To da ku mbala ne ku lingika ne zila dzi si nga fanane. Ha ti tobela milayontewo ye Baibili, towo khona ku shalula cha ti no da, kakale ti be ti shathisa Jehova. A ti lingilile milayontewo iyeyi.

1. I milayontewo ipi i nga ti batsha ku shalula cha ti no mbala ne ku zwibaakanya?

Ta ka fanila ku shalula kuti ti “ambale zubuyanana, kwakafanila, kakale kwakalulwama,” ne ku lingika zwibuyanana ne zila i no lakidza “kutja Ndzimu.” (1 Timoti 2:9, 10) Lingisisa milayontewo ili 4 i no tobela: (1) Ta ka fanila ku mbala “zubuyanana.” Se kwa wa ka bona ku zwidiyo, bathu ba Jehova ba no da zwithu zwi si nga fanane, ngono zila ya ti no mbala ne ku zwibaakanya mavudzi nayo, i no lakidza ku hlonipha Ndzimu wa ti no namata. (2) Ku mbala “kwakafanila,” ko dwa kuti zila ya ti no mbala nayo haizo fanila ku musa mazwiwo e ku shanganila ngubo, kene ku thama kuti bathu ba ti lingilile kwazo. (3) To lakidza ku mbala “kwakalulwama” ha ti si nga shalule zwiambalo kene ku zwibaakanya ne zila ingwe ne ingwe i no zibgwa ye feshene. (4) Zila ya ti no lingika nayo ya ka fanila ku dwilila i lakidza “kutja Ndzimu,” kakale kuti to namata Ndzimu we malebeswa.—1 Bakorinta 10:31.

2. Zila ya ti no lingika nayo i nga ama Bakirisiti bangwe chini?

Nenguba ti na fanilo ye ku zwishalulila kuti to shaka ku mbalani, ta ka fanila ku kumbulila bangwe ha ku zha mu zila ya ti no zwibaakanya nayo. To gwisa kuti ti si manikanye bangwe ngono kuti nngwe ne nngwe wedu, “ashathise waagele naye, anthamile bubuya kuti ansimise.”​—Bala Baroma 15:1, 2.

3. Ku lingika kwedu ku nga zhisa bangwe mu malebeswa chini?

Nenguba ti gwisa ku mbala ne zila ya ka fanila mu mamo ose, to lingilila kwazo zila ya ti no mbala nayo ha ti yenda ku zwidiyo kene ti rera. Ha ti to shaka kuti bathu ba si teedze nlaetsa wedu u no sheteka. Ngono to shaka kuti zila ya ti no lingika ndiyo i thame kuti ba shake ku zwidiya malebeswa ne kuti “bubuya gwe zwidiyo zwe Ndzimu Ntjidzi wedu guzwilakidze mubali.”​—Tito 2:10.

 ZWIDIYE KWA KA NGINILILA

4. Ha ti lingika zwibuyanana to lakidza kuti to teta Jehova

Libaka gu kulu gwe ku be ti kumbula ne kwe zila ya ti no lingika nayo ndi gupi? Bala Pisalema 47:2, mu be mu lebesana ne kwe buzo dzi no tobela:

• Libaka gwe kuti to milila Jehova gwa ka fanila ku thama kuti ti shalule chini zila ya ti no mbala nayo?

• A no kumbula kuti ko hwika ku kumbulila kwazo zila ya ti no lingika nayo ha tili ku zwidiyo kene ti rera? Ne kutini?

 5. Se kwa ti nga shalula zwibuyanana zila ya ti no mbala ne ku lingika nayo

Zana VIDIYO.

Nenguba zwiambalo zwedu zwi tura kene zwi si nga ture, zwa ka fanila kuti zwi be zwa ka chena kakale zwa ka lulwamila mamo a tili mu ali. Bala 1 Bakorinta 10:24 na 1 Timoti 2:9, 10. Mu be mu lebesana kuti ini ta ka fanila lamba ku mbala zwiambalo zwi . . .

• sa ka lulwama.

• no bata kwazo, zwi lakidza mibili yedu, kene zwi nga thama kuti bathu ba be ne mazwiwo e ku shanganila ngubo.

Nenguba Bakirisiti ba si kusi kwe nlawo wa Mushe, dumbu u no lakidza chi no kumbugwa na Jehova. Bala Ditironomi 22:5, mu be mu lebesana ne kwe buzo i no tobela:

• Ini ti sa ka fanila ku mbala ne ku zwibaakanya ne zila i no thama kuti balume ba lingike se bakadzi kene bakadzi ba lingike se balume?

Bala 1 Bakorinta 10:32, 33, na 1 Johani 2:15, 16, mu be mu lebesana ne kwe buzo dzi no tobela:

• Ini ta ka fanila ku kumbulila kuti a zila ya ti no lingika nayo ha i to manikanya bangwe ba no ti bona kene ba mu gubungano?

• I zila dzipi dze ku mbala ne ku zwibaakanya dza ka jwaeleka kwa u no gala?

• A no kumbula kuti dzingwe dzadzo, dzi nga be dzi sa ka fanila Nkirisiti? Ne kutini?

 CHA WA ZWIDIYA

Ha ti shalula cha ka lulwama mu zila ya ti no lingika nayo, to lakidza kuti to hlonipha Jehova ne bangwe.

U Nga Tini?

• Ini Jehova e amiwa ne zila ya ti no mbala ne ku zwibaakanya nayo?

• I milayontewo ipi ya ka fanila ku ti batsha ha ti shalula zila ya ti no lingika nayo?

• Zila ya ti no lingika nayo i nga thama kuti bangwe ba linge namato ye malebeswa chini?