Mu bathu bali dzi-hundred dze dzimiliyoni ba no gala ku Latin America, ku na dzimiliyoni dzi cha shingisa ndimi dzabo dze kutanga ne zwilenje. Bunji gwe bathu ibabo be kutanga bazwalani ne dziazwadzi dzedu, dze bakirisiti, ba no tolela pezhugwi fungwa yabo ye chilenje. Kuti ba thuse bathu ku zwidiya Baibili, ba no shandulila ne ku andamisa dzitshambiso dze Bafakazi ba Jehova mu ndimi dzi no pinda 130 dze kutanga dze Latin America. a Ne kwa ka jalo, bangwe ba ka lingisana ne ku nyanyayidziwa kuti ba ka shalula ku shingila Jehova ne ku lamba ku shanganila mu zwilenje zwi singa dumane ne Hwalo, zwi zhele mu zwichaba zwabo. Zwipo zwa u no dusa zo shingisiwa ku ba batsha chini?

 Ku Mexico, bazwalani ne dziazwadzi dzedu ba mu ichaba che Huichol mu matombo e ntuthu we Jalisco, ne buthu ba ka lamba ku shanganila mu mishingo i singa dumiligwe ne chikumbuludzo chabo. b Ngono ichecho cha ka tina bangwe mu ichaba. Ne dzi 4 dza December, 2017, bathu banjinji ba zhele bushongola ba ka thasela Bafakazi ba Jehova ne bangwe banjinji ba ka be ba nabo. Bathu banjinji ibabo ba zhele bushongola ba ka ba tata mu ichaba, ba ka chinya thundu yabo, ne ku ba budza kuti ba nowo ba bulaya ha ba nga buya mu nzi.

 Bafakazi ba no gala mu toropo dzi wunde ba ka thokomela bazwalani ne dziadzwadzi dzedu ne zwa ba no sheta chinyolocho. Ngono kwa ku nga thamiwani kuti ba gwilile ku mizi yabo? Nzwalani u no dangwa Agustín u no chenesa eti: “Ta ka ti si na mari a ka lizana ku ruwela lawyer, ngono ta ka be ti singa zibe kuti tinga kumbuludziwa nani mu na zwe nlawo.”

 Ne kuti ku namata kwe bazwalani bedu ba ka sungunuka kwa ka be kwa thasegwa, letabi gwe Central America gwa ka tola thambo chinyolocho. Kutanga, ba ka kumbila babusi be ndawo iyeyi ku lingisisa ku thasegwa ikoko. Ku dwapo, ba ka dumiligwa ne Komiti ye Babatshanyani ye Gubungano li no Laula le Bafakazi ba Jehova ne shingidzana ne Legal Department ye Ofisi wulu ye shango yose, ne ku yesa khani ku nlawo mu bumo gwe bazwalani ne dziazwadzi dzedu ba ku Huichol. Khani iyeyo ya ka pelela ya yesiwa ku Supreme Court ye Mexico.

 Team ye dzi-laywer dzi no dwa mu shango yose, ya ka chenesa zwibuyanana kuti, koga se bangwe bose ba ka fanila hlonipha chilenje che kutanga che zwichaba, zwichaba nayizobo zwa ka fanila hlonipha ne ku bakilila bose mu ichaba chabo. Dzifanilo dze nthu ha dzina migathu.

 Ne July 8, 2020, Supreme Court of Justice ya ka dumana ne buzhalo kuti Bafakazi ba Jehova ha ba na nlandu. Ba ka dusa ndawulo ye kuti bose ba ka be ba tatiwa ba lechedziwe ku gwilila mu ichaba chabo. Agustín, wa lebgwa shulenyana u no thalusa zila ya ba no bokela ne ya ba no zwiwa nayo eti: “To bokela kwazo ne ku shathila cha ta ka thamigwa ne bazwalani, ha ba nga be ba sa ka ti batsha ko be ku sina cha ka thama.”

 Mu chibaka ichecho, bazwalani bedu ku San Juan de Ilumán, nzi u ku Ecuador, we bathu banjinji ba ntolo, ku Otavalo Valley, ba ka be be nyanyayidziwa ne zila i no fanana. Ne 2014, shule kwe ku piwa dziphemiti dzose dzi no sheteka, ba ka tangisa ku baka Holo ye Bushe. Ne kwa ka jalo, ndiyi wa ka zha a ka tungamila bathu banjinji ba zhele bushongola ba no pinda 100 ngono a ka misa ne khani nshingo we ku baka. Ngono ku dwapo ichaba che ka laula kuti Bafakazi ba Jehova ba mise ku shangana mu namato yabo.

 Legal department ye letabi gwe Ecuador ne ofisi wulu ye shango yose ba ka shanganila mu ku milila gubungano kuti li si tongo nyanyayidziwa mu ku namata kwabo. Bazwalani bedu ba ka yesa khani ku court. Ichecho cha ka thama kuti ichaba chi misi ku nyanyayidza kwacho ne duma kuti gubungano li tangise ku shangana kakale ne ku pedzisa ku baka Holo yabo ye Bushe. Ngono ili ku bakilila dzifanilo dze bazwalani bedu mu mazhuba a no zha, bamilili bedu ba ka kumbila dzi-high court kuti dzi tole thambo ne kwe dzikhani idzedzi wulu dze kuti: A bathu ba ntolo ba ka fanila hlonipha dzifanilo dze shango yose dze nthu?

 Ne July 16, 2020, Constitutional Court ye Ecuador, court wulu chose mu shango iyeyi, ya ka hwilila khani iyeyi. Bazwalani be dzi-lawyer ku Ecuador ba ka milila gubungano. Pezhugwi kwa ikoko, bazwalani bedu be dzi-laywer bali 4 ba na luzibo gwe shango yose ba ka lebeleka mu court. Ne ntata ye milayo ye COVID-19, ba ka lebeleka bali mu shango dza ka siyasiyana be shingisa videoconference. Ya ka be ili gwe kutanga mu shango kuti court i dume team ye chinlayo ino milila Bafakazi ba Jehova mu shango yose kuti i lebeleke ne zila ya ka jalo. c Team ya ka leba ne kwe bamilili be nlayo mu shango yose ku lakidza kuti bathu be kutanga mu ichaba ha ba to lashikigwa ne dzifanilo dzabo dze buthu ne ntata ye kuti bangwe be zwichaba zwe kutanga.

 Bazwalani bedu ba ku Otavalo Valley ba ka milila kwazo thambo i nowo togwa ne Constitutional Court. Mu chibaka ichechi, ba no shathila batsho ya ba ka piwa. César, u no shingila se nkugwana mu Gubungano le Ilumán Quichua, akati: “Ndi Jehova koga e shingisa gubungano lile u nga thama kunjinji kwazo ku batsha ba shomanana kwazo.”

 Dzi-lawyer dzi no shingisiwa mu khani iyeyi Bafakazi ba Jehova bose, ngono ba no shathila ku batsha ne luzibo gwabo gwe nlayo ba singa ruwegwe. Ne kwa kajalo, ku kwalisa dzikhani idzedzi, ku dzi baakanyila, ku dzi lebelekela mu court ko shaka nako ne mari. Dzi-lawyer dzedu ne bangwe bazwalani bedu ba no shingisa dziawara dzi no pinda 380 be baakanyila dzikhani idzedzi dze nlawo ne dziawara dzingwe dzili 240 mu ku shandulila dzi-document dzi no shingisiwa ku hwilila ku Mexico. Dzi-lawyer dzi nga bata 40 dzi no dwa mu shango dza ka siyasiyana, dzo shingisa dzi-hundred dze dziawara mu khani ye Ecuador. To bona ngayi mari e ku ruwelela ku milila bazwalani bedu? Ne zwipo zwa mu no dusa mu shingisa dzizila dza ka siyasiyana dzi no chenesiwa mu donate.isa4310.com. To bokela ku be mu na moyonchena.