TƆM KƖKPƐLƖKƖTƲ 39
Lɩmaɣza wena Ɛsɔ wɛnɩ calɩm yɔɔ yɔ
Calɩm kɛ mbʋ pɩ-tɔm cɛyɩ siŋŋ yɔ. Nɔɔyʋ ɛɛpɩzɩɣ nɛ ɛcaɣ wezuu ye ɛfɛyɩnɩ calɩm yɔ. Ɛsɔ kɛnɩ ɖa-Lɩzɩyʋ pʋyɔɔ lɛ, ɛwɛnɩ waɖɛ se eheyi-ɖʋ ɛzɩma pɩwɛɛ se ɖɩlabɩnɩ tʋmɩyɛ calɩm yɔ. Suwe ɛyɔɔdɩ calɩm yɔɔ? Ðɩpɩzɩɣ nɛ ɖɩtɔɔ calɩm yaa ɖitisi nɛ paɖʋ-ɖʋ calɩm na? Nɛ ɛzɩma ŋpɩzɩɣ nɛ ŋkpaɣ lɩmaɣza kɩbana hɔɔlʋʋ kʋnɛ kɩ-taa?
1. Lɩmaɣza wena Yehowa wɛnɩ calɩm yɔɔ?
Yehowa kaaheyi ɛ-sɛyaa Bibl alɩwaatʋ taa se: «Paa tomnaɣ ŋga lɛ, ke-wezuu lɛ ka-calɩm.» (Levitiki 17:14) Yehowa ɛsɩndaa lɛ, calɩm sɩŋnɩ wezuu. Wezuu kɛ ŋgee kʋjɔʋ ŋgʋ Ɛsɔ labɩ-ɖʋ yɔ, mbʋ ɖɔɖɔ calɩm kɛ mbʋ pɩwɛ ŋgee yɔ.
2. Ɛbɛ Ɛsɔ kizaa se pataalabɩnɩ calɩm?
Pʋcɔ nɛ Yesu kɔŋ tɛtʋ yɔɔ lɛ, Yehowa kaaɖʋ ɛ-sɛyaa paɣtʋ se pataatɔɔ calɩm. (Kalɩ Kiɖe Tɛɛ Tɔm 9:4 nɛ Levitiki 17:10.) Ɛɖaɣnɩ ɖʋʋ paɣtʋ ndʋ alɩwaatʋ ndʋ nɔɔɖɛyaa ɛgbɛyɛ tɔzɩ Krɩstʋ mba tɔm tʋnɛ yɔ: «Ɩsɔ . . . calɩm.»—Kalɩ Tʋma Labʋ 15:28, 29.
Ye pɔtɔm se ɛyʋ ɛsɔ calɩm yɔ, pʋ-tɔbʋʋ lɛ suwe? Ye ɖɔkɔtɔ nɔɔyʋ eheyi-ŋ se ŋsɔ sʋlʋm yɔ, pʋ-tɔbʋʋ le se pɩfɛyɩ se ŋñɔɔ-pʋ. Ɛlɛ ŋpɩzɩɣ nɛ ŋtɔɔ tɔɔnaɣ ŋga ka-taa sʋlʋm wɛɛ yɔ yaa ŋtisi nɛ paɖʋ-ŋ pʋ ño-hola taa? Pɩtʋʋ fɛyɩ se ŋŋtisiɣ. Mbʋ ɖɔɖɔ Ɛsɔ yɔɔdʋʋ se ɖɩsɔ calɩm yɔ, pʋ-tɔbʋʋ lɛ se ɖɩtaañɔɔ-pʋ, ɖɩtaatɔɔ kpɩnɛ nɖɩ patɩcɛ ɖi-liu tɛɛ yɔ ɖɩ-nandʋ nɛ ɖɩtaatɔɔ ɖɔɖɔ tɔɔnaɣ ŋga ka-taa paɖʋ calɩm yɔ.
Nɛ ye pɔtɔm se pɩpɔzʋʋ se paɖʋ-ɖʋ calɩm nɛ pawaa ɖa-kʋdɔŋ nakʋyʋ? Kʋdɔmɩŋ waʋ nʋmɔŋ nɩɩyɩ kaɖɩɣnɩ Ɛsɔ paɣtʋ kaɣlaa. Nʋmɔŋ ɛnɩ ɩ-taa nɩɩyɩ lɛ calɩm ɖʋʋ nɛ calɩm hɔɔlɩŋ sɔsɔŋ naanza ɖʋʋ. Hɔɔlɩŋ sɔsɔŋ naanza ɛnɩ yɔ: Kuludasɩ kɩsɛɛmsɩ, kuludasɩ kʋhʋlʋmasɩ, kuludasɩ nzɩ sɩlakɩ nɛ calɩm kiɣ yɔ, nɛ calɩm akeleta. Ɛlɛ kʋdɔmɩŋ waʋ nʋmɔŋ nɩɩyɩ ɩɩkaɖɩɣnɩ Ɛsɔ paɣtʋ kaɣlaa. Kɩɖaŋ nɩɩyɩ yɔ: Nabʋyʋ taa papɩzɩɣ nɛ patayɩ calɩm hɔɔlɩŋ sɔsɔŋ taa nɛ ɩpɩsɩ calɩm hɔɔlɩŋ cikpeŋ sakɩyɛ weyi palakɩnɩ tʋma ndɩ ndɩ yɔ. Nabʋyʋ taa ɖɔɖɔ lɛ, papɩzɩɣ nɛ palabɩnɩ tʋmɩyɛ kʋdɔndʋ maɣmaɣ calɩm. Hɔɔlɩŋ ɛnɩ ɩ-taa lɛ, paa weyi pɩwɛɛ se ɛsɛtɩ ɛ-tɩ tɔm. a—Galaatii mba 6:5.
TAZƖ NƐ PILIMI
Tazɩ nɛ ŋna kʋdɔmɩŋ waʋ nʋmɔŋ weyi ŋpɩzɩɣ nɛ ŋtisi yɔ.
3. Kpaɣ lɩmaɣza wena akɛdɩɣnɩ Yehowa yɔ kʋdɔmɩŋ waʋ nʋmɔʋ taa
Kʋdɔmɩŋ waʋ nʋmɔʋ taa lɛ, ɛzɩma ŋpɩzɩɣ nɛ ŋkpaɣ lɩmaɣza wena alakɩ nɔɔ kʋɖʋmaɣ nɛ Ɛsɔ lɩmaɣza yɔ? Ɩcɔnɩ VIDEO, nɛ pʋwayɩ lɛ ɩtazɩ nɛ ɩna mbʋ pʋyɔɔ pɩcɛyaa se ɖɩkpɛzɩ nɩŋgbanzɩ nzɩ sɩkɔŋ yɔ.
-
Tɩmɩ nɛ ŋpɔzɩ Ɛsɔ lɔŋsɩnɖɛ.—Yakubu 1:5.
-
Ñɩnɩ Bibl paɣtʋ kila wena ŋpɩzɩɣ nɛ ŋlabɩnɩ tʋmɩyɛ yɔ.—Aduwa 13:16.
-
Ñɩnɩ nɛ ŋtɩlɩ kʋdɔmɩŋ waʋ nʋmɔŋ weyi palakɩnɩ tʋmɩyɛ mi-egeetiye taa yɔ.
-
Tazɩ nɛ ŋna kʋdɔmɩŋ waʋ nʋmɔŋ weyi ŋŋpɩzɩɣ nɛ ŋtisi yɔ.
-
Ñaɣ pana nɛ ŋkpaɣ lɩmaɣzɩyɛ nɖɩ ɖiyeki nɛ ŋwɛɛnɩ ɛhʋyɛ kɩbanɖɛ yɔ.—Tʋma Labʋ 24:16. b
-
Taasɔɔ se hɔɔlɩŋ weyi ɩ-taa pɩpɔzʋʋ se paa weyi ɛsɛtɩ ɛ-tɩ tɔm yɔ, nɔɔyʋ ɛɛpɩzɩɣ nɛ eheyi-ŋ mbʋ pɩwɛɛ se ŋla yɔ; paa pɩtɩɩkɛ ñɛ-tɛŋga, ɛgbɛyɛ taa ɛzʋtʋyʋ nɔɔyʋ yaa weyi ɛkpɛlɩkɩɣnɩ-ŋ Bibl yɔ.—Roma mba 14:12.
-
Ma lɩmaɣzɩyɛ nɖɩ ŋkpaɣaa yɔ takayaɣ nakɛyɛ yɔɔ.
4. Yehowa Aseɣɖe Tɩnaa sɔɔlaa se patɩŋnɩ nʋmɔŋ kɩbaŋ yɔɔ nɛ pawaa pa-kʋdɔmɩŋ
Papɩzɩɣ nɛ patɩŋnɩ nʋmɔʋ kɩbaŋʋ nakʋyʋ yɔɔ nɛ pawaa ɛyʋ ɛ-kʋdɔŋ, paa ɛɖʋwa se ɛñaŋ paɣtʋ ndʋ Ɛsɔ ɖʋwa pɩlɩɩnɩ calɩm yɔɔ yɔ. Ɩcɔnɩ VIDEO.
Ɩkalɩ Tiiti 3:2, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛbɛ yɔɔ pɩwɛɛ se paa ɛzɩmtaa lɛ ɖɩña ɖɔkɔtɔnaa nɛ fɛɖaa nɛ ɖɩyɔɔdʋʋnɩ-wɛ camɩyɛ?
|
Krɩstʋ tʋ eetisiɣ |
Paa Krɩstʋ tʋ weyi lɛ pɩwɛɛ se ɛkpaɣ lɩmaɣzɩyɛ |
|---|---|
|
A. Calɩm akeleta |
Calɩm hɔɔlɩŋ cikpeŋ weyi ɩlɩnɩ calɩm akeleta taa yɔ |
|
B. Kuludasɩ kʋhʋlʋmasɩ |
Calɩm hɔɔlɩŋ cikpeŋ weyi ɩlɩnɩ kuludasɩ kʋhʋlʋmasɩ taa yɔ |
|
C. Kuludasɩ nzɩ sɩlakɩ nɛ calɩm kiɣ yɔ |
Calɩm hɔɔlɩŋ cikpeŋ weyi ɩlɩnɩ kuludasɩ nzɩ sɩlakɩ nɛ calɩm kiɣ yɔ sɩ-taa yɔ |
|
D. Kuludasɩ kɩsɛɛmsɩ |
Calɩm hɔɔlɩŋ cikpeŋ weyi ɩlɩnɩ kuludasɩ kɩsɛɛmsɩ taa yɔ |
5. Alɩwaatʋ ndʋ pɩpɔzʋʋ calɩm hɔɔlɩŋ cikpeŋ yɔ
Hɔɔlɩŋ sɔsɔŋ naanza wɛnɩ calɩm taa: kuludasɩ kɩsɛɛmsɩ, kuludasɩ kʋhʋlʋmasɩ, kuludasɩ nzɩ sɩlakɩ nɛ calɩm kiɣ yɔ, nɛ calɩm akeleta. Hɔɔlɩŋ sɔsɔŋ ɛnɩ ɩ-taa palɩzɩɣ hɔɔlɩŋ cikpeŋ ndɩ ndɩ weyi payaɣ se calɩm hɔɔlɩŋ cikpeŋ yɔ. c Palakɩnɩ calɩm hɔɔlɩŋ cikpeŋ ɛnɩ ɩ-taa nɩɩyɩ tʋmɩyɛ se pawaa kʋdɔmɩŋ nɩɩyɩ yaa pasɩnzɩ calɩm mbʋ piɖiɣni kpem yɔ.
Paa Krɩstʋ tʋ weyi pɩwɛɛ se ɛkpaɣ lɩmaɣzɩyɛ se etisiɣ yaa eetisiɣ se palabɩnɩ tʋmɩyɛ calɩm hɔɔlɩŋ cikpeŋ nɛ pawaa ɛ-kʋdɔŋ. Nɛ pɩwɛɛ se ɛkpaɣ lɩmaɣzɩyɛ nɛ pɩla nɔɔ kʋɖʋmaɣ nɛ ɛhʋyɛ nɖɩ ɛkpaɣ Bibl nɛ ɛfalɩsɩna yɔ. Nabɛyɛ pɩzɩɣ nɛ pekizi se pataakpaɣ kɔ wena palabɩnɩ calɩm hɔɔlɩŋ cikpeŋ yɔ nɛ pawaa pa-kʋdɔmɩŋ. Lalaa pɩzɩɣ nɛ pɔyɔɔdɩ se pɛ-ɛhʋyɛ haɣ-wɛ nʋmɔʋ se pakpaɣ kɔ wena palabɩnɩ calɩm hɔɔlɩŋ cikpeŋ yɔ nɛ pawaanɩ pa-kʋdɔŋ.
Pʋcɔ nɛ ŋkpaɣ lɩmaɣzɩyɛ hɔɔlʋʋ kʋnɛ kɩ-taa lɛ, maɣzɩ tɔm tʋnɛ tɩ-yɔɔ:
-
Ɛzɩma manpɩzɩɣ nɛ malɩzɩ ɖɔkɔtɔ nɔɔyʋ mbʋ pʋyɔɔ mentisiɣ yaa maatisiɣ se paɖʋ-m calɩm hɔɔlɩŋ cikpeŋ nɩɩyɩ yɔ pɩ-taa?
NƆƆYƲ PƖZƖƔ NƐ ƐPƆZƖ SE: «Ɛbɛ yɔɔ pɩfɛyɩ ɖeu se ɛyʋ etisi nɛ paɖʋ-ɩ calɩm?»
-
Suwe ŋmaɣzɩɣ?
TOBI LƐ
Yehowa tɩsɔɔlɩ se ɖɩlabɩnɩ calɩm tʋmɩyɛ nʋmɔʋ ŋgʋ kɩtɩmʋna yɔ kɩ-taa.
Tɔm taa tazʋʋ
-
Ɛbɛ yɔɔ calɩm kɛ ŋgee pʋyʋ Yehowa ɛsɩndaa?
-
Ɛzɩma ɖɩlaba nɛ ɖɩna se paɣtʋ ndʋ Ɛsɔ ɖʋwa se pɔsɔ calɩm yɔ tɩwɩlɩɣ ɖɔɖɔ se ɖitaatisi nɛ paɖʋ-ɖʋ calɩm?
-
Ye pañɩnɩɣ se palabɩnɩ tʋmɩyɛ calɩm nɛ pawaa-ɖʋ kʋdɔŋ nakʋyʋ yɔ, ɛbɛ pɩzɩɣ pɩsɩnɩ-ɖʋ nɛ ɖɩkpaɣ lɩmaɣza camɩyɛ?
WONDU LƐƐTƲ
Ɛbɛ pɩwɛɛ se pituyi-ŋ nɛ ŋkpaɣ lɩmaɣzɩyɛ se palabɩnɩ tʋmɩyɛ ña-maɣmaɣ ña-calɩm nɛ pawaa ña-kʋdɔŋ yaa pataalabɩna?
«Questions des lecteurs» (La Tour de Garde, 15 octobre 2000)
Ɛbɛ yɔɔ pɩwɛɛ se ŋmaɣzɩ pʋcɔ nɛ ŋkpaɣ lɩmaɣzɩyɛ se ŋtisiɣ yaa ŋŋtisiɣ kʋdɔmɩŋ waʋ nʋmɔŋ weyi ɩ-taa palakɩnɩ tʋmɩyɛ calɩm hɔɔlɩŋ cikpeŋ yɔ?
Ɛbɛ yeba nɛ ɖɔkɔtɔ nɔɔyʋ tisi se lɩmaɣza wena Yehowa wɛnɩ calɩm yɔɔ yɔ amʋnaa?
«J’ai accepté le point de vue de Dieu sur le sang» (Réveillez-vous!, 8 décembre 2003)
Cɔna nɛ ŋna ɛzɩma ɛzʋtʋyaa mba pɛwɛ Ðama nɩnʋʋ nɛ ɖɔkɔtɔ kɔɔmiitewaa taa yɔ pasɩɣnɩ po-koobiya yɔ.
a Cɔnɩ Tɔm kɩkpɛlɩkɩtʋ 35: «Ɛzɩma ɖɩpɩzɩɣ nɛ ɖɩkpaɣ lɩmaɣza kɩbana?»
b Cɔnɩ hɔɔlʋʋ 5, «Alɩwaatʋ ndʋ pɩpɔzʋʋ calɩm hɔɔlɩŋ cikpeŋ yɔ;» nɛ Tɩnaɣ yɔɔ tɔm 3, «Kʋdɔmɩŋ waʋ nʋmɔŋ weyi ɩ-taa palakɩnɩ tʋmɩyɛ calɩm yɔ.»
c Ðɔkɔtɔnaa nabɛyɛ maɣzɩɣ se tʋkaɣ nakɛyɛ fɛyɩ calɩm hɔɔlɩŋ sɔsɔŋ nɛ calɩm hɔɔlɩŋ cikpeŋ pɛ-hɛkʋ taa. Pʋyɔɔ lɛ pɩpɔzʋʋ se ŋlɩzɩ-wɛ mbʋ pʋyɔɔ ŋŋtisiɣ se paɖʋ-ŋ calɩm yaa kuludasɩ kɩsɛɛmsɩ, kuludasɩ kʋhʋlʋmasɩ, kuludasɩ nzɩ sɩlakɩ nɛ calɩm kiɣ yɔ, nɛ calɩm akeleta yɔ pɩ-taa.
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
