TƆM KƖKPƐLƖKƖTƲ 34
Ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ Yehowa?
Ŋmaɣzɩɣ se kpaɣnɩ alɩwaatʋ ndʋ ŋpaɣzɩ Bibl kpɛlɩkʋʋ yɔ, sɔɔlɩm mbʋ ŋwɛnɩ Ɛsɔ yɔɔ yɔ pɩtasɩ paɣlʋʋ na? Ŋsɔɔlaa se ŋwolo pɩ-yɔɔ nɛ ŋcɛyɩsɩɣ ña nɛ ɩ mɩ-taabalɩyɛ na? Ye mbʋ yɔ, taasɔɔ se Yehowa naɣ se sɔɔlɩm mbʋ ŋwɛnɩ ɛ-yɔɔ yɔ pɩwɛɛ nɛ pɩpaɣlɩɣ lɛ, ɛsɔɔlʋʋ-ŋ se ɛcɔnɩ ñɔ-yɔɔ ɖɔɖɔ camɩyɛ nɛ pɩkɩlɩ. Ɛzɩma ŋpɩzɩɣ nɛ ŋwɩlɩ-ɩ se ŋsɔɔlɩ-ɩ?
1. Ɛzɩma ɖɩwɩlɩɣ se ɖɩsɔɔlɩ Yehowa?
Ye ɖɩñaŋ Yehowa yɔ, pʋbʋ lɛ ɖɩwɩlɩɣ se ɖɩsɔɔlɩ-ɩ. (Kalɩ 1 Yohanɛɛsɩ 5:3.) Ɛɛkpaɣ nɔɔyʋ nɛ ɖoŋ se ɛñamɩ-ɩ. Ɛlɛ ɛhaɣ ɖa-taa paa weyi lɛ waɖɛ se ɛlɩzɩ se ɛñaŋɩ-ɩ yaa ɛɛñaŋɩ-ɩ. Ɛbɛ yɔɔ? Yehowa sɔɔlaa se ‘ɖɩñamnɩ ɖa-laŋɩyɛ.’ (Roma mba 6:17) Pʋ-tɔbʋʋ lɛ se Yehowa tɩsɔɔlɩ se ŋñamɩ-ɩ mbʋ pʋyɔɔ yɔ pañɩkɩɣ ñɔ-yɔɔ, ɛlɛ ɛñɩnɩɣ se ŋñamɩ-ɩ mbʋ pʋyɔɔ yɔ ŋsɔɔlɩ-ɩ. Takayaɣ kanɛ kɔ-hɔɔlɩŋ 3 nɛ 4 sɩɣnɩ-ŋ nɛ ŋla mbʋ pɩkɛdɩɣnɩ Yehowa yɔ nɛ ŋtɩŋnɩ pɩ-yɔɔ nɛ ŋwɩlɩ se ŋsɔɔlɩ-ɩ.
2. Ɛbɛ yɔɔ pɩpɩzɩɣ nɛ pɩwɛɛ-ɖʋ kaɖɛ se ɖɩwɩlɩ se ɖɩsɔɔlɩ Yehowa?
«Ɛyʋ siɣsiɣ tʋ kʋñɔmɩŋ ɖɔwa.» (Keɣa 34:19) Ða-tɩŋa payɩ ɖɩlʋkɩnɩ ɖa-maɣmaɣ ɖɛ-ɛjandʋ. Ðɩpɩzɩɣ ɖɔɖɔ nɛ ɖɩlakɩ liidiye kʋñɔŋ, yaa pɩtɩla pomuluu-ɖʋ hɔɔlɩŋ nɩɩyɩ taa yaa ɖɩkatɩɣ ɖɔɖɔ kala lɛɛna. Alɩwaatʋ ndʋ ɖɩkatɩɣ kala yɔ, pɩpɩzɩɣ nɛ pɩwɛɛ-ɖʋ kaɖɛ se ɖɩla mbʋ Yehowa sɔɔlaa yɔ. Pɩpɩzɩɣ nɛ pɩwɛɛ-ɖʋ kaɖɛ mbʋ pʋyɔɔ yɔ nabʋyʋ taa mbʋ Yehowa tɩsɔɔlɩ yɔ, pɩ-labʋ pɩzɩɣ nɛ pɩwɛɛ kɛlɛʋ. Ɛlɛ ye ŋwobi pɩ-yɔɔ nɛ ŋñaŋ Yehowa yɔ, ŋwɩlɩɣ se ŋsɔɔlɩ-ɩ nɛ pɩkɩlɩ pɩtɩŋa. Ŋwɩlɩɣ ɖɔɖɔ se ŋwɛ siɣsiɣ ɛ-ɛsɩndaa. Piyeki nɛ Yehowa ɖɔɖɔ labɩ-ŋ camɩyɛ lakasɩ. Nɛ ɛɛkaɣ-ŋ haʋ siɣye kpa.—Kalɩ Keɣa 4:3.
TAZƖ NƐ PILIMI
Tazɩ nɛ ŋna mbʋ pʋyɔɔ Yehowa taa lakɩ leleŋ alɩwaatʋ ndʋ ŋñaŋɩ-ɩ yɔ, nɛ mbʋ pɩpɩzɩɣ nɛ pɩsɩnɩ-ŋ nɛ ŋñamɩ-ɩ yɔ.
3. Tɔm ndʋ titukuuni-ŋ yɔ
Bibl taa takayaɣ ŋga payaɣ se Yɔɔb yɔ, kawɩlɩɣ se Sataŋ yɔɔdɩ tɔm natʋyʋ nɛ tiitukuuni Yɔɔb ɖeke, ɛlɛ titukuuni ɖɔɖɔ ɛyaa mba payɩ pɔsɔɔlaa se pɛsɛɛ Yehowa yɔ. Ɩkalɩ Yɔɔb 1:1, 6–2:10, nɛ pʋwayɩ lɛ ɩtazɩ tɔm tʋnɛ tɩ-taa:
-
Sataŋ yɔɔdaa se ɛbɛ yɔɔ Yɔɔb ñaŋ Yehowa?—Cɔnɩ Yɔɔb 1:9-11.
-
Tɔm ndʋ Sataŋ yɔɔdɩ ɛyaa kpeekpe yɔɔ nɛ pɩkpɛndɩnɩ ña-ɖɔɖɔ?—Cɔnɩ Yɔɔb 2:4.
Ɩkalɩ Yɔɔb 27:5b, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma Yɔɔb wɩlaa se ɛsɔɔlɩ Yehowa toovenim?
Yɔɔb ɖɔkɩ ɛ-siɣsiɣ wɛtʋ kpam Yehowa ɛsɩndaa nɛ ɛtɩŋnɩ pɩ-yɔɔ nɛ ɛwɩlɩ se ɛsɔɔlɩ Yehowa.
Ye ɖɩlakɩ mbʋ pɩwɛ siɣsiɣ Yehowa ɛsɩndaa yɔ, pʋbʋ lɛ ɖɩwɩlɩɣ se ɖɩsɔɔlɩ-ɩ.
4. Yele nɛ Yehowa taa la leleŋ
Ɩkalɩ Aduwa 27:11, nɛ pʋwayɩ lɛ ɩtazɩ tɔm tʋnɛ tɩ-taa:
-
Ye ŋwɛ lɔŋ nɛ ŋñaŋ Yehowa yɔ, ɛzɩma pɩlakɩ-ɩ? Ɛbɛ yɔɔ?
5. Ŋpɩzɩɣ nɛ ŋwɛɛ siɣsiɣ Yehowa ɛsɩndaa
Sɔɔlɩm mbʋ ɖɩwɛnɩ Yehowa yɔɔ yɔ pituyuu-ɖʋ se ɖiheyi lalaa ɛ-tɔm. Ðe-siɣsiɣ wɛtʋ tuyuu-ɖʋ se ɖɩla mbʋ, paa pɩfɛyɩ kɛlɛʋ yɔ. Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa.
-
Pɩwɛ-ŋ kaɖɛ nabʋyʋ taa se ŋsusi lalaa Yehowa tɔm na?
-
Video taa, ɛbɛ sɩnɩ Grayson nɛ ɛwa sɔɔndʋ ndʋ tɩkpaɣaɣ-ɩ yɔ?
Ye ɖɩsɔɔlɩ mbʋ Yehowa sɔɔlaa yɔ nɛ ɖɩpaɖɩɣ mbʋ ɛpaɖɩɣ yɔ, pɩwɛɣ-ɖʋ kɛlɛʋ nɛ pɩkɩlɩ se ɖɩwɛɛ siɣsiɣ ɛ-ɛsɩndaa. Ɩkalɩ Keɣa 97:10, nɛ pʋwayɩ lɛ ɩtazɩ tɔm tʋnɛ tɩ-taa:
-
Pɩlɩɩnɩ tɔm ndʋ ŋtɛm kpɛlɩkʋʋ Yehowa yɔɔ yɔ tɩ-yɔɔ lɛ, mbʋ mbʋ Yehowa sɔɔlaa yɔ pɩ-taa nabʋyʋ lɛ ɛbɛ? Mbʋ ɛpaɖɩɣ yɔ, pɩ-taa nabʋyʋ lɛ ɛbɛ?
-
Ɛzɩma ɖɩpɩzɩɣ nɛ ɖɩsɔɔlɩ kɩbam nɛ ɖɩpaɖɩ kɩdɛkɛdɩm?
6. Ye ɖɩñaŋ Yehowa yɔ ɖihikiɣ wazasɩ
Yehowa ñam wazɩɣ paa ɛzɩmtaa. Ɩkalɩ Izaayii 48:17, 18; nɛ pʋwayɩ lɛ ɩtazɩ tɔm tʋnɛ tɩ-taa:
-
Ña-naʋ taa yɔ, ɖɩpɩzɩɣ nɛ ɖitisi se paa ɛzɩmtaa lɛ, Yehowa sɩm mbʋ pɩwazɩɣ-ɖʋ yɔ? Ɛbɛ yɔɔ?
-
Kpaɣnɩ alɩwaatʋ ndʋ ŋpaɣzɩ kpɛlɩkʋʋ Bibl nɛ ŋwɛɛ nɛ ŋtɩlɩɣ Ɛsɔ toovenim tʋ Yehowa yɔ, wazasɩ nzɩ ŋhiɣaa?
NABƐYƐ YƆƆDƲƲ SE: «Ɛsɔ paa fɛyɩnɩ mbʋ malakɩ yɔ.»
-
Mayaɣ ŋga ŋpɩzɩɣ nɛ ŋlabɩnɩ tʋmɩyɛ nɛ ŋwɩlɩ se ɖa-lakasɩ pɩzɩɣ nɛ sɩha Yehowa taa leleŋ yaa sɩɖʋ-ɩ ɖɩwɩzɩyɛ?
TOBI LƐ
Ye ŋñɩnɩɣ se ŋwɩlɩ se ŋsɔɔlɩ Yehowa yɔ, pɩwɛɛ se ŋñamɩ-ɩ nɛ ŋɖɔkɩ ɖɔɖɔ ñe-siɣsiɣ wɛtʋ kpam paa pɩfɛyɩ kɛlɛʋ yɔ.
Tɔm taa tazʋʋ
-
Ɛbɛ Yɔɔb kɩɖaʋ kpɛlɩkɩɣ-ŋ?
-
Ɛzɩma ŋpɩzɩɣ nɛ ŋwɩlɩ Yehowa se ŋsɔɔlɩ-ɩ?
-
Ɛbɛ pɩzɩɣ pɩsɩnɩ-ŋ nɛ ŋɖɔkɩ ñe-siɣsiɣ wɛtʋ kpam Yehowa ɛsɩndaa?
WONDU LƐƐTƲ
Cɔna nɛ ŋna ɛzɩma ɖɩpɩzɩɣ nɛ ɖɩla mbʋ pɩwɛ siɣsiɣ Yehowa ɛsɩndaa nɛ ɛgbɛyɛ ɛsɩndaa yɔ.
Kpɛlɩkɩ tɔm lɛɛtʋ pɩlɩɩnɩ tɔm kɩdɛkɛdɩtʋ ndʋ Sataŋ yɔɔdɩ ɛyaa yɔɔ yɔ tɩ-yɔɔ.
«L’intégrité de Job» (La Bible : quel est son message?, partie 6)
Cɔna nɛ ŋna ɛzɩma, halɩ piya evelisi pɩzɩɣ nɛ sɩwɩlɩ Yehowa se sɩsɔɔlɩ-ɩ yɔ.
Ɛzɩma pɩɣa evelaɣ nakɛyɛ pɩzɩɣ nɛ kɔɖɔkɩ ke-siɣsiɣ wɛtʋ kpam Yehowa ɛsɩndaa paa piya evelisi lɛɛsɩ ɩñɩkɩɣ kɔ-yɔɔ se kataala mbʋ yɔ?
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
