Ngwa ye Amagedoni i ngwa ye bupelo pakati kwe mibuso ye bathu ne Ndzimu. Mibuso iyeyi ne ba no i sala shule i no nyanyaidza Ndzimu na ngwenu ne ku lamba ku amuchila bulauli gugwe. (Pisalema 2:2) Ngwa ye Amagedoni i nowo pedzisa mibuso ye bathu.​—Daniele 2:44.

 Dama linoyi “Amagedoni” lo boneka kangompela koga mu Baibili, mu na Zumbunulo 16:16. Ha ku lebegwa mbeli, Zumbunulo i no lakidza kuti “pathu panodang’wa nge lulimi gwe Tjihebheru kuyi Amagedoni,” “bomambo be shango yose” ba nowo kubunganyigwa ku “ngwa mu zhuba gulu le Ndzimu Masimbawose.”​—Zumbunulo 16:14.

 Ndi boyani ba nowo gwa mu ngwa ye Amagedoni? Jesu Kirisiti u nowo tungamila mphato we chisole we kudzimu ku kunda zwita zwe Ndzimu. (Zumbunulo 19:11-16, 19-21) Zwita izwezwi zo shanganyila ibabo ba no nyanyaidza bulauli gwe Ndzimu, kose ne ibabo ba no tolela Ndzimu pasi.​—Ezekieli 39:7.

 A ngwa ye Amagedoni i nowo shingikalila ku Middle East? Aa. Pana ne ku shingikalila pathu pangompela, ngwa ye Amagedoni i nowo shingikala mu shango yose.​—Jeremiya 25:32-34; Ezekieli 39:17-20.

 Mu zwibaka zwingwe, Amagedoni i no shanduligwa kuyi “Har–Magedon” (Hebrew Har Meghiddohnʹ), kunodwa “Dombo le Megido.” Megido ya ka tongo be turopo wulu mu shango ye Iziraele wa ntolo. History i no leba ne kwe ngwa dza ka shingikala mu shango dza ka poteleka, ku shanganyila ne shango dzingwe dza ka kwagwa mu Baibili. (Baathuli 5:19, 20; 2 Boshe 9:27; 23:29) Ne kwa ka jalo, Amagedoni ha a nga dwe shango dumbu ipejo ne Megido wa ntolo. Akuna matombo makulu ikwenu, kose ne mabala e Jezirele ha a nga bate bose ibabo ba nowo gwisa Ndzimu. Pana ichecho, Amagedoni i ngwa ye shango yose ya ili kuti zwichaba zowo shangana ku gwisa bulauli gwe Ndzimu.

 Mamo i nowo be a ka tini mu ngwa ye Amagedoni? Nenguba ti singa zibe kuti Ndzimu u nowo shingisa chini masimba awe, u nowo be a na zwibayano zwi no fanana ne zwa a ka shingisa ntolo​—chivulamabgwe, kuzunguzika kwe shango, nrwalela, moto ne sulfur, kupenya, ne bugwele. (Jobe 38:22, 23; Ezekieli 38:19, 22; Habakuke 3:10, 11; Zakariya 14:12) Bangwe be zwita zwe Ndzimu ba nowo shangashangana misholo ngono ba ka bulayana, ngono ba nowo elanjele kuti Ndzimu ndiye u no ba gwisa.​—Ezekieli 38:21, 23; Zakariya 14:13.

 A Amagedoni i nowo pedzisa shango? I nowo be isi bupelo gwe planet yedu, ne kuti shango i nzi we bathu cha chose. (Pisalema 37:29; 96:10; Nreri 1:4) Pana ne ku chinya bathu, dumbu Amagedoni i nowo ba chidza, ne kuti “mbunga we bathu nkulu” we balanda be Ndzimu u nowo chidziwa.​—Zumbunulo 7:9, 14; Pisalema 37:34.

 Pana ne ku dwa shango, ha Baibili iti “shango” mu zwingwe zwibaka i no dwa bathu babi ba no nyanyaidza Ndzimu. (1 Johani 2:15-17) Ne zila i no fanana, Amagedoni i nowo zhisa “kupela kwe shango.”​—Matewu 24:3, King James Version.

 Amagedoni i nowo shingikala lini? Ha Jesu e leba ne kwe “kudziyidziwa kukulu” ku nowo tangisa ngwa ye Amagedoni, wakati: “Akuna unoziba ngekwe zhuba ilelo kene tjibaka itjetjo, kene bali ibo batumwa be kudzimu, kene iye Nkololo kuzhe kwa Tate boga.” (Matewu 24:21, 36) Ne kwa ka jalo, Baibili i no lakidza kuti Amagedoni i nowo shingikala mu ku be po kwa Jesu ku singa boneke, kwa ka tangisa ne 1914.​—Matewu 24:37-39.