ZWE BA KA LOBOLANA
3: Hlonipho
CHA KU NO DWA
Bathu ba ka lobolana ba no hloniphana ba no thokomelana, nenguba ba sa wanana. “Ba ka lobolana ha ba to misa ku lebesana be zwithubukanya,” ko jalo buka ye Ten Lessons to Transform Your Marriage. “Mu bumo gwa ichecho, ba no dwilila be lebesana ne kwe mathatha abo. Ba no teedza ne hlonipho ba ba ka lobolana nabo ne se kwa be linga zwithu ne kuti ba nga thamani chi nga ba shingila bose.”
NLAYONTEWO WE BAIBILI: “Ludo . . . a gu to zwishakila.”—1 Bakorinta 13:4, 5.
“Ku hlonipha nkadzi wangu ko dwa kuti ndo ntolela pezhugwi ngono ha ndi to shaka ku n’hwisa zogwadza kene ku chinya ndobolo yedu.”—Micah.
INI KU FANILA
Ha ku sina hlonipho, ku lebesana kwe ba ka lobolana ku nga be ne ku bigana nlandu, ku bayana ne matama, ne ku lingilana pasi—michelo i no legwa ne bashakisisi i li i no kwebela mu ku khwanyika kwe nsha.
“Ku leba ndebo i no chebela, ku dada, kene ku zwikhata ne nkadzi uwo ku nga nnyadza moyo, ne kuti a si cha ku thembe, ne ku chinya ndobolo iyo.”—Brian.
CHA U NGA THAMA
ZWITHATHUBE
Lingilila ndebeleko iyo ne mazwibato awo muna wa wa ka lobolana naye mu chibaka che viki. U bo u zwibuzwa kuti:
‘Nda ka biga nlandu wa nda ka lobolana naye ka ngana, ne kuti nda ka ntolela pezhugwi ka ngana?’
‘I zila dzipi dza nda ka lakidza kuti ndo hlonipha wa nda ka lobolana naye?’
LEBESANA NE WA WA KA LOBOLANA NAYE
Mazwibato ne matama api a nga batsha nngwe ne nngwe wenyu kuti a zwihwe e hloniphiwa?
Mazwibato ne matama api a nga thama kuti nngwe ne nngwe wenyu a zwihwe a singa hloniphiwe?
GUMBULUDZO
Kwala zila thatu dza u nga da hloniphiwa nadzo. Thama kuti wa wa ka lobolana naye a kwale dzidze. Lakidzanani cha ma kwala, mu be mu shingila kuhloniphana mu na zwa ma kwala.
Kwala zwa u no da ne kwe wa wa ka lobolana naye. U bo u mbudza kuti u no tolela zwithu izwezo pezhugwi chini.
“Ndo lakidza kuti ndo hlonipha nlume wangu ne mazwibato angu kuti ndo ntolela pezhugwi ne kuti ndo shaka e shatha. Ha te ili kuti ku nga shinga mu zwibaka zose; mu chingwe chibaka mazwibato a si a chingwe a nga lakidza hlonipho ye malebeswa.”—Megan.
Khani wulu, ha te ili kuti u no zwi bona u na hlonipho; i khani ye kuti wa wa ka lobolana naye u no zwihwa e hloniphiwa.
NLAYONTEWO WE BAIBILI: “Ibeni ne ngoni ne buthu ne ku zwiyisa pasi ne moyon’nyolo ne nge moyonlefu.”—Bakolosa 3:12.
