu, ukamanya umwiu kwaupande wake Yeova namu Yesu, undapata shingumi shíkamalilika mu palaishu. (Nshuwau 14:6) Kulipundisha kupitila kwake Yesu ni shinu shambone mwaa nae andítulakela mpano wambone, mwashi mwakuvatananila vanu. (Nshuwau 13:34, 35)  Mu lishomo litandi, tundilipundisha umwiu wa Nnungu. Napanelo, tuke tulole mwashi mwaitangalela Ibibiliya kwaupande wake Yesu.

4. Lilove lya “Mashiya” na “Klistu” manaake ni nyamani?

⁴ Myaka vyoe Yesu hakanava kuvalekwa, Yeova andívalanga kenga akanintumidya Mashiya au Klistu. Lilove lya “Mashiya” linkwalakela mu inangodi ya shibalaniya na lilove lya “Klistu” linkwalakela mu inangodi ya shigalegu. Kwa malove ala mavili manaake ni wakutajigwa mauta au munu atandalagwidye na Nnungu kwa shimadengo sha pagweka. Mashiya anatadya uti vyakulivikila vya Nnungu vitandeke. Kanji nelo yadavo nae ankuulula kutupwashela. Ndyomana, Yesu hakanava kuvalekwa, vanu voe vashinalyudya, ‘Nyani alota kuva Mashiya?’

5. Vakwoda vake Yesu vandyamini kenga nae ave Mashiya?

⁵ Vakwoda vake Yesu vashindamini kenga nae ave Mashiya, au Klistu wavamalenge kwida. (Nshuwau 1:41) Kwampano, Simoni Patulu anímwaulila Yesu: “Wako ni Klistu.” (Mateu 16:16) Kushi wetu, tulota kwamini dashi kenga Yesu ni Mashiya?

6. Yeova avapwashadile dashi vanu pakulota kummanya Mashiya?

⁶ Muwakati wakunyuma Yesu hakanava kuvalekwa, Nnungu andivatadya vakulava vaandike dyabali dishimwamba Mashiya. Ikavapwashadile dashi? Lola mpano au, wako vandikujugwa umukile munu jumo waukanava kumwona kushitendi shamagali. Kwabila matatisho, unkuulula kummanya ikava kenga vandikuvalangangila mwavalalele munu ajo. Ni kenga momo, Yeova andivatumila vakulava pakulota vaandike shashilota Mashiya kutenda na nyamani shishilota kuntandeka. Kutandeka kwa  vyakulava avyo kundavapwashela vanu kumanya kenga Yesu ni Mashiya.

7. Vyakulava shani vivili vilodya kenga Yesu ni Mashiya?

⁷ Lola vyakulava vivili. Shitandi myaka 700 Yesu hakanava kuvalekwa vyakulava vyake Mikeya vindívalanga kenga Mashiya anavalekwa ku njini udikidiki wa ku Beteleemu. (Mikeya 5:2) Yesu avalakwadidye njini wowo. (Mateu 2:1, 3-9) Shambili, Kupitila vyakulava vyake Daniyele vindívalanga kenga Yesu akandiva Mashiya mwaka 29 W.K. (Daniyele 9:25) Avi ni mipano vivili vya vakulava vilodya kenga Yesu ni Mashiya wavamalenge kwida.—Lola imbande Igwa Shana 13.

8, 9. Shumilidile nyamani wakati Yesu papatile ubatisho vilodya kenga nae ni Mashiya?

⁸ Yeova andílodya ngala kenga Yesu ni Mashiya. Nnungu andílivikila kumupa shimanyikilo Nshuwau Wakubatisha pakulota ammanye nyani ashilota ave Mashiya. Nshuwau andyóna shimanyilkilo asho muwakati Yesu paukile napata ubatisho mu Lundi lwa Yudani mu mwaka 29 W.K. Ibibiliya inkutwaulila nyamani shumilidile: “Baada Yesu yakupata ubatisho, andyúma mmedi mo muwakati wowo kuwa kundíshimuka nae andyona imumu yanashwe yake Nnungu wakuwa ishuluka kenga ng’unda kwida namwikila. Lola! Lindyúmilila lidi lyakwalakela kuwa kushidoni: ‘Aju ni mwanangu wakunagwaleka na waninkulupidile.’” (Mateu 3:16, 17) Nshuwau paigwite na kwona shimanyikilo asho akamini kenga Yesu ni Mashiya. (Nshuwau 1:32-34) Yeova akamupe imumu yanashwe  Yesu, mu liduva lyolyo nae andíva Mashiya. Nae akava Nanangalaledi na Umu atandalagwidye na Nnungu.—Ishaiya 55:4.

⁹ Vyakulava vya mu Ibibiliya, malove ake Yeova, na shimanyikilo shumilidíle wakati Yesu papatile ubatisho, vinkulodya kenga Yesu ni Mashiya. Kanji Yesu alakadile kwashi, na avé na mavalelo shani? Tuke tulole shitangaleka mu Ibibiliya.

10. Ibibiliya ipundisha nyamani kwaupande umwe Yesu hakanava kwida mushilambo shapai?

¹⁰ Ibibiliya inkupundisha kenga Yesu andinama myaka vyoe kuwa hakanava kwida mushilambo shapai. Nkúlava Mikeya andívalanga kenga Mashiya andípagwa ‘tangu muwakati wakala.’ (Mikeya 5:2) Jo mwene Yesu anditangola myanda vyoe kenga nae hakanava kuvalekwa mushilambo shapai ashinama kuwa. (Shomya Nshuwau 3:13; 6:38, 62; 17:4, 5.) Ata Yesu hakanava kwida mushilambo shapai vashinaigwania namu Yeova.

11. Mwaa shani Yeova ankunnagwaledya Yesu?

¹¹ Yeova ankunnagwaledya namene Yesu. Mwaa shani? Mwaa Nnungu animumba nae hakanava kumba shinu shoeshoe. Ni ndyomana Yesu ankushamegwa “ntandi kuvalekwa waviumbi uti.” * (Vakoloshu 1:15) Nayadavo Yeova ankunnagwaledya namene Yesu, mwaa nae ni aumbigwe shalowa namu Yeova. Ashi ni shintadya nae kushamegwa “mwana jumo.” (Nshuwau 3:16) Yeova anintumila Yesu pakulota kumba vinu uti. (Vakoloshu 1:16) Nayadavo Yesu gweka ni ashamegwa “Lilove,” mwaa Yeova anintumila nae pakulota kuvapa ntenga vanu na vanjelo.—Nshuwau 1:14.

12. Tunkumanya dashi kenga Yesu namu Nnungu havanava shinu munu jumo?

¹² Vanu vanji vankwamini kenga Yesu na Nnungu ni munu jumo jojo. Kanji Ibibiliya hainapundisha shinu davo. Ibibiliya inkupundisha kenga Yesu andyumbigwa. Kanji, Yeova aumbile vinu uti hatunduvenge na havé  mwisho. (Dimu 90:2). Yesu mwiko hakumbukidile kuva Nnungu mwaa nae ni mwana wa Nnungu. Ibibiliya inkupundisha shalowa kenga Tatamunu ni nang’olo kuliko mwana. (Shomya Nshuwau 14:28; 1 Vakolintu 11:3.) Yeova ni “Nnungu Wadimongo-uti.” (Kutunduvanga 17:1) Yeova ni nang’olo na wadimongo shilambo uti.—Lola imbande Igwa Shana 14.

13. Mwaa shani Ibibiliya inkuvalanga kenga Yesu “ni ing’ope ya Nnungu ákaaneka”?

¹³ Yeova na mwanagwe Yesu vandikola madengo pamo, mu myaka vyoe vikanava kumbigwa vinu uti. Kwaumwiu vashinanagwaladyania namene! (Nshuwau 3:35; 14:31) Yesu andijedya mavalelo atatake, ndyomana Ibibiliya inkuvalanga kwaupande wake Yesu: “Nae ni ing’ope ya Nnungu ákaaneka.”—Vakoloshu 1:15.

14. Yukile ndava dashi mwana wakunagwaleka wa Nnungu navalekwa mushilambo shapai?

¹⁴ Mwana wakunagwaleka wake Yeova andikubali kuma kuwa kwida mushilambo shapai navalekwa kenga mwana wa munu. Yululike dashi? Yeova anditenda makango, nae andívika shingumi shamwanagwe mushitumbo shamwalindembo wavanshema Maliya. Kwamwaa awo, Yesu havénavo tatamunu wamushilambo shapai. Napavedoni, Maliya anímmaleka mwana hakave lidambi na akanshema lina Yesu.—Lukashi 1:30-35.

15. Tulota kummanya dashi shana Yeova?

¹⁵ Unkuulula kulipundisha vinu vyoe kwaupande wake Yesu, kwa shinamilo shake na mavalelo ake ushomya mabuku la mu Ibibiliya limwe Mateu, Malukushi, Lukashi namu limwe Nshuwau. Mabuku alo vashema Ntenga wambone. Mwaa Yesu ankuvanavo mavalelo Atatake, ukashomya andakupwashela wako kummanya shana Yeova.  Ndyomana Yesu andítangola doni: “Ángugwene nangu animwona Atata.”—Nshuwau 14:9.

16. Yesu apundishidye nyamani? Mapundisho amwe Yesu alakadile kwashi?

¹⁶ Vanu voe vashínshema Yesu kuva “Mwalimu.” (Nshuwau 1:38; 13:13) Shinu shikumene shapundishidye Yesu vivele “mitenga vyambone vya Utawala wa Nnungu”. Utawala awo ni nyamani? Ni ishilikali ya Nnungu ivele kuwa ilota kutawala mushilambo shapai uti na utawala awo undauka navalaliya vanu uti vamwigwilila Nnungu. (Mateu 4:23) Uti vinu vyapudishidye Yesu vyalakadile kumwe Yeova. Yesu atedoni: “Mapundisho angumya nangu, hanava shinu langu nimwene, amwe aijá ángutumididye.” (Nshuwau 7:16) Yesu andimanya kenga Yeova ankulota vanu vaigwe mitenga vyambone na vamanye kenga Utawala wa Nnungu unatawala mushilambo shapai.

17. Yesu ashipundisha kwashi? Mwaa shani Yesu ashinalikanyalidya namene kuvapundisha vanu?

¹⁷ Yesu ashipundisha kwashi? Kula pashinu pavashipagwa vanu. Nae ashinapundisha mumakaja, kunjini, kubashali, mumautu mwavashilipudya vanu na muding’ande. Nae hashivalinda vanu vaide kwake. Myanda vyoe nae ashindavaukila mwavashipagwa. (Malukushi 6:56; Lukashi 19:5, 6) Yesu ashinalikanyalidya namene na kutumila wakati wake avapundisha vanu. Mwaa shani? Mwaa nae andímanya kenga Nnungu ashinalota nae atende davo na ngwengwe nae ashinamwigwilila Tatake. (Nshuwau 8:28, 29) Yesu ashinandadya ntenga mwaa nae ashinavanangila vanu shididi. (Shomya Mateu 9:35, 36.) Nae andyona kenga vanag’olo vadidini havashipundisha umwiu kwaupande umwe Nnungu na Utawala wake. Yesu ashinalota kuvapwashela vanu voe pakulota vaigwe mitenga vyambone.

18. Mavalelo shani lavenavo Yesu lakunagwadile namene?

 ¹⁸ Yesu ashinavanagwaledya vanu na ashinavangaikangila vanavo. Nae avele munu wambone na vanu vashinaligwa shana kwambanga mwaa namu nae. Mpaka vadyoko ishinavanagwela kupagwa pepi namu nae. (Malukushi 10:13-16) Yesu ngwengwe ave washaliya. Nae ishinnangwela ungave ishaliya na vanu vakakulupilika. (Mateu 21:12, 13). Muwakati wapagwite nae, vakongwe havavenavo aki na havashishimigwa. Kanji Yesu ngwengwe ashinavatanana vakongwe kwaishima. (Nshuwau 4:9, 27) Yesu ave wakulishapeya namene. Kwampano, mwanda umo nae andívanavyanga medi vamyombe vake madodo, shinu shivaikidile vatende vatumwa.—Nshuwau 13:2-5, 12-17.

19. Mpano shani ulodya kenga Yesu ashinamanya shakwashi shavashilota vanu na kulota kuvapwashela?

¹⁹ Yesu ashinamanya shavashilota vanu na ashinalota kuvapwashela. Shinu ashi shindilodya ngala wakati nae patumidile dimongo dya Nnungu avaponia valwele kwa makango. (Mateu 14:14) Kwampano, munu jumo avenavo ulwele wamalemba mumili aninjugwa Yesu, kushidoni: Umu “ukalota unkuulula kungutadya ngutakate.” Bai Yesu anímwanangila shididi kwamauvilo a munu ajo, na andínyalodya nkono wake kutwala kunkumba kumwaulila doni: “Elo ndilota! Takata.” Munu jo kutwala kupona! (Malukushi 1:40-42) Kumbukila munu ajo aligwene dashi?

20, 21. Yesu atulakadile mpano shani wambone wakumwigwilila Nnungu?

²⁰ Yesu andileka mpano wambone wakumwigwilila Nnungu. Ata vammongo vake vakantenda vyakunyata  nae ashinauka mushu aminika na tatake. Kwampano, Yesu hatagile paukile nalingigwa namu Shatwani. (Mateu 4:1-11) Pakati pavalikola vake havashamini kenga nae avele Mashiya na kumwaulila doni “andipungukigwa ding’ano.” (Malukushi 3:21) Pashimuvyanga na vammongo vake, Yesu andyúka mushu akulupilika na Nnungu na havatandíle kunyata.—1 Patulu 2:21-23.

²¹ Kupela kwake Yesu kundiva kwamauvilo namene kanji nae andyaminika pameo pamwe Yeova mpaka kupela. (Shomya Vapilipo 2:8.) Kumbukila mwalipililidile muliduva lyaukile napela. Yesu vanímunga, kukumigwa kwake vandípagwa mashaidi vakushang’apa vashinatangola kenga nae avele munu wakushang’apa na majeshi vanímuvyauvyanga kutwala kunkamela pannandi wamauvilo.  Wakati pashipela andítangola kushidoni: “Vindiwikila popo!” (Nshuwau 19:30) Baada yakupita maduva matatu Yeova aníndyuwa Yesu kumupa mili waimumu. (1 Patulu 3:18) Dikapite dishumana padiki Yesu andyújila kuwa “naikaIa kunkanakono kwake Nnungu,” álinda pakulota kuva Nanangalaledi.—Vabalaniya 10:12, 13.

22. Tunkuvanavo litala shani kwaupande wake Yesu kwamwaa wakumwigwilila Tatake?

²² Kwa kuva Yesu andikulupilika pameo patatake, wetu tunkuvanavo litala lyakunama myaka víkamalilika mushilambo shapai mu palaishu, kenga momo mwalatadile Yeova tangu kunantandi. Mu lishomo lyatika tunalipundisha, mwaa shani kupela kwake Yesu kunkutupa litala lyakupata shingumi shíkamalilika.