Ndzimu u no koka bathu bose ku be pejo naye ne ku ntembezela. (Pisalema 65:2) Ngono, ha a to teedza kene ku amuchila mitembezelo yose. Chilakidzilo, mitembezelo ye nlume u no dziyidza nkadzi uwe, i ngana i ka si teedziwe. (1 Pita 3:7) Kakale, ha Baiziraele ba ka be be dwilila ne bubi gwabo, Ndzimu ha a zo teedza mitembezelo yabo. Ku pachena kuti, mitembezelo i chithu cha wa ka fanila tolela pezhugwi. Ne kwa ka jalo, Ndzimu u no amuchila mitembezelo ne ye bathu ba ka thama zwibi zwikulu kwazo ha be zwibona nlandu ne ku shanduka.​—Bala Izaya 1:15; 55:7.

Lingilila vidiyo Does God Listen to All Prayers?

Ntembezelo i zila ingwe ye ku namata kwedu, ndizo ta ka fanila tembezela Mbumbi wedu, Jehova koga. (Matewu 4:10; 6:9) Kakale se ti li bathu ba sa ka zwilizanila, ta ka fanila tembezela mu zina la Jesu ne kuti wa ka fila zwibi zwedu. (Johani 14:6) Jehova ha a to shaka ti gwililila mitembezelo ya ka bakhwa ne nsholo kene ya ka kwagwa. U no shaka ti tembezela ku dwa mu moyo.​—Bala Matewu 6:7; Bafilipi 4:6, 7.

Mbumbi wedu u no hwa ne u tembezelela mo moyo. (1 Samuele 1:12, 13)U no ti koka ku tembezela mu zwibaka zose, mangwanana, madekwana, chibaka che zojiwa, ne ta ka lingisana ne mathatha.​—Bala Pisalema 55:22; Matewu 15:36.

Ku be pejo na Jehova ha te chithu chi lelu, ne kuti to chila ne bathu ba singa dumile mu Ndzimu, ba no suta thembiso iye ye shango i na mbakiso. (2 Timoti 3:1, 4; 2 Pita 3:3, 13) Ndizo ti sheta ku kulumbidzana se badumili ba ngompela ne kuti to shetana.​—Bala Bahebera 10:24, 25.

 Ku shangana ne bathu ba no da Ndzimu ko ti batsha kuti ti be pejo ne Ndzimu. Zwidiyo zwe Bafakazi ba Jehova zo ti pa chibaka cha ka naka che ku zwidiya mu ku galamoyo kwe bangwe.​—Bala Baroma 1:11, 12.

U nga be pejo na Jehova ne ku kumbulila cha wa zwi diya mu Dama lile. Kumbulila ne zila ya ka nginilila mishingo iye, ku laya kukwe, ne ku thembesa kukwe. Ku kumbulila cha wa zwidiya ne ntembezelo ko thama kuti u bokele ludo gwe Ndzimu ne buchenjedu gugwe ku dwa mu moyo.​—Bala Joshua 1:8; Pisalema 1:1-3.

U nga be pejo ne Ndzimu koga ha u nthemba, ne ku galamoyo mu nli. Ngono ku galamoyo konga chithu chi no chila chi no shaka jisiwa. Wa ka fanila gala u simisa ku galamoyo kuko ne ku buyulila mabaka e ku dumila kuko.​—Bala Matewu 4:4; Bahebera 11:1, 6.

Jehova u no thokomela ba no nda. U nga ba bakilila mu chingwe ne chingwe chi nga chinya ku galamoyo kwabo ne thembo yabo ye buchilo gu singa pele. (Pisalema 91:1, 2, 7-10) U no ti chenjedza ne kwe zila dze buchilo dzi nga chinya mamuko edu ne ku shatha kwedu. Jehova u no ti diya zila dze buchilo dzi no pinda dzose.​—Bala Pisalema 73:27, 28; Jakubo 4:4, 8.