THUTO 34
Ti Nga Lakidza Chini Kuti to Da Jehova?
A u no da Ndzimu ku pindisa nako ya wa ka be u tangisa ku zwidiya Baibili? A u nga da ku dwilila uli nkhwinya wa Jehova ne kupinda? Ha kwa ka jalo, alakana kuti apa ludo gugo mu na Jehova gu paphidzika, ludo gugwe mu kuli gowo paphidzika. U nga lakidza chini kuti u no nda?
1. Ti nga lakidza chini kuti to da Jehova?
Ha ti tobela milayo ya Jehova to lakidza kuti to nda. (Bala 1 Johani 5:3.) Ha a to patika bathu ku nteedza. Mu bumo gwa ikoko, u no pa nngwe ne nngwe chibaka che ku lakidza kuti a u no shaka ku nteedza kene chini. Ini kwa ka jalo? Jehova u no shaka kuti ti nteedze ne ‘mimoyo yedu yose.’ (Baroma 6:17) Ne angwe matama, u no shaka kuti u nteedze, isini ne kuti wa ka fanila ku thama u jalo, ngono ne kuti u no nda. Zwipithu 3 ne 4 mu buka iyeyi zwa ka thamigwa ku ku batsha kuti u lakidze kuti no da Jehova, ku thama zwi no nshathisa kakale u si nga thame zwi si nga nshathise.
2. Ini ku nga ti simila ku lakidza kuti to da Jehova?
“Kudziyidzika kwe nlulwami kunjinji.” (Pisalema 34:19) Tose to gwisana ne ku sa zwilizanila. Ti ngana ti ka lingisana ne mathatha e ku zwichidza, ku sheta ndulamo, ne angwe mathatha. Ku dziyidzika ku ngana ku ka thama kuti ti simigwe ne ku thama chi no shakiwa na Jehova. Kwa ka jalo ne kuti, ku thama chi sa ka lulwama ku nga zwishingikalila koga. Ngono ha u thama cha u no layigwa na Jehova ne ku thembeka, u nowo be u lakidza kuti u no nda ku pindisa zose. Kakale u nowo be u lakidza kuti u no thembeka mu nli. Ne zila i no fanana, naiye u nowo thembeka mu kuli. Ha a nga ku lashe.—Bala Pisalema 4:3.
ZWIDIYE KWA KA NGINILILA
Bona kuti ini Jehova e tolela pezhugwi ku be u nteedza. Kakale zwidiye kuti ini chi nga ku batsha kuti u dwilile u thembeka mu nli.
3. Khani i no ku ama
Ku yenda ne buka ye Baibili ya Jobe, Satani haazo nyepela Jobe koga, ngono kakale ne bose ba no shaka ku shingila Jehova. Bala Jobe 1:1, 6–2:10, mu be mu lebesana ne kwe buzo dzi no tobela:
-
Ku yenda na Satani, ini Jobe a ka be e teedza Jehova?—Bona Jobe 1:9-11.
-
Ini cha ka lebgwa na Satani ne kwe bathu bose, ku shanganyila nawe?—Bona Jobe 2:4.
Bala Jobe 27:5b, mu be mu lebesana ne kwe buzo i no tobela:
-
Jobe wa ka lakidza chini kuti wa ka be e da Jehova dumbu?
Jobe wa ka lakidza kuti u no da Jehova ne ku dwilila e thembeka mu nli
To lakidza kuti to da Jehova ha ti dwilila ti thembeka mu nli
4. Shathisa moyo wa Jehova
Bala Zwiani 27:11, mu be mu lebesana ne kwe buzo dzi no tobela:
-
Ku chenjela kuko ne ku teedza Jehova ko thama kuti a zwiwe chini? Ini u jalo?
5. U nga thembeka mu na Jehova
Ludo gwedu mu na Jehova go thama kuti ti budze bangwe ne kukwe. Ku thembeka kwedu mu nli ko thama kuti ti thame ti jalo ne kwa ka sima. Zana VIDIYO, mu be mu lebesana ne kwe buzo dzi no tobela.
-
A wa ka tongo wana kwa ka ku simila ku budza bangwe ne kwa Jehova?
-
Mu vidiyo, ini cha ka batsha Grayson ku mililana ne ku cha ku budza bangwe ne kwa Jehova?
Akuzo sima ku thembeka mu na Jehova ha ti da cha a no da kakale ti benga cha a no benga. Bala Pisalema 97:10, mu be mu lebesana ne kwe buzo dzi no tobela:
-
Ku dwa mu na cha wa zwidiya, i zwithu zwipi zwingwe zwi no diwa na Jehova? Zwithu zwa a no benga ndi zwipi?
-
U nga zwidiya chini ku da cha ka lulwama ne ku benga cha ka bipa?
6. Ku teedza Jehova ko ti batsha
Ku teedza Jehova kwa ka ti lulwamila mu zwimo zose. Bala Izaya 48:17, 18, mu be mu lebesana ne kwe buzo dzi no tobela:
-
A u no kumbula kuti ti nga themba kuti Jehova u no ziba cha ka ti lulwamila mu zwimo zose? Ne kutini?
-
Ku zwidiya kuko Baibili ne kwe Ndzimu we malebeswa, Jehova, kwa ka ku batsha chini ku noti ngwenu?
BATHU BANGWE BA KATI: “Ndzimu haazo biga ne kwe kuti to thamani.”
-
I ndimana ipi ya u nga shingisa ku lakidza kuti, mishingo yedu i nga shathisa kene ku hwisa Jehova zogwadza?
CHA WA ZWIDIYA
Ku teedza Jehova ne ku dwilila ti thembeka mu nli nenguba ti lingisana ne mathatha ko lakidza kuti to nda.
U Nga Tini?
-
Wa zwidiyani mu na Jobe?
-
U nga lakidza chini kuti u no da Jehova?
-
Ini chi nga ku batsha kuti u dwilile u thembeka mu na Jehova?
SHAKISISA
Bona se kwa u nga thembeka mu na Jehova ne mu gubungano.
Zwidiye kwa ka paphidzika ne kwe se kwa Satani a ka nyepela bathu.
“Jobe u no Dwilila e Thembeka” (Baibili—I no Leba ne Kweni? ipithu 6)
Bona se kwa bana ba nga lakidza kuti ba no da Jehova.
Nthu nchechana wa ka lingisana ne ku tshambilidzigwa ne bangwe u nga dwilila e thembeka chini mu Ndzimu?
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
